শুকুৰবাৰে ঘোষণা কৰা ৬৫ তম ৰাষ্ট্ৰীয় চলচ্চিত্ৰ বঁটাত ৰীমা দাসৰ ৰ’কষ্টাৰে ইতিহাস ৰচনা কৰাৰ বাতৰিয়ে সমগ্ৰ অসমতে আনন্দৰ জোৱাৰ সৃষ্টি কৰিছে।একেদৰে উৎপল বৰপূজাৰীৰ ইশু ছবিখনে অসমীয়া ভাষাৰ শ্ৰেষ্ঠ ছবিৰ ৰজতকমল বঁটা লাভ কৰা সংবাদেও সকলোকে আনন্দিত কৰিছে।
এইবাৰৰ ৰাষ্ট্ৰীয় বঁটাত আন এগৰাকী অসমীয়াই বিশেষ উল্লেখ ৰাষ্ট্ৰীয় বঁটাৰ বাবে নিৰ্বাচিত হৈছে। নগাঁও চহৰৰ নতুন বজাৰৰ অৱসৰপ্ৰাপ্ত শিক্ষক আব্দুল নুৰ ভূঞা আৰু অৱসৰপ্ৰাপ্ত শিক্ষয়িত্ৰী হিন্দীয়া আফৰুজা হকৰ কন্যা ৰুকচানাই ‘কেক ষ্ট’ৰী’ নামৰ চুটি ছবি এখনৰ বাবে অকাহিনী শিতানত বিশেষ উল্লেখ ৰাষ্ট্ৰীয় বটাঁ লাভ কৰিছে।
ৰুকচানাই পুণেৰ ফিল্ম এণ্ড টেলিভিছন ইনষ্টিটিউট অব্ ইণ্ডিয়াৰ পৰা ছবিৰ পৰিচালনাৰ শিক্ষা গ্ৰহণ কৰিছিল। মুম্বাইত চলচ্চিত্ৰ জগতৰ সৈতে জড়িত হৈ থকা ৰুকচানাই অসমৰ বাবে আৰু এটা সন্মান কঢ়িয়াই আনিলে।
ৰাষ্ট্ৰীয় পৰ্যায়ত এই বটাঁ লাভ কৰি খুবেই আনন্দিত বুলি বৰ্তমান কৰ্মসূত্ৰে মুম্বাইত থকা ৰুকচানাই সংবাদ মাধ্যমৰ আগত প্ৰকাশ কৰিছে।
