দুলীয়াজান ফুটবল একাডেমীয়ে অহা ৪ ফেব্ৰুৱাৰীৰ পৰা দুলীয়াজান ফুটবল একাডেমীৰ খেলপথাৰত ৰাজ্যখনৰ ৫,২০১৮ গৰাকী উদিয়মান ফুটবল খেলুৱৈৰ বাবে টাটা ফুটবল একাডেমীলৈ নিৰ্বাচনৰ উদ্দেশ্যে এক নিৰ্বাচনী প্ৰক্ৰিয়াৰ আয়োজন কৰিছে।
টাটা ফুটবল একাডেমীয়ে একাডেমীলৈ খেলুৱৈ অন্তৰ্ভুক্ত কৰাৰ প্ৰক্ৰিয়া আৰম্ভ কৰিছে।
দুলীয়াজান ফুটবল একাডেমীৰ সভাপতি মাধব বুঢ়াগোঁহাইয়ে কয় যে যোৱা ২০১৭ চনৰ ২৪ নৱেম্বৰৰ পৰাই প্ৰতিভাৱান খেলুৱৈক টাটা ফুটবল একাডেমীলৈ নিৰ্বাচন কৰাৰ বাবে ঝাৰখণ্ডৰ ৰাঁচীত প্ৰক্ৰিয়াটো আৰম্ভ হৈছিল।
‘’দুলীয়াজান ফুটবল একাডেমীয়ে অসমৰ নিৰ্বাচন প্ৰক্ৰিয়াৰ বাবে খেলুৱৈ নিৰ্বাচিত কৰিছে। আমি গৌৰৱান্বিত যে টাটা ফুটবল একাডেমীয়ে প্ৰক্ৰিয়াটোৰ বাবে আমাৰ খেলপথাৰখন নিৰ্বাচিত কৰিছে। প্ৰাথমিকভাৱে নিৰ্বাচিত খেলুৱৈসকলে চূড়ান্ত নিৰ্বাচনৰ বাবে জামছেদপুৰলৈ যাব লাগিব,’’-বুঢ়াগোঁহাইয়ে কয়।
তেওঁ লগতে কয় যে টাটা একাডেমীলৈ নিৰ্বাচনৰ প্ৰক্ৰিয়াটো অত্যন্ত প্ৰতিযোগিতামূলক আৰু গোটেই দেশৰে কিছু সংখ্যক শ্ৰেষ্ঠ প্ৰতিভাক আকৰ্ষণ কৰে।
প্ৰাৰ্থীসকলক তেওঁলোকৰ প্ৰদৰ্শনত মেচৰ পৰিস্থিত, কাৰিকৰী দক্ষতা, কৌশলগত সজাগতা আৰু শাৰিৰীক সক্ষমতা পৰীক্ষা কৰা হয়।
‘’ টাটা ফুটবল একাডেমীত নিৰ্বাচনৰ প্ৰক্ৰিয়াৰ বাবে ৰাজ্যখনৰ উদিয়মান খেলুৱৈসকলে তেওঁলোকৰ দক্ষতা প্ৰদৰ্শন কৰিব লাগিব। আমাৰ কিছুসংখ্যক যুৱ ফুটবলাৰে অতি উৎসাহী হৈ পৰিছে আৰু নিৰ্বাচন প্ৰক্ৰিয়াৰ বাবে কঠোৰ অনুশীলন চলাইছে,’’-দুলীয়াজান ফুটবল একাডেমীৰ সম্পাদক জিতু ছেত্ৰীয়ে নৰ্থ ইষ্ট নাওৰ আগত এনেদৰে কয়। তেওঁ লগতে কয় যে ‘ৱিনিত ৰাই চামলিং দুলীয়াজান ফুটবল একাডেমীৰ পৰাই যোৱা আৰু তেঁৱো টাটা ফুটবল একাডেমীলৈ নিৰ্বাচিত হৈছিল। এতিয়া তেওঁ আইএছএলত দিল্লী ডায়নামোছৰ হৈ খেলি আছে।‘’
ছেত্ৰীয়ে কয় যে উত্তৰ পূৰ্বাঞ্চলৰ পৰা যোৱা ফুটবল খেলুৱৈসকলে ভাল ফুটবল খেলেৰে ৰাষ্ট্ৰীয় পৰ্যায়ত ভাল প্ৰদৰ্শন আগবঢ়াবলৈ সক্ষম হৈছে।
তেওঁ লগতে কয় যে যিসকল খেলুৱৈয়ে প্ৰক্ৰিয়াটোত যোগদান কৰিবলৈ ইচ্ছুক তেওঁলোকে নিজৰ স্কুলৰ প্ৰমান পত্ৰ আৰু আন গুৰুত্বপূৰ্ণ নথি লগত লৈ আহিব লাগিব।
