ভাৰতৰ অন্যতম পথ নিৰ্মাণকাৰী সংস্থা টি কে ইঞ্জিনিয়াৰিং কনছৰ্টিয়াম প্ৰাইভেট লিমিটেডৰ উদ্যোগত বিশ্বনাথত আজি এক বিশেষ অভিনন্দন অনুষ্ঠানৰ আয়োজন কৰা হয়।
বিশ্বনাথ, বিহালী, গহপুৰ, চতিয়া, জামুগুৰি অঞ্চলৰ ৮০% বা ততোধিক নম্বৰ লাভ কৰি উচ্চ মাধ্যমিক শিক্ষান্ত পৰীক্ষাত উত্তীৰ্ণ হোৱা ৪২গৰাকীকৈ দুখীয়া পৰিয়ালৰ মেধাবী ছাত্ৰ-ছাত্ৰীক টি কে ইঞ্জিনিয়াৰিং কনছৰ্টিয়ামৰ তৰফৰপৰা সম্বৰ্ধনা জনোৱা হয়।
বিশ্বনাথ মহাবিদ্যালয়ৰ ‘অগ্নিকবি কমলাকান্ত প্ৰেক্ষাগৃহ’ত অনুষ্ঠিত হোৱা সম্বৰ্ধনা অনুষ্ঠানত সভাপতিত্ব কৰে শিক্ষাবিদ, সমাজকৰ্মী জীতেন ভাগৱতীয়ে। সম্বৰ্ধিত প্ৰতিগৰাকী ছাত্ৰ-ছাত্ৰীক কিতাপৰ টোপোলা, মানপত্ৰ, ছাতি, কলম আৰু ১০, ০০০ টকাৰ সাহায্য প্ৰদান কৰা হয়।
আনহাতে, এই অনুষ্ঠানত দুগৰাকী বিশেষভাবে সক্ষম ছাত্ৰীক অভিনন্দন জনোৱাৰ লগতে ১০,০০০ টকাকৈ আৰ্থিক সাহায্য প্ৰদান কৰে। তাৰোপৰি বিশ্বনাথ জিলাৰ সদ্যপ্ৰয়াত এগৰাকী সাহসী যুৱ সাংবাদিক আৰিফ হলদাৰৰ পত্নীক ২৫, ০০০ টকাৰ এককালীন আৰ্থিক সাহায্য প্ৰদান কৰে। সাহায্য গ্ৰহণৰ সময়ত সদ্যপ্ৰয়াত সাংবাদিকৰ পত্নী শোকত ভাগি পৰি উচুপি উঠে।
সম্বৰ্ধনা অনুষ্ঠানত ছাত্ৰ-ছাত্ৰীসকল উৎফুল্লিত হোৱাৰ লগতে অভিভাৱকসকলে টি কে ইঞ্জিনিৰিং কৰ্তৃপক্ষক ধন্যবাদ জনায়। গোলাপ হাজৰিকাই আঁত ধৰা সম্বৰ্ধনা অনুষ্ঠানত অংশ গ্ৰহণ কৰে পথ নিৰ্মাণকাৰী সংস্থাটোৰ সঞ্চালক তাৰা তেচি, ছয়দুৱাৰ মহাবিদ্যালয়ৰ অধ্যক্ষ অঞ্জন কুমাৰ ওজা, বিশ্বনাথৰ উপায়ুক্ত ধীৰাজজ্যোতি কলিতা, পথ নিৰ্মাণকাৰী সংস্থাৰ শীৰ্ষ বিষয়া আদিকে কৰি বিভিন্ন জাতীয় সংগঠনৰ কেন্দ্ৰীয় নেতৃবৃন্দই।