২০১৭ চনৰ ছেপ্টেম্বৰত ১১ মাহৰ বাবে ‘ফিক্সড’ দৰমহাত নিম্ন আৰু উচ্চ প্ৰাথমিক বিদ্যালয়ত ‘ষ্টেট পুল’ আঁচনিৰ জৰিয়তে নিযুক্তি দিয়া ১১,৩১৯ গৰাকী শিক্ষকৰ চাকৰিৰ ম্যাদ চৰকাৰে পুনৰ ১১ মাহ বৃদ্ধি কৰাৰ কথা ঘোষণা কৰাৰ পিছত এই শিক্ষকসকলে স্বস্তিৰ নিশ্বাস পেলাইছে।
কিন্তু একে সময়তে সৰ্বশিক্ষাৰ জৰিয়তে দুটা পৰ্যায়ত নিম্ন আৰু উচ্চ প্ৰাথমিক বিদ্যালয়ত নিযুক্তি দিয়া মুঠ ৬,৩৬৯ গৰাকী শিক্ষকৰ চাকৰিৰ ম্যাদ ১১ মাহ উকলি যোৱাৰ পিছতো কোনো চৰকাৰী নিৰ্দেশনা নহাত উক্ত শিক্ষকসকলে অনিশ্চয়তাৰ মাজত দিন কটাবলগীয়া হৈছে।
উল্লেখযোগ্য যে ২০১৭ চনৰ ৩ ছেপ্টেম্বৰত নিম্ন প্ৰাথমিক বিদ্যালয়ত ৫১৭১, উচ্চ প্ৰাথমিকৰ সমাজ বিজ্ঞানত ৭০৯, গণিত আৰু বিজ্ঞান বিষয়ত ১৫৮ গৰাকীকে ধৰি মুঠ ৬০৩৮ গৰাকী শিক্ষক-শিক্ষয়িত্ৰীক সৰ্বশিক্ষা আঁচনিৰ জৰিয়তে ১১ মাহৰ বাবে নিযুক্তি দিয়া হৈছিল।
একেদৰে সেই বৰ্ষৰে ৯ ছেপ্টেম্বৰত পুনৰ চৰকাৰে নিম্ন প্ৰাথমিকৰ বাবে ২৭০, উচ্চ প্ৰাথমিকৰ সমাজ বিজ্ঞানত ৫১, গণিত আৰু বিজ্ঞানৰ বাবে ১০ গৰাকীকে ধৰি মুঠ ৩৩১ গৰাকী শিক্ষক-শিক্ষয়িত্ৰীক ১১ মাহৰ বাবে নিযুক্তি দিছিল।
উক্ত শিক্ষক-শিক্ষয়িত্ৰীসকলৰ চাকৰিৰ ম্যাদ ইতিমধ্যে সমাপ্ত হৈছে। কিন্তু তেওঁলোকৰ চাকৰিৰ ম্যাদ বৃদ্ধিৰ বাবে চৰকাৰে কোনো নিৰ্দেশনা নিদিয়াত শংকাত ভূগিছে এই শিক্ষক-শিক্ষয়িত্ৰীসকল।
