কাজিৰঙা ৰাষ্ট্ৰীয় উদ্যানৰ গড়সমূহক চোৰাংচিকাৰীৰ হাতৰ পৰা ৰক্ষা কৰিবলৈ ৰাজ্যৰ বন বিভাগত নতুনকৈ সংযোজন হ’ল ৯০ গৰাকী বিশেষ গঁড় সুৰক্ষা বাহিনীৰ কনিষ্টবল।
আজি খানাপাৰাস্থিত অসম প্ৰশাসনিক পদাধিকাৰী মহাবিদ্যালয়ত মুখ্য মন্ত্ৰী সৰ্বানন্দ সোণোৱালৰ হাতৰ পৰা ৯০ গৰাকী যুৱক-যুৱতীয়ে বিশেষ গঁড় সুৰক্ষা বাহিনীৰ কনিষ্টবল পদৰ বাবে নিযুক্তি পত্ৰ গ্ৰহণ কৰে।
অনুষ্ঠানত মুখ্য অতিথি হিচাপে উপস্থিত থাকি মুখ্য মন্ত্ৰীয়ে বন্য প্ৰাণী ৰক্ষাৰ স্বাৰ্থত আত্মবলিদান দিয়াসকলৰ প্ৰতি গভীৰ শ্ৰদ্ধাঞ্জলি জ্ঞাপন কৰি সকলোকে ৰাষ্ট্ৰীয় উদ্যানসমূহৰ বন্যপ্ৰাণীসমূহক সুৰক্ষা দিয়াৰ বাবে দায়বদ্ধ আৰু প্ৰতিজ্ঞাবদ্ধ হ’বলৈ আহ্বান জনায়।
গোলাঘাট, কাৰ্বিআংলং, নগাওঁ, বিশ্বনাথ আৰু শোণিতপুৰ জিলাৰ যুৱক-যুৱতীসকলক লৈ এই বিশেষ বাহিনী গঠন কৰা হৈছে বুলি জানিবলৈ দি তেওঁ কয় যে বনপ্ৰাণীসমূহৰ নিৰাপত্তা নিশ্চিত কৰাটোৱেই নৱ নিযুক্ত কনিষ্টবল কেইজনৰ মূল কৰ্তৱ্য হ’ব লাগিব।
উল্লেখযোগ্য যে ৯০গৰাকী কনিষ্টল আৰু আৰক্ষী বিভাগৰ প্ৰতিনিধিসহ মুঠ ১১২ গৰাকীক গঁড় সুৰক্ষাৰ দায়িত্বত নিয়োগ কৰা হৈছে।
আনহাতে, ভাষণ প্ৰসংগত কংগ্ৰেছৰ শাসনৰ তুলনাত বিজেপি চৰকাৰৰ কাৰ্য্যকালত গঁড় হত্যাৰ মাত্ৰা কমি যোৱা বুলি দাবী কৰি তেওঁ লগতে কয়, ‘কাজিৰঙাক আগুৰি থকা পাঁচখন জিলাৰ উপায়ুক্ত, আৰক্ষী অধিক্ষক আৰু বন বিষয়াসকল সৈতে মত-বিনিময় কৰি এটা দল গঠন কৰি থৈ আহিছিলো। দলটোৱে নিষ্ঠাৰে কাম কৰাৰ বাবে তেতিয়াৰে পৰা চোৰাংচিকাৰীক প্ৰতিহত কৰিবৰ বাবে কাম কৰি আহিছো।’
উক্ত অনুষ্ঠানত উপস্থিত থকা কাজিৰঙাৰ বন বিভাগৰ সঞ্চালকক মুখ্য মন্ত্ৰীয়ে কাজিৰঙাৰ নিৰপত্তাৰ দায়িত্বত থকা বিষয়া-কৰ্মচাৰীৰ মাজত এক শক্তিশালী চেতনা জগাই তুলিবলৈ আহ্বান জনায়।
তদুপৰি, জীৱ-জন্তুৱে বানপানী অথবা অন্যান্য প্ৰাকৃতিক দুৰ্য্যোগৰ সময়ত আশ্ৰয় ল’বৰ বাবে ৩১ টা হাইলেণ্ড নিৰ্মাণ কৰা হৈছে বুলি জানিবলৈ দি তেওঁ লগতে কয়, ‘বিষয়াসকলে কাজিৰঙা ৰাষ্ট্ৰীয় উদ্যানৰ বন্যপ্ৰাণীসমূহৰ বিশেষত্ব বিলাক প্ৰত্যেকগৰাকী জোৱানক বুজাই দিব লাগিব যাতে যিকোনো দুৰ্গম পৰিস্থিতিৰ পৰা বন্যপ্ৰাণীসমূহক উদ্ধাৰ কৰাৰ বাবে পদক্ষেপ হাতত ল’ব পাৰে।’
কাৰ্য্যক্ষেত্ৰত বিশেষ পাৰদৰ্শিতা দেখুওৱা নৱ নিযুক্ত কনিষ্টবলক পুৰস্কাৰ প্ৰদান কৰাৰ কথা ঘোষণা কৰি সোণোৱালে নৱ নিযুক্ত কাজিৰঙা ৰাষ্ট্ৰীয় উদ্যানৰ বিশেষ কনিষ্টবল কেইগৰাকীক উন্নত মানৰ সাজ-পোচাকৰ ব্যৱস্থা কৰিবৰ বাবে সংশ্লিষ্ট কতৃপক্ষক আহ্বান জনায়।
আজিৰ এই অনুষ্ঠানত ৰাজ্যিক বন মন্ত্ৰী নৱ কুমাৰ দলেকে মুখ্য কৰি মুখ্য বন সংৰক্ষক এন কে বাসু, মুখ্য মন্ত্ৰীৰ আইন উপদেষ্টা শান্তনু ভৰালী, বন বিভাগৰ অতিৰিক্ত মুখ্য সচিব আলোক কুমাৰ দেৱ উপস্থিত থাকে।
