কেন্দ্ৰীয় চৰকাৰে সমগ্ৰ দেশৰ ভিতৰত ১১৫ খন জিলাক দ্ৰুত পৰিৱৰ্তন দিশত আগবঢ়াই নিয়াৰ বাবে এক অভিলাষী ব্যৱস্থা গ্ৰহণ কৰিছে। উক্ত ১১৫ খন জিলাৰ ভিতৰত উত্তৰ-পূৰ্বাঞ্চলৰ ১১ খন ৰাজ্যও আছে।
উত্তৰ-পূৰ্বাঞ্চলৰ পৰা বাচি উলিওৱা ১১ খন জিলাৰ ভিতৰত অসমৰ ৫ খন জিলাও আছে।
প্ৰধানমন্ত্ৰী নৰেন্দ্ৰ মোডীৰ ২০২২ চনৰ ভিতৰত ‘নতুন ভাৰত’ লক্ষ্যৰ এক অংশ হিচাপে এই ব্যৱস্থা গ্ৰহণ কৰা হৈছে।
অসমৰ ৫ খন জিলাৰ ভিতৰত অনগ্ৰসৰ হিচাপে বাচি লোৱা হৈছে বৰপেটা, গোৱালপাৰা, ধুবুৰী, চিৰাং আৰু ডিমা হাচাও।
উক্ত জিলাসমূহৰ প্ৰয়োজনীয় বিশেষ উন্নয়নৰ বাবে গ্ৰহণ কৰা কাৰ্যসূচীসমূহ ৰূপায়নৰ ক্ষেত্ৰত কেন্দ্ৰ আৰু ৰাজ্য চৰকাৰৰ মাজত সমন্বয়ক হিচাপে কাম কৰিবলৈ এগৰাকী ‘ভাৰপ্ৰাপ্ত বিষয়া’ নিয়োগ কৰা হ’ব। এই বিষয়া গৰাকী অতিৰিক্ত সচিব আৰু যুটীয়া সচিব পৰ্যায়ৰ জ্যেষ্ঠ চৰকাৰী বিষয়া হ’ব।
এই দায়িত্ববাহী বিষয়াসকলৰ প্ৰথমখন বৈঠক অহা ৪ আৰু ৫ জানুৱাৰীত নতুন দিল্লীত অনুষ্ঠিত হ’ব। এই বৈঠকত প্ৰধানমন্ত্ৰী নৰেন্দ্ৰ মোডীয়ে ভাষণ দিব।
ইয়াৰ পিছতে দায়িত্ববাহী বিষয়াসকলে অনগ্ৰসৰ জিলা হিচাপে চিনাক্ত কৰা জিলাসমূহৰ বাবে উন্নয়নৰ পৰিকল্পনা আৰু নীতি নিৰ্দেশনাসমূহ সংশ্লিষ্ট ৰাজ্য চৰকাৰসমূহৰ লগত আলোচনা কৰিবলৈ সুকীয়া বৈঠক অনুষ্ঠিত কৰিব।
উন্নয়নমূলক ব্যৱস্থাসমূহ কেন্দ্ৰ আৰু ৰাজ্য চৰকাৰৰ বিষয়াৰ এটা দলে কাৰ্যকৰী কৰাৰ বাবে পদক্ষেপ গ্ৰহণ কৰিব।
প্ৰধানমন্ত্ৰী নৰেন্দ্ৰ মোডীয়ে ২০২২ চনৰ ভিতৰত এখন নতুন তথা বিকশিত ভাৰত গঢ়াৰ লক্ষ্য নিৰ্দ্ধাৰণ কৰিছে। এই বৰ্ষয়ে ভাৰতে ইয়াৰ স্বাধীনতাৰ ৭৫ বৰ্ষ পূৰ্ণ কৰিব।
সৰ্বাত্মক বিকাশ আৰু জীৱন যাত্ৰা উন্নত কৰি তোলা এই সকলোবোৰ এই লক্ষ্যৰ অৱিচ্ছেদ্য অংগ।এইক্ষেত্ৰত এই ব্যৱস্থাসমূহৰ এটা হৈছে অনগ্ৰসৰ জিলাসমূহৰ সামগ্ৰিক আৰ্থ-সামাজিক বিকাশ উন্নত কৰি তোলা।
শিক্ষা, স্বাস্থ্য, পৰিপুষ্টি, গ্ৰাম্য পথ সংযোগৰ বুনিয়াদী আন্তঃগাঁথনিকে ধৰি গাওঁৰ পৰিয়ালসমূহত বৈদ্যুতিকৰণ, খোৱা পানীৰ সুবিধা আৰু গাইগুটীয়া অনাময় ব্যৱস্থা আদিৰ ভিত্তিত ১১৫ খন জিলাক অনগ্ৰসৰ হিচাপে চিনাক্ত কৰি উলিওৱা হৈছে।
