অৰুণাচল প্ৰদেশৰ নামচাই জিলাৰ লিকাং বিধানসভা সমষ্টিৰ কেইবাহাজাৰ পুৰুষ-মহিলা আজি কংগ্ৰেছ দলত যোগদান কৰে। অৰুণাচল প্ৰদেশ কংগ্ৰেছৰ সভাপতি টাকাম সঞ্জয়ে ইয়াক ৰাজ্যখনৰ মংগলৰ বাবে গণজাগৰণ আখ্যা দিছে। তেওঁ ইয়াক বিকাশৰ বাবে ঐক্যবদ্ধ স্থিতি বুলিও অভিহিত কৰে।
তেওঁ কয় যে ইয়াৰ মানুহবোৰ, বিশেষকৈ যুৱচাম যথেষ্ট পৰিশ্ৰমী হোৱা সত্ত্বেও স্থানীয় নেতাজনে কেইবাবাৰো জয়ী হৈয়ো তেওঁৰ ভোটাৰসকলৰ বাবে একো নকৰিলে। ভোটাৰসকলক তেওঁলোকৰ দুৰৱস্থাৰ মাজত বাস কৰিবলৈ তেওঁ বাধ্য কৰিছে। এইদৰে কয় সঞ্জয়ে।
‘আপোনালোকে আপোনালোকৰ অধিকাৰ পাবৰ বাবে ন্যায়সংগত বিদ্ৰোহ কৰিছে।’ তেওঁ কয়।
তেওঁ ৱ’মেন ইনটেৰিম গ্ৰুপ প্ৰেছিডেণ্ট লোকেশ্বৰী মিলি(টায়ে) আৰু প্ৰাক্তন মন্ত্ৰী বিদা টাকোৰ উদ্বৃতি দি কয় যে লিকাং আৰু মহাদেৱপুৰৰ বাবে নিৰ্ধাৰিত পুঁজি অন্যফালে লৈ যোৱা হৈছে।
তেওঁ কংগ্ৰেছত যোগদান কৰা পুৰুষ-মহিলাসকলক সম্বুধি কয়, ‘কংগ্ৰেছ দল আপোনালোকৰ কাষত থিয় দিবৰ বাবে সাজু, আপোনালোক সাজু নে?’ তেওঁ সকলো পুৰুষ-মহিলাক ঐক্যবদ্ধভাৱে থিয় হ’ব লাগিব বুলি কৈ কয় যে কংগ্ৰেছে একতাৰে বন্ধা তথা সংহতিৰ আদৰ্শ স্থাপন কৰা সমাজখন বিজেপিয়ে ভাঙি থান-বান কৰিছে। কংগ্ৰেছে গান্ধীৰ অহিংসাৰ আন্দোলনত বিশ্বাস কৰে, কিন্তু বিজেপিয়ে গান্ধীৰ হত্যাকাৰী নাথুৰামক চেলুট মাৰে।
নিখিল ভাৰত মহিলা কংগ্ৰেছ সমিতিৰ সাধাৰণ সম্পাদিকা জাৰজুম ইতে, অৰুণাচল প্ৰদেশ কংগ্ৰেছৰ সাধাৰণ সম্পাদক নুনেই তায়াঙে কয় যে ৰাজ্যখনৰ প্ৰথমজন সাংসদ চৌখাম গোহাঁইকে ধৰি কংগ্ৰেছে লিকাংবাসীক বহুত দিলে। কিন্তু তেওঁলোকৰ দল ত্যাগ আছিল অতি অবিশ্বাস্য। এতিয়া তেওঁলোকৰ দলটোলৈ পুনৰ প্ৰত্যাৱৰ্তনৰ সিদ্ধান্ত আদৰণীয় আৰু ইয়াক ঘৰ ৱাপচি বুলিব পাৰি। বিজেপি যে দুখীয়া আৰু পিছপৰাসকলৰ শোষণকাৰী সেয়া প্ৰমাণিত হ’ল। তেওঁ কয়।
উল্লেখযোগ্য যে লিকাঙৰ অধীনত সিতাপুৰি, ইৰালনি, কোপাটনি, উইচালি, কৃষ্ণপুৰ, কালগুডি, মাহালনি, ধৰমপুৰ, মহাদেৱপুৰ ১ ৰ পৰা মহাদেৱপুৰ ৫ আদি। ‘আমি মৰাণ, দেউৰী, মিচিং/মিৰি, আদিবাসী, মটক/মৰাণ, কচাৰী, সোণোৱাল, আহোম আৰু নেপালী সকলোৱে ইতিহাসে ঢুকি নোপোৱাৰ দিনৰ পৰা একেলগে বাস কৰি আহিছো। কিন্তু আমাৰ কোনো ভুল নোহোৱা সত্ত্বেও আমি আমাৰ প্ৰাপ্য অধিকাৰৰ পৰা বঞ্চিত। আমাৰ কোনো ভূমিৰ অধিকাৰ নাই। আনকি ৰাজ্য চৰকাৰৰ অধীনত চাকৰি কৰাসকলে পেন্সন নাপাই।’ তেওঁলোকৰ মাজৰে কেইজনমানে এইদৰে কয়।
