ক্ৰমাগত সামাজিক মূল্যবোধৰ অৱক্ষয়ৰ ফলত বৃদ্ধ লোকসকলে নিজৰ আৰ্থিক সচ্ছল সন্তানৰ পৰাই অৱহেলাৰ বলি হৈ অহা পৰিস্থিতিৰ সামান্য মোকাবিলাৰ উদ্দেশ্যে ৰাজ্য চৰকাৰে প্ৰৱৰ্তন কৰা ‘প্ৰণাম’ আইনখন (Assam Employees Parental Responsibility Norms for Accountability Monitoring Act,2017) অহা ২ অক্টোবৰৰ পৰা বলৱৎ হ’ব।
আইনখন যোৱা ২৩ জুলাইত অসম কেবিনেটত অনুমোদন হৈছে। এই আইনখনে বৃদ্ধ পিতৃ-মাতৃৰ উপযুক্ত তদাৰক নকৰা চাকৰিয়াল কৰ্মচাৰীক আইনীভাৱে জগৰীয়া কৰিব। লগতে চাকৰিয়াল সন্তানৰ দৰমহাৰ ১০ শতাংশ তেনেকুৱা পিতৃ-মাতৃয়ে দাবী কৰিব পাৰিব। আজি এখন সংবাদমেলত ৰাজ্যৰ স্বাস্থ্য, বিত্ত মন্ত্ৰী ড০ হিমন্ত বিশ্ব শৰ্মাই এই বিষয়ে জানিবলৈ দিয়ে।
আনহাতে এই আইনখনে চাকৰিয়ালজনৰ পৰিয়ালত থকা দিব্যাংগ সদস্যকো সামৰি ল’ব। তেনে সদস্যই চাকৰিয়ালজনৰ ১৫ শতাংশ দৰমহা দাবী কৰিব পাৰিব।
অৱশ্যে চাকৰিয়াল পিতৃ-মাতৃয়ে এই আইনে দিয়া সুবিধাবোৰ ল’ব নোৱাৰিব বুলি জানিবলৈ দিয়ে।
মন্ত্ৰী হিমন্ত বিশ্বই জনোৱামতে, ৰাজ্য চৰকাৰে প্ৰণাম নামৰ এখন আয়োগো গঠন কৰিব। “এজন অৱসৰপ্ৰাপ্ত অতিৰিক্ত মুখ্য সচিব পৰ্য্যায়ৰ বিষয়াক মুখ্য আয়ুক্ত হিচাপে লৈ প্ৰণাম আয়োগখন গঠন কৰা হ’ব।” মন্ত্ৰীজনে কয়।
আনহাতে এনে ভুক্তভোগী ব্যক্তিয়ে আইনখনৰ দ্বাৰা উপকৃত হ’বৰ ক’ত আৱেদন কৰিব লাগিব সেই সন্দৰ্ভত তেওঁ কয় যে The Drawing and Disbursing Officer (DDO)-ৰ ওচৰত এই আৱেদন জনাব লাগিব। উক্ত বিষয়াই এমাহৰ ভিতৰত বিষয়টোৰ মীমাংসা কৰি দিব লাগিব। ইয়াৰ পিছত চাকৰিয়ালজনে চাকৰি কৰা সংশ্লিষ্ট বিভাগটোৱে দুমাহৰ ভিতৰত নিয়মমতে ব্যৱস্থা ল’ব লাগিব। যদিহে অভিভাৱকজন এই প্ৰক্ৰিয়াটোত সন্তোষ্ট নহয় বা প্ৰাপ্যখিনি নাপায়, তেতিয়া হ’লে তেওঁ প্ৰণাম আয়োগৰ কাষ চাপিব পাৰিব, যি তিনি মাহৰ ভিতৰত তাৰ মীমাংসা দিব।
