আজিৰ পৰা ইণ্ডিজেনাছ ষ্টুডেণ্ট ফ’ৰাম চমুকৈ আইএছএফৰ নেতৃত্বত ডিমা হাচাও জিলাত অনিৰ্দিষ্ট কালৰ কাৰণে গঢ়ি তোলা হৈছে ৰে’ল অৱৰোধ কাৰ্যসূচী। এন এফ ৰে’লৱেৰ ব্ৰডগজ ৰে’লপথ নিৰ্মাণত ক্ষতিগ্ৰস্ত হোৱা পাহাৰীয়া ৰাইজৰ বাকী থকা ক্ষতিপূৰণ মোকলাই দিয়াৰ ক্ষেত্ৰত বিভাগটোৱে অনীহা প্ৰদৰ্শন কৰাত ক্ষুণ্ণ হৈ আইএছএফে উক্ত প্ৰতিবাদ সাব্যস্ত কৰাৰ সিদ্ধান্ত গ্ৰহণ কৰিছে।
উল্লেখনীয় যে যোৱা ১ মাৰ্চত ক্ষতিপূৰণ সংক্ৰান্ত বিষয়লৈ হাফলং জিলা উপায়ুক্ত কাৰ্যালয়ত ৰে’ল বিভাগৰ বিষয়াৰ উপস্থিতিত এক গুৰুত্বপূৰ্ণ বৈঠক অনুষ্ঠিত হৈছিল। উক্ত বৈঠকত ক্ষতিপূৰণ আদায় দিয়াৰ বাবে ৰে’ল বিভাগৰ ফালৰ পৰা এমাহ সময় বিচৰা হৈছিল। কিন্তু এমাহ সময় অতিক্ৰম কৰাৰ পাছতো বৰ্তমান পৰ্যন্ত ক্ষতিপূৰণ আদায়ৰ কাম আগ বঢ়া নাই। আৰু ইয়াৰ ফলশ্ৰুতিতে সংগঠনটোৱে আজিৰ পৰা ৰে’ল অৱৰোধৰ সিদ্ধান্ত গ্ৰহণ কৰে।
উল্লেখ্য যে আজি প্ৰায় শতাধিক আইএছএফ সদস্যৰ লগতে ক্ষতিগ্ৰস্ত ৰাইজ নিউ হাৰাঙ্গাজাও ষ্টেচনত উপস্থিত হৈ প্ৰতিবাদ সাব্যস্ত কৰে। প্ৰতিবাদস্থলীত উপস্থিত থকা আইএছএফৰ সভাপতি ডেভিদ কেইভমে এই সন্দৰ্ভত কয় যে ৰে’ল কৰ্তৃপক্ষই বাৰম্বাৰ প্ৰতিশ্ৰুতি দিলেও ক্ষতিপূৰণ মোকলাই দিয়াৰ ক্ষেত্ৰত আজিলৈ কোনো ব্যৱস্থা লোৱা নাই।
লগতে কালিৰ পৰা আজিলৈকে ৰে’ল অৱৰোধ সন্দৰ্ভত বিভাগটোৱে আইএছএফৰ লগত কোনো ধৰনৰ যোগাযোগ কৰা নাই বুলিও জনায় সভাপতিগৰাকীয়ে। তেওঁ আৰু কয় ‘ সৰ্বসাধাৰন ৰাইজক হাৰাশাস্তি কৰাৰ আমাৰ কোনো ইচ্ছা নাই। কিন্তু ৰে’ল কৰ্তৃপক্ষই বাৰম্বাৰ প্ৰতিশ্ৰুতি দিয়াৰ লগতে এই সম্পৰ্কত পোন্ধৰ বাৰ বৈঠক কৰাৰ পাছতো কিয় সমাধান সূত্ৰ উলিয়াব পৰা নাই’।
ইফালে সংগঠনটোৱে আজিৰ পৰা ৰে’ল অৱৰোধ কাৰ্যসূচী গ্ৰহণ কৰে যদিও ৰে’ল কৰ্তৃপক্ষই বুধবাৰৰ নিশাৰ পৰাই পাহাৰ লাইনত সকলো ধৰণৰ ৰে’ল চলাচল বাতিল কৰি দিয়ে। ৰে’ল অৱৰোধ কাৰ্যসূচীৰ ফলত সৰ্বসাধাৰণ ৰাইজ নানা সমস্যাৰ সন্মুখীন হোৱা বুলিও জানিব পৰা গৈছে।
ইফালে ৰে’ল অৱৰোধৰ সময়ত প্ৰতিবাদকাৰীসকলে যাতে কোনো ধৰণৰ বিক্ষিপ্ত ঘটনাৰ সৃষ্টি কৰিব নোৱাৰে তাৰ প্ৰতি লক্ষ্য ৰাখি প্ৰশাসনে মাহুৰৰ পৰা ডিটকচৰা লৈকে প্ৰতিটো ষ্টেশ্যনতে কটকটীয়া নিৰাপত্তা ব্যৱস্থা গঢ়ি তুলিছে।
উল্লেখ্য যে লামডিং-শিলচৰ ব্ৰডগজ নিৰ্মাণৰ কাৰণে ক্ষতিগ্ৰস্ত হোৱা ৰাইজৰ ক্ষতিপূৰণ আদায় দিয়াৰ দাবীত দীৰ্ঘ দিন ধৰি উক্ত লোকসকলৰ হৈ ইণ্ডিজেনাছ স্টুডেন্ট ফ’ৰামে আন্দোলন কৰি আহিছে। আৰু এই ক্ষতিপূৰণ অনতি পলমে আদায় দিয়াৰ দাবী জনায় সংগঠনটোৱে আজিৰ পৰা পুনৰ আন্দোলন সাব্যস্ত কৰা পৰিলক্ষিত হয়।
