অসম বিধানসভাৰ নিয়োগ পৰ্যালোচনা সমিতিয়ে সকলোবোৰ কেন্দ্ৰীয় ৰাজহুৱা খণ্ডৰ প্ৰতিষ্ঠানৰে তৃতীয় আৰু চতুৰ্থ বৰ্গৰ চাকৰিত ৮০ শতাংশ স্থানীয় যুৱক-যুৱতীক নিযুক্তি দিয়াৰ বাবে এক ৰাজ্যিক নীতি প্ৰস্তুত কৰাৰ পৰামৰ্শ আগবঢ়াইছে।
উল্লেখযোগ্য যে যোৱা বছৰ সদন সমিতিখন গঠন কৰা হৈছিল। বিৰোধী দলৰ দলপতি দেবব্ৰত শইকীয়াই বিধানসভাৰ অধ্যক্ষৰ হাতত এখন আবেদন দাখিল কৰিছিল।
আবেদনখনত শইকীয়াই অভিযোগ কৰিছিল যে তেল আৰু প্ৰাকৃতিক গেছ আয়োগৰ অসম সম্পদে বিশেষভাৱে সক্ষম ব্যক্তিৰ বাবে সংৰক্ষিত ২২ টা পদৰ নিযুক্তি প্ৰক্ৰিয়াৰ সময়ত স্থানীয় যোগ্য প্ৰাৰ্থীক নিযুক্তি দিবলৈ অস্বীকাৰ কৰিছে।
বুধবাৰে সদনত দাখিল কৰা প্ৰতিবেদনত সমিতিয়ে প্ৰকাশ কৰিছে যে শইকীয়াৰ অভিযোগৰ এক গভীৰ আৰু চৰজমিন অনুসন্ধানৰ পিছত দেখা পোৱা গৈছে যে অ’এনজিচিৰ অসম সম্পদে নিযুক্তি প্ৰক্ৰিয়া নিয়োগ বিনিময় আইন, ১৯৫৯’ৰ (খালীপদৰ জাননী বাধ্যতামূলক) নিয়ম ৪ ৰ ব্যৱস্থা অনুসৰি গ্ৰহণ কৰা নাই।
সমিতিয়ে পৰামৰ্শ আগবঢ়াইছে যে অ’এনজিচি আৰু আন কেন্দ্ৰীয় ৰাজহুৱা খণ্ডৰ প্ৰতিষ্ঠানসমূহে গুজৰাট চৰকাৰৰ দৰে এক নীতি অনুসৰণ কৰা উচিত আৰু স্থানীয় নিবনুৱা যুবক-যুৱতীৰ বাবে ৮০ শতাংশ পদ সংৰক্ষণ কৰিব লাগে।
অ’এনজিচিৰ এক সূত্ৰৰ মতে তেওঁলোকৰ নিযুক্তি প্ৰক্ৰিয়াটো ৰাষ্ট্ৰীয় নিযুক্তি নীতিৰ দ্বাৰা পৰিচালিত। এইক্ষেত্ৰত বিশদ প্ৰতিবেদন লাভ কৰাৰ পিছত তেওঁলোকে বিষয়টো চালি জাৰি চাব।
সুদীৰ্ঘ দিন ধৰি অসমৰ জাতীয় দল-সংগঠনসমূহে নিযুক্তিৰ ক্ষেত্ৰত থলুৱাৰ বাবে সংৰক্ষণৰ দাবীত প্ৰতিবাদী কাৰ্যসূচী গ্ৰহণ কৰি আহিছে যদিও কোনো সুফল পোৱা নাই। এতিয়া সদন সমিতিৰ প্ৰতিবেদনৰ ভিত্তিত সংৰক্ষণৰ বিষয়টো যদি নিষ্পত্তি হৈ যায় তেতিয়াহ’লে অসমৰ নিবনুৱা যুৱক-যুৱতীৰ বাবে এটা ভাল খবৰ হ’ব বুলি আশা কৰিব পাৰি।
