২০২২ চনত মেঘালয়ত অনুষ্ঠিত হ’বলগীয়া নেশ্যনেল গেমছৰ প্ৰস্তুতি সম্পৰ্কে বুজ লোৱাৰ উদ্দেশ্যে শুকুৰবাৰে মেঘালয় চৰকাৰে প্ৰতিযোগিতাখনৰ আয়োজক সমিতিৰ লগত এক গুৰুত্বপূৰ্ণ আলোচনাত মিলিত হয়।
এই আলোচনাৰ অন্তত ৰাজ্যৰ ক্ৰীড়া মন্ত্ৰী বাণ্টেইড’ৰ লিংড’ৱে সংবাদ আধ্যমৰ আগত কয় যে প্ৰতিযোগিতাখন আয়োজনৰ বাবে আমি কিছু অসুবিধাৰ সন্মুখীন হৈছো যদিও এই ক্ষেত্ৰত আমি দৃঢ়তাৰে আগবাঢ়িব পাৰিম।
মেঘালয় ৰাজ্যিক অলিম্পিক সন্থাৰ কাৰ্যকৰী সভাপতি জন এফ খাৰিছিঙে মনৰ ভাব ব্যক্ত কৰি কয় যে এই প্ৰতিযোগিতাখনৰ জৰিয়তে মেঘালয়বাসীয়ে এক সোণালী ইতিহাসৰ সাক্ষী হৈ ৰ’ব। লগতে মেঘালয়ৰ যুৱ প্ৰজন্মই এই প্ৰতিযোগিতাখনৰ জৰিয়তে বহুতো সুবিধা লাভ কৰিব বুলি তেওঁ উল্লেখ কৰে।
আনহাতে এই প্ৰতিযোগিতাখনত ব্যৱহাৰ হ’বলগীয়া ষ্টেডিয়াম সমূহ পাছলৈ পৰ্যটনস্থলী, পাৰ্ক আদিৰ বাবে সংৰক্ষণ কৰিব বুলিও জানিবলৈ দিয়ে এফ খাৰছিঙে।
উল্লেখযোগ্য যে মেঘালয়ৰ মুখ্য মন্ত্ৰী কনৰাড ছাংমাই ৰাজ্যখনৰ এথলীট সকলে যাতে প্ৰতিযোগিতাখনত পদক কঢ়িয়াই আনিবলৈ পাৰে তাৰ বাবে তেওঁলোকক যথোপযুক্ত প্ৰশিক্ষণৰ ব্যৱস্থা দিয়াৰ পোষকতা কৰে।
নেশ্যনেল গেমছ মেঘালয়ৰ বাবে আটাইতকৈ ডাঙৰ প্ৰতিযোগিতা। আৰু এই প্ৰতিযোগিতাখনে ৰাজ্যখনক আগুৱাই লৈ যোৱাত বহু ক্ষেত্ৰত সহায় কৰিব বুলি মন্তব্য কৰে মুখ্য মন্ত্ৰী ছাংমাই।
আনহাতে মুখ্য মন্ত্ৰীয়ে প্ৰতিযোগিতাখন অনুষ্ঠিত কৰিবৰ বাবে প্ৰয়োজনীয় ব্যৱস্থাৰ উপৰি ৰাজ্যখনৰ বিমানবন্দৰ, ৰাস্তা-ঘাট, বিদ্যুতৰ যোগান, হোটেলৰ লগতে অন্যান্য সা-সুবিধাও প্ৰয়োজনীয় বুলি মন্তব্য কৰে।
উল্লেখ্য যে নেশ্যনেল গেমছৰ বাবে মুখ্য মন্ত্ৰী ছাংমাই বিভিন্ন কেন্দ্ৰীয় মন্ত্ৰীৰ লগতে দেশৰ প্ৰধান মন্ত্ৰী নৰেন্দ্ৰ মোদীক সাক্ষাত কৰি ৰাজ্যখনৰ আন্তঃগাথনি উন্নয়নৰ বাবে আলোচনাত মিলিত হোৱা পৰিলক্ষিত হৈছে।
