অল ইণ্ডিয়া ফেডাৰেইশ্যন অব গভৰ্নমেণ্ট মেডিকেল প্ৰেক্টিশ্যনাৰ সংগঠনটোৱে আজি চিকিৎসকসকলৰ নিৰাপত্তা সুনিশ্চিত কৰিবলৈ গোটেই দেশযুৰি এক ৰাষ্ট্ৰীয় নীতি প্ৰস্তুত কৰিবলৈ কেন্দ্ৰীয় চৰকাৰৰ ওচৰত দাবী জনায়।
ৰাষ্ট্ৰীয় চৰকাৰী চিকিৎসক সন্থাৰ কাৰ্যকৰী সভাপতি ডাঃ টবা খান্নাই চিকিৎসকসকলৰ নিৰাপত্তা জনিত সমস্যা বৃদ্ধি পোৱাৰ বাবে উদ্বেগ প্ৰকাশ কৰি এই দাবী জনায়।
দেওবাৰে সন্ধিয়া মঙলদৈ জিলা পুথিভঁৰাল প্ৰেক্ষাগৃহত আয়োজিত ‘আমছা’ৰ ৪৪ সংখ্যক বাৰ্ষিক অধিৱেশনত ডাঃ খান্নাই এই কথা ব্যক্ত কৰে। ‘নিৰাপত্তাৰ দিশটো ৰাজ্য চৰকাৰৰ দায়িত্ব যদিও কেন্দ্ৰীয় চৰকাৰে এই সম্পৰ্কত কিছু পদক্ষেপ গ্ৰহণ কৰাৰ প্ৰয়োজনীয়তা আছে’, এইদৰে কয় ডাঃ খান্নাই।
ইয়াৰ উপৰি তেওঁ চিকিৎসকসকলৰ আৰ্থিক নিৰাপত্তা, কাম-কাজৰ পৰিৱেশ তথা কৰ্মৰ সময়সূচী নিৰ্ধাৰণ কৰা আদি বিষয় কেইটাত গুৰুত্ব আৰোপ কৰাৰ বাবে দাবী উত্থাপন কৰে।
মুকলি অধিৱেশনখনৰ সভাপতিত্ব কৰে আমছাৰ সভাপতি ডাঃ দিলীপ দেৱ শৰ্মাই। সভাত উপস্থিত থাকে সদৌ ভাৰত চিকিৎসক সন্থাৰ উপ সভাপতি জে কুথিৰ ভেল, মঙলদৈ বিধানসভা সমষ্টিৰ বিধায়ক গুৰুজ্যোতি দাস, স্বাস্থ্য সেৱাৰ যুতীয়া সঞ্চালক ডাঃ ৰূপলাল নুনিছাৰ লগতে অন্যান্য বিশিষ্ট লোক।
উল্লেখ্য যে এই অধিৱেশৰ আনুষ্ঠানিকভাবে শুভ উদ্বোধন কৰে ৰাষ্ট্ৰীয় স্বাস্থ্য অভিযানৰ কাৰ্যকৰী পৰিচালক ডাঃ অচ্যুত কুমাৰ বৈশ্যই।
ডাঃ বৈশ্যই তেওঁৰ ভাষণ প্ৰসংগত কয় যে চৰকাৰী চিকিৎসকসকলৰ কৰ্তব্য একমাত্ৰ প্ৰেছক্ৰিপশ্যন লিখাই নহয় তেওঁলোকে ৰোগীসকলৰ লগত সহানুভূতিৰে আচৰণ কৰিব লাগিব। ইয়াৰ উপৰি স্বাস্থ্যখণ্ডৰ উন্নয়নৰ বাবে প্ৰতিবছৰে বহু কোটি টকা আবণ্টন দিয়া হয় বুলিও তেওঁ জনায়।
এই অধিৱেশনতে আমছাৰ প্ৰাক্তন সভাপতি ডাঃ চন্দ্ৰ ধৰ ডেকাই স্মাৰকগ্ৰন্থ এখনো উন্মোচন কৰে। লগতে ডাঃ চিৰাজুল হক, ডাঃ লীলাধৰ ব্ৰহ্ম আৰু ৰাণী দেবীক আয়োজক সন্থাই সম্বৰ্ধনা জ্ঞাপন কৰে।
উল্লেখযোগ্য যে তিনিদিনীয়া অধিবেশনখন যোৱা শুকুৰবাৰৰ পৰা মঙলদৈ চহৰত অনুষ্ঠিত হৈছে। এই অধিবেশনত তিনিশৰো অধিক প্ৰতিনিধিয়ে অংশগ্ৰহণ কৰা বুলি আয়োজকে জানিবলৈ দিয়ে।
এই অধিবেশনতে দেওবাৰে পুৰণা সমিতি ভংগ কৰি অহা দুবছৰৰ বাবে নতুন সমিতি গঠন কৰা হয়। ডাঃ পৰেশ কলিতা সভাপতি, আৰু পূৰ্বৰ সম্পাদক ডাঃ কনক চন্দ্ৰ তালুকদাৰক পুনৰ সম্পাদক হিচাপে দায়িত্বভাৰ অৰ্পণ কৰে।
