নগাঁৱৰ চকলাঘাট দৰঙীয়াল গাঁৱত কোম্পানীৰ এজেন্ট হিচাপে অহা এজন লোকে আজি দিন-দুপৰতে এটা মোবাইল চুৰি কৰি ৰাইজৰ হাতত ধৰা পৰা ঘটনাই অঞ্চলজুৰি তীব্র চাঞ্চল্যৰ সৃষ্টি কৰিছে।
এগৰাকী মহিলাৰ এটা চেমচাঙ মোবাইল চুৰি কৰাৰ অপৰাধত ৰাইজে ধৰা পেলালে কোম্পানীৰ এজেন্টৰ ৰূপত সামগ্ৰী বিক্ৰী কৰিবলৈ অহা চোৰটোক। প্ৰিঞ্চ মাৰকেটিং নামৰ পঞ্জীয়নহীন কোম্পানীৰ এজেন্টৰূপী ধৃত চোৰটো নগাঁৱৰ তেলীয়াগাঁৱৰ প্ৰাঞ্জল দাস ওৰফে বিকি দাস বুলি চিনাক্ত কৰা হৈছে।
ঘটনাৰ সবিশেষ জানিব পৰা মতে, দৰঙীয়াল গাঁৱৰ উপেন ভূঞা নামৰ লোক জনৰ ঘৰত দুপৰীয়া উপস্থিত হৈছিল এই চোৰটো। প্ৰথমে নিজকে এটা কোম্পানীৰ এজেন্টৰূপে চিনাকি দি গৃহস্থক দিছিল এখন ভাগ্য পৰীক্ষাৰ টিকট। গৃহস্থই টিকটটো মচি চোৱাত তাত লিখা থকা দেখা পাইছিল এটা মিক্সাৰ গ্ৰাইন্ডাৰ।
চোৰটোৱে গৃহস্থক ৩০০০ টকা মূল্যৰ মিক্সাৰটো মাত্ৰ ১৭০০ টকাৰ বিনিময়ত প্ৰদান কৰিব বুলি কোৱাত মিক্সাৰটো কিনিবলৈ উদ্যত হৈছিল গৃহস্থ। পিছে এনেতে উপেন ভূঞাৰ ৱোৱাৰীয়েকৰ হাতত এটা দামী স্মাৰ্টফোন দেখি চোৰটোৱে ছলেৰে মহিলাগৰাকীক পানী পিয়াহ লগা বুলি কয়। মহিলাগৰাকীয়ে মোবাইলটো বাহিৰৰ এখন টেবুলতে ৰাখি ভিতৰলৈ পানী আনিবলৈ যাওতেই চোৰটোৱে মোবাইলটো লৈ উধাও হয়।
পিছত মহিলাগৰাকী আহি চোৰটোৰ লগতে মোবাইল ফোনটো নেদেখাত হৈ চৈ লগাই আৰু ততাতৈয়াকৈ সেই স্থানত পৰিয়ালৰ লোক আৰু স্থানীয় ৰাইজ উপস্থিত হয়। স্থানীয় লোক সমগ্ৰ ঘটনা অৱগত হোৱাত চোৰটোক বিছাৰি অভিযান আৰম্ভ কৰে আৰু গাঁৱৰ কিছু দূৰৈত চোৰটোক কৰায়ত্ত কৰাৰ লগতে উত্তম-মধ্যম শোধায় জাজৰি আৰক্ষীক গতাই দিয়ে।
আৰক্ষীয়ে লগতে চোৰটোৰ লগত এজেন্ট ৰূপে অহা অন্য দুজন ব্যক্তিকো কৰায়ত্ত কৰি সম্প্ৰতি জেৰা চলাই আছে। এতিযা এই ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।
