ৰাজ্যৰ শৈক্ষিক মহলত তোলপাৰ লগাই থকা অসম মহিলা বিশ্ববিদ্যালয়ৰ স্বীকৃতি আৰু বৈধতা বিষয়টো অৱগত কৰি এই সন্দৰ্ভত ইতিবাচক পদক্ষেপ ল’বলৈ আহ্বান জনোৱাৰ উদ্দেশ্যে কংগ্ৰেছ বিধায়িনী দলে ৰাজ্যপালক সাক্ষাৎ কৰিব। অসম মহিলা বিশ্ববিদ্যালয়ৰ লগতে এন আৰ চি বিষয়তো দলটোৱে এই সাক্ষাতৰ সময়ত মত বিনিময় কৰিব। বিৰোধী দলৰ নেতা তথা কংগ্ৰেছ বিধায়ক দেৱব্ৰত শইকীয়াই এন ই নাওক এই কথা জনায়। দলটোৱে অহা ২৬ মাৰ্চত এই সাক্ষাতৰ অনুমতি বিচাৰিছে বুলি জানিবলৈ দিছে নেতাজনে।
উল্লেখযোগ্য যে উপাচাৰ্য্যহীন অসম মহিলা বিশ্ববিদ্যালয়ৰ ডিগ্ৰীৰ কোনো মূল্য নাই বুলি কেইদিন মানৰ পূৰ্বে স্বয়ং শিক্ষা মন্ত্ৰীয়ে ঘোষণা কৰিছিল, যিটোৱে শেহতীয়াভাৱে ৰাজ্যৰ সমগ্ৰ শিক্ষা জগতত তোলপাৰ লগাই আছে। শিক্ষা মন্ত্ৰীজনে অসম মহিলা বিশ্ববিদ্যালয়ক এখন কাৰিকৰী শিক্ষাৰ প্ৰতিষ্ঠানলৈ ৰূপান্তৰ কৰা হ’ব বুলিও ঘোষণা কৰিছিল। বিভিন্ন পক্ষই শিক্ষা মন্ত্ৰীৰ এই স্থিতিৰ প্ৰতিবাদ অব্যাহত ৰাখিছে। মন কৰিব লগীয়া কথাটো হ’ল এই বিশ্ববিদ্যালয়খন অসম চৰকাৰে নিজেই অসম মহিলা বিশ্ববিদ্যালয় আইন, ২০১৩ (Assam Women’s University Act, 2013)ৰ জৰিয়তে স্থাপন কৰিছিল।
দেৱব্ৰত শইকীয়াই প্ৰশ্ন কৰে যে উচ্চ শিক্ষা বিভাগে গঠন কৰি দিয়া চাৰিজনীয়া সদস্যৰ সমিতিয়ে ২০১৭ চনৰ ১৩ জুনত দিয়া পৰামৰ্শসমূহ কিয় কাৰ্য্যকৰণ কৰা নহ’ল, যাৰ বাবে আজি এই পৰিস্থিতি সৃষ্টি হ’ল।
‘উপাচাৰ্য্যৰ অনুপস্থিতিত মুখ্য মন্ত্ৰী সৰ্বানন্দ সোণোৱাল নিজে আচাৰ্য্যৰ দায়িত্ব ল’ব পাৰে। লগতে তেওঁ এই বুলি নিশ্চিতি দিছিল যে বিশ্ববিদ্যালয়খনে যাতে সঠিক দিশত কাম কৰি যাব পাৰে তাৰ বাবে উপাচাৰ্য্য নিযুক্তি দিয়া হ’ব আৰু শৈক্ষিক পৰিষদ গঠন কৰা হ’ব। ইয়াৰ পিছতো কাৰিকৰী প্ৰতিষ্ঠানৰ কথা আহিল কেনেকৈ?’ শইকীয়াই কয়।
আনহাতে আজি এই বিষয়টোক লৈ যোৰহাট চেণ্ট্ৰেল কলেজৰ ছাত্ৰ মুক্তি সংগ্ৰাম সমিতি আৰু ডি চি বি উইমেন কলেজৰ ছাত্ৰ-ছাত্ৰীসকলে প্ৰতিবাদী কাৰ্য্যসূচী ৰূপায়ণ কৰে। প্ৰতিবাদকাৰীসকলক মুখ্য মন্ত্ৰী আৰু শিক্ষা মন্ত্ৰীৰ বিৰুদ্ধে শ্ল’গান দিয়া দেখা গ’ল। এই সম্পৰ্কত তেওঁলোকে মুখ্য মন্ত্ৰীলৈ এখন স্মাৰকপত্ৰও প্ৰদান কৰে। তেওঁলোকে চৰকাৰে বিষয়টোত এটা স্পষ্ট স্থিতি নোলোৱা পৰ্য্যন্ত প্ৰতিবাদী কাৰ্য্যসূচী অব্যাহত ৰাখিব বুলি কয়।
