যোৱা ৩০ জুলাইত অসমত ৰাষ্ট্ৰীয় নাগৰিক পঞ্জীৰ চূড়ান্ত খচৰা প্ৰকাশ পোৱাৰ পিছত প্ৰকৃত ভাৰতীয় নাগৰিকৰ নাম অন্তৰ্ভুক্ত নোহোৱা বুলি চিঞৰ বাখৰ কৰি পশ্চিমবংগৰ মুখ্যমন্ত্ৰী তথা তৃণমূল কংগ্ৰেছৰ মুৰব্বী মমতা বেনাৰ্জীয়ে একমাত্ৰ ৰাজনৈতিক ব্যক্তি হিচাপে পৰিগণিত হৈ পৰিছে।
কিন্তু দ্য ইণ্ডিয়ান এক্সপ্ৰেছ কাকতত লালমনি বাৰ্মাই লিখা এক প্ৰতিবেদনত অনুপ্ৰৱেশকলৈ মমতা বেনাৰ্জীয়ে পূৰ্বতে গ্ৰহণ কৰা স্থিতি সম্পৰ্কত কিছু বিস্ফোৰক তথ্য উদঙাই দিছে।
প্ৰতিবেদনখন মতে, প্ৰায় ১৩ বছৰ আগতে যেতিয়া বাওঁমৰ্চা শাসিত পশ্চিমবংগৰ পৰা তেওঁৰ দলৰ লোকসভাত একমাত্ৰ সাংসদ হিচাপে নিৰ্বাচিত হৈ আহিছিল, তেতিয়া তেওঁ সংসদৰ নিম্ন সদনত ‘বেংগলত অনুপ্ৰৱেশ’ সম্পৰ্কত ২২ মিনিটত ১৪ বাৰ বিষয়টো উত্থাপন কৰিছিল।
প্ৰতিবেদনত লোকসভাৰ উদ্ধৃতিৰে উল্লেখ কৰা হৈছে যে ২০০৫ চনৰ ৪ আগষ্টত বেনাৰ্জীয়ে সদনত কৈছিল যে এইটো ‘এটা অতি জটিল বিষয়’ যিয়ে বাংলাদেশীৰ লগতে ভাৰতীয়ৰ নাম ভোটাৰ তালিকাত অন্তৰ্ভুক্ত হোৱালৈ চাই এক ‘ধুমুহা’ৰ সংকেত বহন কৰিছে।
ইণ্ডিয়ান এক্সপ্ৰেছৰ প্ৰতিবেদনখনত উল্লেখ কৰা হৈছে যে সেই সময়ত প্ৰথম ইউপিএ চৰকাৰক সমৰ্থন কৰা পশ্চিমবংগৰ চিপিআই(এম)ৰ সাংসদ বাসুদেব আচাৰ্যই মমতাক বাৰে বাৰে বাধা দিছিল।
প্ৰতিবেদনখনত লগতে উল্লেখ কৰা হৈছে যে যেতিয়া সেইসময়ৰ লোকসভাৰ উপাধ্যক্ষ চৰনজিৎ সিং অটৱালে অধ্যক্ষ সোমনাথ চেটাৰ্জীয়ে ইতিমধ্যে তেওঁৰ বিষয়টো অগ্ৰাহ্য কৰিছে বুলি কৈ উত্থাপন কৰিব দিয়া নাছিল, মমতাই তেতিয়া তেওঁ হাতত লৈ থকা কাগজ পত্ৰখিনি অধ্যক্ষৰ চকীৰ পিনে দি দলিয়াই দি সদনৰ পৰা ক্ষুব্ধ হৈ ওলাই গৈছিল।
সেই বছৰৰে জুলাই মাহৰ ২৬ তাৰিখে বিজেপি নেতা এল কে আদৱানিয়ে ‘বাংলাদেশৰ পৰা ব্যাপক অবৈধ অনুপ্ৰৱেশৰ’ বিষয়ে আলোচনাৰ বাবে এটা সভা স্থগিত প্ৰস্তাৱ আনিছিল। কিন্তু মমতা সেইদিনা তাত উপস্থিত নথকাৰ বাবে বি,য়টো আঠদিন পিছত উত্থাপন কৰিব বিচাৰিছিল।
প্ৰতিবেদনত লগতে বিস্তৃতভাৱে উল্লেখ কৰা হৈছে যে উচ্চতম ন্যায়ালয়ে সৰ্বানন্দ সোণোৱাল বনাম ভাৰত চৰকাৰ আৰু অন্যান্যৰ মাজৰ গোচৰটোৰ ৰায়দানৰ সম্পূৰ্ণ দুসপ্তাহ পিছত আলোচনাৰ বাবে এই পদক্ষেপ গ্ৰহণ কৰা হৈছিল। আই এম ডি টি আইন, ১৯৮৩’ বাতিল কৰি উচ্চতম ন্যায়ালয়ে বিদেশী (ন্যায়াধীকৰণ) ৰায় ১৯৬৪’ৰ অধীনত ‘পৰ্যাপ্ত সংখ্যক ন্যায়াধীকৰণ’ গঠন কৰিবলৈ নিৰ্দেশ দিছিল যাতে বাংলাদেশৰ পৰা অবৈধভাৱে প্ৰৱেশ কৰা বা অবৈধভাৱে অসমত বাস কৰা বিদেশীৰ গোচৰসমূহ কাৰ্যকৰীভাৱে মোকাবিলা কৰিব পাৰে।
সেই সময়ত সৰ্বানন্দ সোণোৱাল সংসদত অসম গণ পৰিষদৰ সাংসদ আছিল।
কিন্তু এতিয়া মমতাই অসমত এন আৰ চিৰ চূড়ান্ত খচৰাখন প্ৰকাশ পোৱাৰ পিছতে সম্পূৰ্ণ বিপৰীত স্থিতি গ্ৰহণ কৰিছে।
ইণ্ডিয়ান এক্সপ্ৰেছৰ এই প্ৰতিবেদনখনে ২০০৫ চনত মাথোঁ সাংসদ হৈ থকা আৰু ২০১৮ ত পশ্চিমবংগৰ মুখ্যমন্ত্ৰী হৈ থকা মমতা বেনাৰ্জীৰ দুমুখীয়া স্থিতি উদঙাই দিছে।
