পুনৰ এবাৰ গৌৰৱ কঢ়িয়াই আনিবলৈ সক্ষম হ’ল তেজপুৰৰ বিশ্ববিদ্যালয়ৰ দুগৰাকী গৱেষকে। মঙলবাৰে দিল্লীস্থিত ৰাষ্ট্ৰপতি ভৱনত ভাৰত চৰকাৰৰ বিজ্ঞান আৰু প্ৰযুক্তি বিভাগৰ সহযোগত আযোজিত এটা অনুষ্ঠানত তেজপুৰ বিশ্ববিদ্যালয়ৰ দুগৰাকী গৱেষকক ‘গান্ধীয়ান যুৱ প্ৰযুক্তি চমুকৈ জি ৱাই টি আই এৱাৰ্ড-২০১৮’ শীৰ্ষক বঁটাৰে সন্মানিত কৰে।
উল্লেখযোগ্য যে, তেজপুৰ বিশ্ববিদ্যালয়ৰ পৰিৱেশ বিজ্ঞানৰ গৱেষক ছাত্ৰী পল্লৱী দাস আৰু ৰসায়ন বিজ্ঞান বিভাগৰ গৱেষক ছাত্ৰী কস্তুৰী শৰ্মা ‘ছিন্থেটিক ৰুটছ টু মেনিফেক্সাৰ আইৰন কেপড মেটেল অক্সাইড নেন’ মেটেৰিয়েলছ’ বিষয়ক নতুন পদ্ধতি উদ্ভাৱনৰ কৰ্মত জড়িত আছিল।
তেজপুৰ বিশ্ববিদ্যালয়ৰ পৰিৱেশ বিজ্ঞানৰ অধ্যাপক সত্য সুন্দৰ ভট্টাচাৰ্য, ৰসায়ন বিজ্ঞান বিভাগৰ অধ্যাপক ড০ সঞ্জয় প্ৰটিহাৰৰ তত্বাৱধানত এই দুগৰাকী গৱেষক ছাত্ৰীয়ে উল্লিখিত বিষয়ত নতুন পদ্ধতি উদ্ভাৱণ কৰিবলৈ সক্ষম হৈছিল।
অনুষ্ঠানটোত ৰাষ্ট্ৰপতিগৰাকীয়ে গৱেষক দুগৰাকীক স্মাৰক, মানপত্ৰ প্ৰদান কৰাৰ লগতে প্ৰকল্পৰ বাবে ১৫ লাখ টকাৰ বৰঙণি আগবঢ়ায়।
দিল্লীত আয়োজিত এই অনুষ্ঠানত কেন্দ্ৰীয় চৰকাৰৰ বিজ্ঞান প্ৰযুক্তি আৰু ভূমি বিজ্ঞানৰ মন্ত্ৰী হৰ্ষবৰ্ধন, বিভাগীয় সচিব প্ৰফেছৰ আশুতোষ শৰ্মা, নেশ্যনেল ইনোভেশ্যন ফাউণ্ডেশ্যনৰ অধ্যক্ষ ড০ আৰ এ মাছেলকাৰ, উপাধ্যক্ষ প্ৰফেছৰ অনিল গুপ্তা উপস্থিত থাকে।
উল্লেখ্য যে দেশৰ শীৰ্ষস্থান দখল কৰি অহা বিশ্ববিদ্যালয়খনৰ গৱেষক ছাত্ৰী দুগৰাকীৰ এনে সাফল্যত বিশ্ববিদ্যালয়ত অধ্যয়নৰত ছাত্ৰ-ছাত্ৰী, কৰ্তৃপক্ষৰ লগতে তেজপুৰৰ লগতে সমগ্ৰ অসমবাসীয়ে গৌৰৱান্বিত কৰিছে।
