ব্ৰাহ্মণক গৰু বলি দি খাবলে কোৱাৰ দৰে মুছলমানকো কাছ নাইবা গাহৰি কোৰবানি দি খাবলৈ ক’বলৈ জুবিন গাৰ্গক আজি ১৩ জুলাইত প্ৰত্যাহ্বান জনাইছে ‘কামাখ্যাৰ এগৰাকী মুখ্য পূজাৰী’ৰূপে পৰিচয় দিয়া অনুপ প্ৰসাদ শৰ্মাই।
‘তেওঁ (জুবিন গাৰ্গে) নাজানে কাক বলি দিয়া হয়, কাক বলি দিয়া নহয়। তেওঁ সৎ সাহস দেখুৱাই নক’লে যে মুছলমানসকলে কাছ নাইবা বৰাহ কোৰবানি কৰি খাই দেখুৱাওক,’ নৰ্থ ইষ্ট নাও-ৰ আগত মন্তব্য শৰ্মাৰ।
জুবিন গাৰ্গৰ ‘এই কথা ক’বলৈ সাহস নাই‘ বুলি দাবী কৰি কামাখ্যাৰ বাসিন্দা শৰ্মাই কয় ‘জুবিন গাৰ্গক খামিডাঠ মানুহ বুলি সকলোৱে ভাবে। কিন্তু তেওঁৰ খামিখন ডাঠ নহয়।’
জুবিন গাৰ্গক বলি বিধান আৰু শাস্ত্ৰৰ ওপৰত মুকলি তৰ্ক কৰিবৰ বাবে আহ্বান জনাই শৰ্মাই কয় ‘বলিবিধান আৰু ব্ৰাহ্মণৰ বিষয়ে জুবিনৰ কোনো জ্ঞানেই নাই।’ তেওঁ কয় যে জুবিন গাৰ্গে কোৱাৰ দৰে কামাখ্যাই বলি-বিধান নিবিচৰা নহয়, বৰঞ্চ কামাখ্যাই প্ৰতিদিনাই বলি বিচাৰে।
‘হোম যজ্ঞৰদ্বাৰা সূৰ্য্য সন্তুষ্ট হয়, গণেশ সন্তুষ্ট হয় মূদকৰ দ্বাৰা, বিষ্ণু সন্তুষ্ট হয় গীত-মাত-সংগীতৰ দ্বাৰা, শিৱ সন্তুষ্ট হয় ব্ৰতৰ দ্বাৰা আৰু দুৰ্গা গোঁসানী বা যিকোনো দেৱী সন্তুষ্ট হয় বলিৰ দ্বাৰা। এই শাস্ত্ৰত লিখাৰ কথাসমূহৰ ওপৰত ভিত্তি কৰিয়েই আমি কৈছো যে কামাখ্যা গোঁসানী বলিপ্ৰিয়া,‘ শৰ্মাৰ ব্যাখ্যা।
কামাখ্যাৰ এগৰাকী মুখ্য পূজাৰী হিচাপে পৰিচয় দি তেওঁ কয় ‘কামাখ্যাৰ বিধি ব্যৱস্থাত এই কথা স্পষ্টকৈ লিখা আছে যে কামাখ্যাত সদায়ে, নিত্যভাৱে বলি কৰিব লাগে। নিত্যবলি কামাখ্যাৰ অবিচ্ছেদ্দ্য অংগ। যদি বলি প্ৰিয় নহয়েই তেন্তে কামাখ্যাত বলি বিধান নাথাকিলেহেঁতেন।’
‘বলি মানে নিৰ্দয়ভাৱে হত্যা কৰা নহয়’ বুলিও শৰ্মাই মন্তব্য কৰে।
আনহাতে ‘নিজক অধিক চৰ্চাৰ মাজত আনিবৰ কাৰণে জুবিন গাৰ্গে আবোল-তাবোল বকা আৰম্ভ কৰিছে’ বুলি দাবী কৰি শৰ্মাই কয় যে ‘(জুবিনৰ) ব্ৰাহ্মণৰ ওপৰত জ্ঞানেই নাই, গতিকে ব্ৰাহ্মণক লৈ মন্তব্য কৰাটো চৰম বাতুলামি হ’ব।’
জুবিন গাৰ্গে কৰা প্ৰতিটো মন্তব্যৰ বিপৰীতে তেওঁ কৰা প্ৰতিক্ৰিয়াসমূহ সংবাদ মাধ্যমে প্ৰকাশ কৰা নাছিল বুলি অভিযোগ তুলি লেখক তথা জ্যেষ্ঠ সাংবাদিক বুলিও পৰিচয় দিয়া শৰ্মাই দাবী কৰে যে ‘সংবাদ মাধ্যমৰ কাৰণে জুবিন গাৰ্গ এটা হট কে’ক তথা পণ্য সামগ্ৰী। জুবিন গাৰ্গৰ কথা বেছিকৈ উলিয়াই দিলে টেলিভিছন চেনেলৰ টিআৰপি বাঢ়ে আৰু ছপা মাধ্যমৰ চাৰ্কুলে’শ্যন বৃদ্ধি হয়।’
উল্লেখযোগ্য যে গুৱাহাটীৰ কামাখ্যাত হোৱা এখন বিহুমেলাত ব্ৰাহ্মণ আৰু বলি-বিধান সম্পৰ্কে যুবিন গাৰ্গে তেওঁৰ মত প্ৰকাশ কৰিছিল।
