কাজিৰঙা ৰাষ্ট্ৰীয় উদ্যানত অহা ২৫ৰ পৰা ২৮ মাৰ্চলৈকে হ’ব গঁড় গণনা (Rhino Population Estimation 2018)। উদ্যানখনৰ সঞ্চালক আকাশ দীপ বৰুৱাই এই সন্দৰ্ভত আজি সোমবাৰে বিভাগীয় জাননী জাৰি কৰিছে।
গঁড় গণনা কাৰ্য্যসূচীৰ বাবে ‘২৬ মাৰ্চত কাজিৰঙা সংমণ্ডল, কহঁৰা; পশ্চিম সংমণ্ডল, বাগৰী আৰু বুঢ়াপাহাৰ সংমণ্ডল, ঘোৰাকাতিত আৰু ২৭ মাৰ্চত পূব সংমণ্ডল, অগৰাতলীত জীপ ছ্ফৰ’ আৰু ‘২৬ৰ পৰা ২৮ মাৰ্চলৈকে উদ্যানখনৰ সকলো এলেকাতে পৰ্য্যটকৰ হাতী ছফৰ’ বন্ধ থাকিব বুলি জাননীখনত কোৱা হৈছে।
বিভাগীয় সূত্ৰই জনোৱা মতে গঁড় গণনাকাৰীসকলৰ বাবে ২৫ মাৰ্চত কাজিৰঙাৰ কহঁৰাত বিশেষ প্ৰশিক্ষণৰ ব্যৱস্থা কৰা হ’ব৷
২৬ মাৰ্চত কাজিৰঙাৰ মাজেদি যোৱা ডিফলু নদীৰ দক্ষিণ পাৰৰ মুঠ ৪৪ টা কম্পাৰ্টমেন্টত আৰু ২৭ মাৰ্চত উত্তৰ পাৰৰ মুঠ ৩৬ টা কম্পাৰ্টমেন্টত হাতী লৈ এই গণনা কাৰ্য চলোৱা হ’ব৷
মূল গণনা হৈ যোৱাৰ পিছত ২৮ মাৰ্চত নিৰ্বাচিত কেইটামান কম্পাৰ্টমেন্টত এক বিশেষ নমুনা জৰীপ কৰা হ’ব৷ সংগৃহীত তথ্যসমূহ বিশ্লেষণ কৰি ২৮ মাৰ্চৰ পিছত কাজিৰঙাৰ গঁড় গণনা, ২০১৮ত পোৱা গঁড়ৰ সংখ্যা চূড়ান্ত কৰা হ’ব৷
গঁড় গণনা, ২০১৮ত বনবিভাগৰ বিভিন্ন বিষয়াৰ লগতে বিভিন্ন বেচৰকাৰী সংগঠন আৰু সাংবাদিকেও অংশগ্ৰহণ কৰিব৷
কাজিৰঙাত পূৰ্বে ২০১৩ চনৰ গণনাত ২,৩২৯ টা আৰু ২০১৫ চনৰ গণনাত ২,৪০১ টা গঁড় পোৱা গৈছিল৷
উল্লেখযোগ্য যে কাজিৰঙাত প্ৰণালীবদ্ধভাৱে গঁড় গণনাৰ কাম ১৯৬৫ চনত প্ৰথমবাৰৰ বাবে আৰম্ভ কৰা হৈছিল আৰু সেই গণনাত ৰাষ্ট্ৰীয় উদ্যানখনত মুঠ ৩৬৬ টা গঁড় পোৱা গৈছিল৷
পূৰ্বতে কাজিৰঙাত প্ৰতি চাৰি বছৰৰ মূৰে মূৰে গঁড় গণনা কৰা হৈছিল যদিও সম্প্ৰতি দুবছৰৰ মূৰে মূৰে গঁড় গণনা কৰা হয়।
