“ৰাজ্য চৰকাৰে চক্ৰান্তমূলকভাৱে প্ৰতীক হাজেলাৰ ওপৰত হেঁচা প্ৰয়োগ কৰি এখন শুদ্ধ এন আৰ চি হোৱাত বাধা দিব বিচাৰিছে। অসমৰ সকলো জাতীয়-জনগোষ্ঠীয় সংগঠন আৰু সকলো জাতি-ধৰ্মৰ লোকে এখন শুদ্ধ এন আৰ চি বিচৰাৰ পৰিৱৰ্তে বিজেপি আৰু তেওঁলোকৰ চেলা-চামুণ্ডাই এখন শুদ্ধ এন আৰ চি নিবিচাৰে। এইদৰে বিজেপিৰ বিৰুদ্ধে এন আৰ চি প্ৰক্ৰিয়াত ব্যাঘাত জন্মোৱাৰ অভিযোগ আনি আজি সৰৱ হয় এ আই য়ু ডি এফৰ সাধাৰণ সম্পাদক আমিনুল ইছলাম।
আজি দলটোৰ মুখ্য কাৰ্যালয়ত এখন সংবাদমেল অনুষ্ঠিত কৰি এই অভিযোগ অনাৰ লগতে আমিনুল ইছলামে কয় যে এখন শুদ্ধ এন আৰ চি প্ৰকাশ পালে বিজেপিযে সাম্প্ৰদায়িক বিষবাষ্প বিয়পাব নোৱৰা হ’ব। অসমত সন্ত্ৰাসজৰ্জৰ আৰু সমস্যাজৰ্জৰ পৰিৱেশ সৃষ্টি কৰাৰ বাবে বিজেপিয়ে চেষ্টা কৰি থকা বুলিও তেওঁ মন্তব্য কৰে।
মন্ত্ৰী হিমন্ত বিশ্ব শৰ্মাকে ধৰি প্ৰায় ১০-১২জন বিজেপি বিধায়কে ৩০ জুনত এন আৰ চিৰ চূড়ান্ত খচৰা প্ৰকাশৰ পাছতহে নাগৰিকত্ব সংশোধনী বিধেয়ক সন্দৰ্ভত মন্তব্য কৰিব বুলি কোৱা কথাত সন্দেহ ব্যক্ত কৰি ইছলামে কয়, “ৰাজ্য চৰকাৰ আৰু বিজেপি দলে এন আৰ চিৰ চূড়ান্ত খচৰাৰ পৰা প্ৰায় ৩০-৪০ লাখ মুছলমান লোকৰ নাম বাদ পেলোৱাৰ চেষ্টা চলাই আছে। ইয়াৰ জৰিয়তে বৃহৎ সংখ্যক মুছলমান বিদেশী অসমত প্ৰৱেশ কৰা দেখুৱাই হিন্দু বিদেশী আনি ইয়াৰ ভাৰসাম্য স্থাপনত জোৰ দিব বিজেপিয়ে।”
ইয়াৰ উপৰি আমিনুল ইছলামে যোৱা ২ মে’ত এন আৰ চিৰ ৰাজ্যিক সমন্বয়ক প্ৰতীক হাজেলাই এখন জাননীযোগে বিদেশী হিচাপে চিনাক্ত হোৱা ব্যক্তিৰ ভাতৃ, ভগ্নী আৰু পৰিয়ালৰ সদস্যৰ নাম এন আৰ চিত অন্তৰ্ভুক্ত নকৰিবলৈ নিৰ্দেশ জাৰি কৰা বিষয়টো উত্থাপন কৰি তেওঁ কয়, “মহামান্য উচ্চতম ন্যায়ালযে এন আৰ চি প্ৰক্ৰিয়াত কোনো পক্ষৰে হস্তক্ষেপৰ অনুমতি নিদিয়াৰ পাছতো প্ৰতীক হাজেলাই এই নিৰ্দেশ কেনেকৈ দিব পাৰিলে?”
লগতে পঞ্চায়তৰ প্ৰমাণপত্ৰ উচ্চতম ন্যায়ালযে বৈধ বুলি কোৱাৰ পাছতো এন আৰ চি কৰ্তৃপক্ষই ইয়াক গ্ৰহণ নকৰাক লৈও ইছলাম আজিৰ সংবাদমেলত সৰৱ হয়। ইয়াৰ উপৰি জন্মৰ প্ৰমাণপত্ৰত জন্মৰ তাৰিখৰ বিসংগতি থাকিলেও এন আৰ চিত নাম অন্তৰ্ভুক্ত নহয় বুলি এন আৰ চি কৰ্তৃপক্ষই দিয়া নিৰ্দেশনাৰ বিৰোধিতা কৰে। উচ্চতম ন্যায়ালয়ৰ এনে কোনো নিৰ্দেশনা নথকাৰ পাছতো ৰাজ্য চৰকাৰ আৰু এন আৰ চি কৰ্তৃপক্ষই এই সিদ্ধান্ত লৈছে আৰু ইয়াৰ জৰিয়তে উচ্চতম ন্যায়ালয়ক অৱমাননা কৰা হৈছে বুলিও তেওঁ মন্তব্য কৰে।
আমিনুল ইছলামে জানিবলৈ দিয়া অনুসৰি এ আই য়ু ডি এফ-এ এই সন্দৰ্ভত উচ্চতম ন্যায়ালয়ৰ কাষ চাপিছে। তেওঁ লগতে জন্মৰ পঞ্জীয়নৰ সময়ত চৰকাৰী কাৰ্যালয়তে ভুল কৰে, তাৰ বাবে জনসাধাৰণ ভুক্তভোগী কিয় হ’ব বুলি এই জন্ম তাৰিখৰ বিসংগতিত গুৰুত্ব দিয়া বিষয়টোৰ বিৰোধিতা কৰে আৰু গাওঁবুঢ়াৰ প্ৰমাণপত্ৰ বৈধ নোহোৱা বিষয়টোত গাওঁবুঢ়া চৰকাৰে নিয়োগ কৰা নহয় নেকি বুলিও প্ৰশ্ন কৰে।
