ৰাজ্যখনৰ কিছু সংখ্যক খিলঞ্জীয়াৰ অনীহা আৰু এলেহুৱা স্বভাৱৰ বাবে এন আৰ চিৰ চূডান্ত খচৰাত অসমীয়াৰ নাম অহা নাই। আমাৰ এই খিলঞ্জীয়া লোকৰ অনীহাৰ বাবে এতিয়া এন আৰ চিত সন্দেহযুক্ত নাগৰিকৰ নাম সোমাইছে। এই মন্তব্য অসম সাহিত্য সভাৰ সভাপতি ড০ পৰমানন্দ ৰাজবংশীৰ।
নলবাৰীৰ শংকৰদেৱ একাডেমিৰ ২০ সংখ্যক প্ৰতিষ্ঠা দিৱস আৰু দশম বাৰ্ষিক ড০ কৈলাশ শৰ্মা স্মাৰক বক্তৃতানুষ্ঠানত মুখ্য অতিথি হিচাপে অংশগ্ৰহণ কৰি ড০ ৰাজবংশীয়ে কয় যে যদি ভিত্তভৰ্ষ ৭১ৰ বিপৰীতে ৫১ হ’লহেতেন তেন্তে ৪০ লাখ লোকৰ বিপৰীতে তালিকাৰ পৰা পৰিল হৈ লক্ষ লক্ষ লোকৰ নাম।
তেওঁ লগতে কয় যে অসমীয়া ভাষা জীয়াই ৰাখিবলৈ হ’লে অসমত বাস কৰা সকলো লোকে অসমীয়া ক’ব লাগিব বা ভাষাটো শিকা উচিত। নিজৰ মাতৃভাষাটোক শক্তিশালী বা শ্ৰদ্ধাশীল কৰিবলৈ হ’লে সকলো অভিভাৱকে কষ্ট কৰিব লাগিব। ভাষাটো জীয়াই ৰাখিবলৈ হ’লে বিশ্ববিদ্যালয়, মহাবিদ্যালয়, বিদ্যালয় আদি সকলোৱে দায়িত্বশীল হ’ব লাগিব বুলিও তেওঁ মন্তব্য কৰে।
অসম সাহিত্য সভাৰ সভাপতিগৰাকীয়ে অলপ আবেগিক ভাৱে কয় যে বহুতে সাহিত্য সভাক ক্লাব ঘৰ বুলি ভাবে। যিসকলৰ মনত এনেধৰণৰ ভাবধাৰা সোমাই আছে তেওঁলোকে জনা উচিত যে অসম সাহিত্য সভাৰ বাবেই গুৱাহাটী বিশ্ববিদ্যালয়ৰ দৰে মহান তথা ঐতিহ্যপূৰ্ণ শিক্ষানুষ্ঠানৰ জন্ম হৈছে।
শংকৰদেৱ একাডেমিৰ প্ৰতিষ্ঠা দিৱসৰ এই সভাত নলবাৰী মহাবিদ্যালয়ৰ অধ্যক্ষ ড০ দীপক কুমাৰ গোস্বামী, অভিনেত্ৰী স্বাগতা বৰুৱা, গুৱাহাটী উচ্চ ন্যায়ালয়ৰ অধিবক্তা ড০ ননী গোপাল গোস্বামী, শিক্ষানুষ্ঠানখনৰ অধ্যক্ষ ড০ ৰামপ্ৰসাদ ভট্টৰ লগতে শিক্ষক-শিক্ষয়িত্ৰী আৰু ছাত্ৰ-ছাত্ৰীসকল উপস্থিত থাকে।