বক্সি ৰিঙত নমাৰ পূৰ্বে অসম কন্যা লাভলিনা বৰগোহাঁয়ে লাভ কৰিছে কোৱাৰ্টাৰ ফাইনেল খেলাৰ সুযোগ। অষ্ট্ৰেলিয়াৰ গ’ল্ড ক’ষ্টত আজিৰ পৰা অনুষ্ঠিত হোৱা ২১ সংখ্যক কমনৱেল্থ গেমছৰ মহিলা বক্সিঙৰ সূচী অনুসৰি প্রথম ৰাউণ্ডৰ প্ৰতিযোগী নথকা সূত্ৰেই ‘বাই’ লাভ কৰি পদক জয়ৰ বাবে এখোজ আগবাঢ়িছে লাভলিনা।
৬৯ কিলোগ্ৰাম শাখাত অংশ ল’বলগীয়া লাভলিনাই এই সুযোগ লাভ কৰাৰ লগে লগে ভাৰতৰ হৈ পদক জয়ৰ সম্ভাৱণা প্ৰকট হৈ উঠিছে। কিয়নো কোৱাৰ্টাৰ ফাইনেল জিকিলেই নিশ্চিত হ’ব লাভলিনাৰ পদক।
গোলাঘাট জিলাৰ বৰপথাৰৰ জীয়ৰী লাভলিনাই কোৱাৰ্টাৰ ফাইনেলত মুখামুখি হ’ব ইংলেণ্ডৰ চেণ্ডী ৰিয়ানৰ বিপক্ষে। ভাৰতীয় ক্ৰীড়া জগতত এই খবৰ বিয়পি পৰাৰ লগে লগে বক্সিং প্ৰেমীসকল আনন্দিত হোৱাৰ লগতে বৰপথাৰৰ বৰমুথিয়া গাঁৱৰ টিকেন বৰগোহাঁই আৰু মামনি বৰগোহাঁইৰ ঘৰতো আনন্দৰ ঢৌ উঠিছে।
ইফালে পাঁচবাৰৰ বিশ্বচেম্পিয়ন তথা অলিম্পিক ব্ৰঞ্জ পদক বিজয়ী মণিপুৰৰ মেৰী কমেও প্ৰথম ৰাউণ্ড ‘বাই’ লাভ কৰি কোৱাৰ্টাৰ ফাইনেলত প্ৰৱেশ কৰিছে। কোৱাৰ্টাৰ ফাইনেলত মেৰী কমে স্কটলেণ্ডৰ মেগান গৰ্ডনৰ বিৰুদ্ধে অৱতীৰ্ণ হ’ব।
দুয়োগৰাকী মহিলা বক্সিং তাৰকাৰ বাবে কমনৱেল্থ গেমছত পদক জয়ৰ সুন্দৰ সুযোগ উপস্থিত হৈছে।
আনহাতে ২১ সংখ্যক কমনৱেল্থ গেমছত ভাৰতীয় দলক প্ৰতিনিধিত্ব কৰা আন দুগৰাকী খেলুৱৈ হ’ল ধিঙৰ কান্দুলিমাৰীৰ বাসিন্দা হিমা দাস আৰু গুৱাহাটী মহানগৰীৰ বাসিন্দা নয়নমণি শইকীয়া। হিমাই ২০০ মিটাৰ আৰু ৪০০ মিটাৰ দৌৰত আৰু নয়নমণিয়ে লন বল প্ৰতিযোগিতাত প্ৰতিদ্বণ্ডিতা আগবঢ়াব।
