বিত্ত মন্ত্ৰী হিমন্ত বিশ্ব শৰ্মাই সোমবাৰে দাখিল কৰা অসম বাজেট ২০১৮-১৯ত অসমৰ থলুৱা কিছুমান সামগ্ৰী ভৌগোলিক সূচক (Geographical Indicator)যুক্ত কৰাৰ প্ৰস্তাৱ কৰিছে।
বিত্ত মন্ত্ৰীয়ে কয়, ‘দেশে অসমৰ ছবিখন চাহ আৰু গঁড়ৰ সৈতেই যুক্ত কৰে। কিন্তু অসমত এনেকুৱা থলুৱা বহু সামগ্ৰী আছে যিবোৰে স্বীকৃতি নাপায়েই।’
শৰ্মাই কয়, ‘অসমৰ পৰম্পৰাগত গহনা, যোৰহাটৰ কৰঙাৰ কমাৰশালি, সৰ্থেবাৰীৰ কাঁহ শিল্প, হাজোৰ পিতল, এৰী সূতা, থলুৱা মদ (লাওপানী, সাঁজ), কোমল চাউল, জহা চাউল, বৰা চাউল, কপৌ ফুল আৰু ফুলাম জাপি আদি অসমৰ থলুৱা সামগ্ৰী কিন্তু দেশীয় আৰু আন্তঃৰাষ্ট্ৰীয় বজাৰত সিবোৰে নিজৰ সম্ভাৱনীয়তা পূৰ্ণভাৱে উপলব্ধি কৰা নাই।’
ভৌগোলিক সূচকযুক্ত কৰিলে দেশীয় আৰু আন্তঃৰাষ্ট্ৰীয় বজাৰত এই সামগ্ৰীসমূহৰ চাহিদা বৃদ্ধি পাব।
চৰকাৰে এই সামগ্ৰীসমূহ ভৌগোলিক সূচকযুক্ত কৰিবলৈ চেষ্টা কৰিব বুলি উল্লেখ কৰি তেওঁ কয়, ‘এই সামগ্ৰীসমূহৰ ৰপ্তানিয়ে অৰ্থনীতিক গতি দিব আৰু পৰ্য্যটন বঢ়াব, এই শিল্পসমূহৰ উৎপাদনৰ লগত জড়িত খেতিয়ক আৰু শিল্পীসকলৰ জীৱিকাক ই প্ৰত্যক্ষভাৱে ত্বৰান্বিত কৰিব।’
