সোমবাৰে বঙাইগাঁও চহৰৰ শ্বহীদ বেদীস্থিত আক্ৰাছুৰ মুখ্য কাৰ্যালয়ত সংগঠনটোৰ প্ৰথমখন কাৰ্যনিৰ্বাহ সভা অনুষ্ঠিত হয়।সভাত আক্ৰাছুৰ লগতে ভাতৃ- ভগ্নী সংগঠন ক্ৰমে চিলাৰায় সেনা আৰু কোচ ৰাজবংশী মহিলা সমিতি কেন্দ্ৰীয় সমিতিৰ বিষয়ববীয়া তথা জিলা সমিতিসমূহৰ সভাপতি-সম্পাদক সকল উপস্থিত থাকে।
আক্ৰাছুৰ মুখ্য কাৰ্যালয়ত অনুষ্ঠিত হোৱা বৈঠকৰ অন্তত কাৰ্যনিৰ্বাহক সভাত লোৱা সিদ্ধান্ত তথা পৰৱৰ্তী স্থিতি সমূহৰ বিষয়ে সংবাদমেল যোগে সদৰী কৰে।
পৃথক কমতাপুৰ ৰাজ্য আৰু জনজাতিকৰণৰ দাবীত আক্ৰাছুৱে এক আন্দোলনৰ কাৰ্যসূচী গ্ৰহণ কৰিব। সেইমতে আক্ৰাছুৱে অহা ১৩ ফেব্ৰুৱাৰীত গণসমাৱেশ, ১৫ মাৰ্চত ৰে’লপথ অৱৰোধ, ৩০ মাৰ্চত ১২ ঘণ্টীয়া ৰাষ্ট্ৰীয় ঘাইপথ অৱৰোধ আৰু মাৰ্চ মাহৰ পাছত ১০০০ ঘণ্টীয়া অৰ্থনৈতিক চকা বন্ধৰ কাৰ্যসূচী গ্ৰহণ কৰা হ’ব বুলি সংবাদ মাধ্যমৰ আগত জনায়।
ইপিনে সংগঠনটোৱে সংবাদ মাধ্যমৰ আগত ক্ষোভ প্ৰকাশ কৰি কয় যে ৰাজ্যত অধিষ্ঠিত বিজেপি নেতৃত্বাধীন চৰকাৰে প্ৰস্তাৱিত পৃথক কমতাপুৰ ৰাজ্য গঠন আৰু কোচ ৰাজবংশীক অনুসূচিত জনজাতিকৰণৰ দাবী কাৰ্যকৰী কৰাৰ পৰিৱৰ্তে চৰমভাৱে প্ৰতাৰণা কৰি আহিছে।
ঐতিহাসিক কমতাপুৰ ৰাজ্য পুনৰ গঠন আৰু জনজাতিকৰণ নকৰালৈকে আক্ৰাছু শান্ত নহয়। অহা ৬ ফেব্ৰুৱাৰীৰ পৰা অসম বিধানসভাৰ বাজেট অধিৱেশন আৰম্ভ হোৱাৰ পৰিপ্ৰেক্ষিতত অধিৱেশনৰ প্ৰথম দিনটোতে জনজাতিকৰণ আৰু পৃথক কমতাপুৰ ৰাজ্যৰ দাবী সন্দৰ্ভত সদনত আলোচনা কৰাৰ বাবে চৰকাৰক আক্ৰাছুৱে আহ্বান জনাইছে।
আনহাতে, চৰকাৰে শীঘ্ৰে আক্ৰাছুৰ দাবী সমাধান নকৰিলে আগন্তুক পঞ্চায়ত আৰু ২০১৯ৰ লোকসভা নিৰ্বাচনত আক্ৰাছুৱে বিজেপি দলৰ চৰকাৰক শ’লঠেকত পেলাব বুলিও হুংকাৰ দিয়ে।
আনহাতে,আক্ৰাছুৰ কেন্দ্ৰীয় কাৰ্যনিৰ্বাহক সভা অনুষ্ঠিত হৈ যোৱাৰ পাছত সংগঠনটোৰ কোনো উগ্ৰ সমৰ্থকে চোকা দা প্ৰদৰ্শন কৰাক কেন্দ্ৰ কৰি অপ্ৰীতিকৰ পৰিস্থিতিৰ উদ্ভৱ হয়।
সংবাদমেলত আক্ৰাছুৰ সভাপতি অৰুণ কুমাৰ ৰায়, সাধাৰণ সম্পাদক গোকুল বৰ্মন, উপদেষ্টা ক্ৰমে হিতেশ্বৰ বৰ্মন আৰু প্ৰদীপ ৰায়, মহিলা সমিতিৰ সভানেত্ৰী পূৰবী সৰকাৰ আদিকে ধৰি কেইবাগৰাকী নেতা উপস্থিত থাকে।
