এন আৰ চিৰ প্ৰথমখন খচৰা প্ৰকাশ কৰাৰ সময় যিমানে টুটি আহিছে সিমানেই আইন-শৃংখলাজনিত পৰিস্থিতিক লৈ ৰাজ্য প্ৰশাসনৰ লগতে সমাজৰ সচেতন অংশটোৰ মাজত উদ্বিগ্নতা বৃদ্ধি পাইছে। অহা ৩১ ডিচেম্বৰত প্ৰথমখন খচৰা প্ৰকাশ কৰালৈ মাজত মাত্ৰ দুটা দিন আছে। এই পৰিপ্ৰেক্ষিতত অসম আৰক্ষী বিভাগে ৰাজ্যখনৰ স্পৰ্শকাতৰ অঞ্চলবোৰত নিৰাপত্তা ব্যৱস্থা বৃদ্ধি কৰিছে। চৰকাৰী সূত্ৰই জনোৱামতে ৰাজ্যখনে ইতিমধ্যে কেন্দ্ৰীয় নিৰাপত্তা বাহিনীৰ ৮৫ টা অতিৰিক্ত কোম্পানী লাভ কৰিছে।
উল্লেখযোগ্য যে অনুপ্ৰৱেশে এক প্ৰকাৰৰ সংকট সৃষ্টি কৰা ৰাজ্যখন যোৱা ২০১৫ চনৰ পৰা ৰাষ্ট্ৰীয় নাগৰিকপঞ্জী উন্নীকৰণৰ কাম চলি আছে। অসম আন্দোলনৰ ফলত সৃষ্ট অসম চুক্তিৰ এটা অত্যন্ত গুৰুত্বপূৰ্ণ অংশস্বৰূপে ৰাজ্যখনত এই ৰাষ্ট্ৰীয় নাগৰিকপঞ্জী উন্নীতকৰণ কৰা হৈছে। এইটো অসমৰ বিভিন্ন দল-সংগঠন তথা ৰাজনৈতিক পক্ষবোৰৰ এইটো এটা দীৰ্ঘদিনীয়া দাবী আছিল আৰু বহু প্ৰতীক্ষাৰ অন্তত প্ৰক্ৰিয়াটো বাস্তৱত কাৰ্য্যকৰী হ’বলৈ ধৰিছিল। এই গোটেই প্ৰক্ৰিয়াটোত মহামান্য উচ্চতম ন্যায়ালয়েও বিশেষ চকু ৰাখিছে।
শেহতীয়াকৈ উচ্চতম ন্যায়ালয়েই চৰকাৰক আদেশ দিছিল যে অহা ৩১ ডিচেম্বৰৰ ভিতৰত এন আৰ চিৰ প্ৰথমখন খচৰা প্ৰকাশ কৰিবই লাগিব। সেই পৰিপ্ৰেক্ষিততে এন আৰ চিৰ কাম তীব্ৰ গতিত কৰা হৈ আছে আৰু অহা ৩১ ডিচেম্বৰৰ ভিতৰত প্ৰথমখন খচৰা প্ৰকাশ পোৱাটো নিশ্চিত হৈছে।
খচৰা প্ৰকাশ পোৱাৰ সময়খিনিত খচৰাৰ পৰা নাম বাদ পৰাক কেন্দ্ৰ কৰি উত্তেজনাময় পৰিৱেশৰ সৃষ্টি হ’ব পাৰে বুলি ইতিপূৰ্বে চোৰাংচোৱাৰ তথ্যই ৰাজ্য আৰু কেন্দ্ৰীয় চৰকাৰক জনাইছে। তাৰোপৰি এই সময়ছোৱাত সৃষ্টি হ’ব পৰা সম্ভাব্য পৰিস্থিতিৰ পৰ্য্যালোচনা কৰিবলৈ দেশৰ অভ্যন্তৰীণ চোৰাংচোৱা বিভাগৰ মুৰব্বী ৰাজীৱ জৈনে ৰাজ্যখন ভ্ৰমণ কৰি গৈছে কিছু দিনৰ আগতে।
আনহাতে কালি য়ুনিফাইড কমাণ্ডে তেজপুৰৰ ফ’ৰ ক’ৰ্পছৰ মুখ্য কাৰ্য্যালয়ত অসমৰ নিৰাপত্তাৰ দিশবোৰ পৰ্য্যালোচনা কৰে। য়ুনিফাইড কমাণ্ডে শংকা কৰা মতে ৰাজ্যখনৰ ঠায়ে ঠায়ে আইন-শৃংখলাজনিত পৰিস্থিতিৰ উদ্ভৱ হোৱাৰ সম্ভাৱনা আছে।
অসমৰ আৰক্ষী সঞ্চালক প্ৰধান মুকেশ সাহায়ে কয় যে এই বৈঠকখনত বিশেষকৈ এন আৰ চিৰ সেৱাকেন্দ্ৰবোৰত নিৰাপত্তা বৃদ্ধি কৰা বিষয়টোৰ ওপৰত অধিক গুৰুত্ব দিয়া হৈছিল। উল্লেখযোগ্য যে এন আৰ চিৰ তথ্য চাৰিটা সুকীয়া সুকীয়া ৱেবছাইটত প্ৰকাশ পোৱাৰ উপৰি সেৱাকেন্দ্ৰবোৰতো খচৰা তালিকা আঁৰি দিয়া হ’ব। লগতে তেওঁ কয় যে আৰক্ষী বিভাগে ছ’চিয়েল মিডিয়াতো চকু ৰাখিব।
আনহাতে যোৱা বুধবাৰে মুখ্য মন্ত্ৰী সৰ্বানন্দ সোণোৱালেও এই আশ্বাস দিছিল যে প্ৰকৃত ভাৰতীয় নাগৰিকসকল ভীতিগ্ৰস্ত হোৱাৰ কাৰণ নাই, যিহেতু নাম বাদ পৰিলেও তেওঁলোকে নিজৰ নাম অন্তৰ্ভুক্ত কৰাৰ যথেষ্ট সুযোগ পাব।
