কালি ঘোষিত হাইস্কুল চুড়ান্ত পৰীক্ষাত হোজাই জিলাৰ নীলবাগানৰ নাইমা ফিৰদৌছে ৰাজ্যৰ ভিতৰতে দশম স্থান দখল কৰিবলৈ সক্ষম হয়। নীলবাগানৰ বাসিন্দা এনাম উদ্দিন বৰভূঞা আৰু হাবিবা বেগমৰ একমাত্ৰ কন্যা নাইমা ফিৰদৌছ বৰভূঞাই দশম স্থান দখল কৰাত সমগ্ৰ নীলবাগান অঞ্চলৰ লগতে তাই অধ্যয়ন কৰা স্কুলখনত আনন্দৰ বন্যা বৈছে।
নীলবাগান জাতীয় বিদ্যালয়ৰ সাফল্যই বিদ্যালয়খনৰ শিক্ষক শিক্ষয়িত্ৰী আৰু ছাত্ৰ-ছাত্ৰীৰ লগতে সমগ্ৰ অঞ্চলটোৰ ৰাইজৰ মাজত উৎসৱ মুখৰ পৰিৱেশৰ সৃষ্টি কৰিছে। ফলাফল ঘোষণা হোৱাৰ পিছতেই বিদ্যালয়খনৰ ছাত্ৰ-ছাত্ৰীয়ে ফটকা ফুটাই আনন্দোল্লাস প্ৰদৰ্শন কৰে।
ছাত্ৰীগৰাকীয়ে অসমীয়াত ৯২, ইংৰাজীত ৯৮, সাধাৰণ বিজ্ঞানত ১০০, গণিতত ১০০, সমাজ বিজ্ঞানত ৯৮ আৰু ভুগোলত ৯৬ নম্বৰৰে মুঠ ৫৮৪ লাভ কৰি অসমৰ ভিতৰতে দশম স্থান দখল কৰাত বিদ্যালয়খনৰ অধ্যক্ষ আব্দুছ ছালামৰ লগতে সকলো কেইজন শিক্ষজন শিক্ষয়িত্ৰীৰ মুখত হাহি বিৰিঙা দেখা যায় ।
সমগ্ৰ হোজাই জিলাৰ পৰা ৰাজ্যৰ ভিতৰতে স্থান দখল কৰা একমাত্ৰ শিক্ষাৰ্থী হ’ল নাইমা ফিৰদৌছে। ভৱিষ্যতে নগাঁৱৰ ৰামানুজ জুনিয়ৰ কলেজত অধ্যয়ন কৰিব বিচৰা নাইমা ফিৰদৌছ এগৰাকী সূ-চিকিৎসক হোৱাৰ সপোন পুহি ৰাখিছে।
ঘৰুৱা শিক্ষকৰ সহায় লৈ দৈনিক ৮/৯ ঘন্টাকৈ অধ্যয়ন কৰা নাইমা ফিৰদৌছে ফলাফলৰ পিছত উৎফুল্লিত হৈ পৰিছে। তাইৰ সফলতাৰ আঁৰত পিতৃ-মাতৃৰ আৰু শিক্ষাগুৰু সকলৰ অৱদানৰ কথা স্বীকাৰ কৰে।
নীলবাগানৰ দৰে সৰু অঞ্চলটোৰ পৰা ছাত্ৰী গৰাকীয়ে এনেদৰে সফলতা অৰ্জন কৰাত অঞ্চলবাসী আনন্দত আত্মহাৰা হোৱাৰ উপৰিও ছাত্ৰ মুক্তি সংগ্ৰাম সমিতি, ‘যুৱ সমাজ’ নীলবাগান, নীলবাগান শাখা কবি সম্মিলন, আছু, আমছুকে ধৰি বহুকেইটা দল সংগঠনে ছাত্ৰ গৰাকীক অভিনন্দন জনায়।
