পশ্চিমবংগৰ মুখ্য মন্ত্ৰী মমতা বেনাৰ্জীয়ে এন আৰ চিৰ চূড়ান্ত খচৰা প্ৰকাশ পোৱাৰ পাছতে এন আৰ চিৰ বিৰোধীতাৰে মন্তব্য কৰাক লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হোৱাৰ সমান্তৰালভাৱে সৰৱ হৈ পৰিছে অগপ সভাপতি অতুল বৰা আৰু পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতা।
উল্লেখযোগ্য যে সংবাদমাধ্যমলৈ প্ৰেৰণ কৰা এক প্ৰেছ বিজ্ঞপ্তিযোগে অগপৰ সভাপতি গৰাকীয়ে কয় যে তৃণমূল কংগ্ৰেছৰ নেত্ৰী তথা পশ্চিমবংগৰ মুখ্য মন্ত্ৰী মমতা বেনাৰ্জীয়ে চৰম অজ্ঞতা আৰু অসহিষ্ণুতাৰ পৰিচয় দি বিভাজনমূলক আৰু দায়িত্বজ্ঞানহীন মন্তব্য আগবঢ়াইছে।
তেওঁ লগতে কয় ‘পশ্চিমবংগৰ দৰে এখন ৰাজ্যৰ মুখ্য মন্ত্ৰীৰ চকীখনত বহি মমতা বেনাৰ্জীয়ে এন আৰ চি ৰ আলম লৈ অসমীয়া আৰু বঙালীৰ বিভাজন আনিব বিচৰাটো অতি উদ্বেগজনক।’
ইয়াৰোপৰি ‘এন আৰ চি প্ৰক্ৰিয়াত কাৰ কি ধৰ্ম অথবা কোন কোনটো জাতিৰ মানুহ , এই প্ৰশ্ন কেতিয়াও অহা নাই আৰু নাহে’ এইবুলি বিজ্ঞপ্তিত সদৰী কৰি তেওঁ মমতা বেনাৰ্জীক প্ৰশ্ন কৰি কয়, ‘এনে স্থলত মমতা বেনাৰ্জীৰ দৰে নেত্ৰীয়ে ইয়াৰ আলম লৈ অসমীয়া আৰু বঙালী সমাজৰ সাতামপুৰুষীয়া সম্প্ৰীতি বিনষ্ট কৰাৰ আঁৰত কি উদ্দেশ্য নিহিত হৈ আছে?’
আনহাতে অগপ সভাপতিগৰাকীয়ে দেশৰ বিভিন্ন প্ৰান্তত একাংশ ৰাজনৈতিক দলে এন আৰ চিৰ বিৰুদ্ধে এক অনাকাংক্ষিত পৰিবেশৰ সৃষ্টি কৰা বুলি জানিবলৈ দি কয় ‘এয়া অসমীয়া মানুহৰ প্ৰতি তেওঁলোকৰ চুড়ান্ত অপমান তথা অসমৰ ৬ বছৰীয়া আন্দোলনখনৰ প্ৰতি চৰম ভেঙুচালি।’
‘তেওঁলোক অসমৰ সংগ্ৰামী ইতিহাসৰ বিষয়ে অজ্ঞ নেকি? নে সংকীৰ্ণ ৰাজনীতিৰ স্বাৰ্থত, ভোট বেংকৰ মোহত তেওঁলোকে এন আৰ চি খন নস্যাৎ কৰিছে?’ প্ৰশ্ন অতুল বৰাৰ।
ইফালে অসমবাসীৰ স্বাৰ্থৰ ক্ষেত্ৰত অসমৰ সমস্যাক দেশৰ সমস্যা বুলি ভাবি ল’বলৈ উক্ত ৰাজনৈতিক দলসমূহক আহ্বান জনাই তেওঁ কয় ‘অসমৰ দীৰ্ঘদিনীয়া ভয়াবহ সমস্যাৰ বিষয়ে উপলব্ধি নকৰাকৈ আৰু অসম সম্পৰ্কত সামান্যতম জ্ঞান নথকাকৈ সস্তীয়া ৰাজনীতি কৰাৰ পৰা বিৰত থাকক।’
আনহাতে অগপ দলৰে বিধায়ক ৰমেন্দ্ৰ নাৰায়ণ কলিতাই মমতা বেনাৰ্জীয়ে এন আৰ চিক লৈ ৰখা বক্তব্যক অসমবাসীৰ বাবে দুৰ্ভাগ্যজনক বুলি আখ্যা দিয়াৰ লগতে কয় ‘সকলোৱে লক্ষ্য কৰিছে যে প্ৰায় ৪০ লাখতকৈ অধিক লোকৰ নাম এন আৰ চিৰ পূৰ্ণাংগ খচৰাৰ পৰা বাদ পৰিছে, তাৰ পাছতো নাম বাদ পৰা কোনো লোকে অশান্তিকৰ পৰিস্থিতিৰ সৃষ্টি কৰা নাই।’
তাৎপৰ্য্যপূৰ্ণভাৱে শান্তিপূৰ্ণ পৰিবেশ বজাই ৰখাৰ বাবে নাম বাদ পৰা ৪০ লাখৰো অধিক লোকক ৰমেন্দ্ৰ নাৰায়ণ কলিতাই সংবাদ মাধ্যমৰ জৰিয়তে ধন্যবাদ জ্ঞাপন কৰে।
আনহাতে অসমৰ যিটো জলন্ত সমস্যা সেইটো সমাধানৰ দিশত গৈ আছে, তণমূল কংগ্ৰেছৰ নেত্ৰী মমতা বেনাৰ্জীয়ে কলিকতাত থাকি কৰা তেনে ধৰণৰ বক্তব্য বা উক্তিয়ে নিশ্চয় অসমত এক অশান্তিৰ সৃষ্টি কৰাৰ লগতে এক ষড়যন্ত্ৰ সৃষ্টি কৰিছে বুলি মন্তব্য কৰে কলিতাই।
অৱশ্যে ‘অসমৰ কোনো লোকে এই ষড়যন্ত্ৰত ভৰি নিদিয়ে।’ বুলি সদৰী কৰি তেওঁ লগতে কয় ‘যুগ যুগান্তৰৰ পৰা অসমত জাতি-ধৰ্ম-বৰ্ণ নিৰ্বিশেষে ঐক্য আৰু সম্প্ৰীতিৰে বসবাস কৰি আহিছে। গতিকে তেনেধৰণৰ বক্তব্যই অসমত কোনোধৰণৰ প্ৰভাব নেপেলায়। অসমৰ মানুহ ৰাজনৈতিকভাৱে যথেষ্ট সচেতন।’
গতিকে মমতা বেনাৰ্জীক সংবাদমাধ্যমৰ জৰিয়তে সকীয়াই দি অসমৰ অভ্যন্তৰীণ বিষয়ত ভৱিষ্যতে কোনোধৰণৰ পৰোচনামূলক বক্তব্য নাৰাখিবৰ বাবে আহ্বান জনায়।
