বাংলাদেশৰ এজন শীৰ্ষ সন্ত্ৰাসবাদী নেতাক গ্ৰেপ্তাৰ কৰিবলৈ সক্ষম হৈছে ভাৰতৰ ৰাষ্ট্ৰীয় তদন্তকাৰী সংস্থা (National Investigations Agency)। বেংগালুৰু নগৰত সোমবাৰে নিশা জহিদ উল ইছলাম ওৰফে বমাৰু মিজানক আটক কৰে তদন্তকাৰী সংস্থাটোৱে।
গ্ৰেপ্তাৰ সন্দৰ্ভত নিয়াৰ বিষয়াই মুখ খুলিব নুখুজিলেও জহিদ উল ইছলামৰ লগতে তেওঁৰ সহযোগীসকলৰ পিছ লোৱাৰ ক্ষেত্ৰত তদন্তকাৰী সংস্থাটোৱে গোপন সূত্ৰৰ সহায়ত আগবাঢ়িছিল বুলি ধাৰণা কৰা হৈছে। গ্ৰেপ্তাৰ সন্দৰ্ভত অৱগত কৰা আৰু উগ্ৰপন্থীজনৰ পৰিচয় পৰীক্ষা কৰাৰ বাবে তেওঁলোকক অনুৰোধ জনোৱা হৈছে বুলি বাংলাদেশৰ কূটনৈতিক বিষয়াই নৰ্থ ইষ্ট নাও-ক নিশ্চিত কৰিছে।
আদালতলৈ নি থকা অৱস্থাত প্ৰিজন ভেনৰ পৰা বাংলাদেশৰ মৈমনসিং জিলাৰ ত্ৰিশালৰ পৰা জহিদ উলক ২০১৪ চনৰ ২৩ ফেব্ৰুৱাৰিত তেওঁৰ জামাত উল মুজাহিদিনৰ সতীৰ্থই পলুৱাই নিছিল।
ভেনখনৰ পৰা পলাওঁতে বাংলাদেশ আৰক্ষীয়ে এজন সন্ত্ৰাসবাদীক গুলীয়াই মৰাৰ লগতে আন এজনক আটক কৰিছিল যদিও জহিদ উলে প্ৰথমে অসমলৈ আৰু পিছত পশ্চিম বংগলৈ পলায়ন কৰিবলৈ সক্ষম হৈছিল।
তেতিয়াৰে পৰা ভাৰততে পলাই আছিল জামাত উল মুজাহিদিনৰ এই দুৰ্ধৰ্ষ ব’মা বিশেষজ্ঞজন। দক্ষিণ ভাৰতত আত্মগোপন কৰি থকা বুলি সম্ভেদ পোৱাৰ পৰাই যোৱা দুমাহত জহিদ উলক ধৰিবলৈ নিয়াই ব্যাপক অভিযান চলাই আহিছিল।
