বিগত কেইবা দশক ধৰি সমাধান নোহোৱা নাগা সমস্যা সমাধানৰ বাবে নৰেন্দ্ৰ মোডী নেতৃত্বাধীন কেন্দ্ৰীয় চৰকাৰে এটা সমাধানৰ বাট মুকলি কৰাৰ বাবে সদায় আগ্ৰহী বুলি মত পোষন কৰে বিজেপিৰ ৰাষ্ট্ৰীয় সাধাৰণ সম্পাদক ৰাম মাধৱে।
বৃহস্পতিবাৰে ৰাষ্ট্ৰীয় সাধাৰণ সম্পাদকগৰাকীয়ে নাগা চুক্তি সমাধানৰ বিষয়টোত পৰ্যাপ্ত পৰিমানৰ অগ্ৰগতি লোৱা বুলি ইণ্ডিয়ান এক্সপ্ৰেছৰ আগত প্ৰকাশ কৰিছে। তদুপৰি নাগালেণ্ডৰ শাসনাধিষ্ঠ দল নাগা পিপলছ ফ্ৰণ্ট(এন পি এফ)ৰ লগত বিজেপিৰ সম্পৰ্কত ফাঁট মেলিছে যদিও ৰাষ্ট্ৰীয় দলটোৱে নিৰ্বাচনৰ সময়ত ৰাজ্যখনত স্থিৰতা বিচাৰিছে।
ৰাষ্ট্ৰীয় সম্পাদকগৰাকীয়ে জনোৱা অনুসৰি বিজেপিয়ে ৰাজ্যখনত নিৰ্বাচনৰ বাবে সকলো ধৰণৰ বাট মুকলি কৰি ৰাখিছে। ‘আমি ৰাজ্যখনত এখন স্থিৰ আৰু উন্নয়নমূলক মনোভাবৰ চৰকাৰ বিচাৰো,’ ৰাষ্ট্ৰীয় বাতৰিকাকতখনৰ সৈতে হোৱা আছুতীয়া সাক্ষাতকাৰত এই দৰে কয় মাধৱে। ইয়াৰ উপৰি উক্ত সাক্ষাতকাৰৰ সময়তে নেতাজনে কয় যে আমি ৰাজ্যখনত নাগা সমস্যা সমাধান কৰা এখন চৰকাৰ গঠন হোৱাৰ কামনা কৰো।
এক বিশেষ সূত্ৰৰ পৰা পোৱা তথ্য অনুসৰি নাগালেণ্ডত বিজেপিয়ে নেশ্যনেলিষ্ট ডেম’ক্ৰেটিক প্ৰগ্ৰেছিভ পাৰ্টী(এন ডি পি পি)ৰ সৈতে সহযোগিতা কৰি নিৰ্বাচনী বৈতৰণী পাৰ হোৱাৰ পৰিকল্পনা কৰিছে। লক্ষ্যণীয় যে তিনিটা কাৰ্যকালৰ প্ৰাক্তন মুখ্য মন্ত্ৰী নেইফিও ৰিঅ’ই এন পি এফ দল ত্যাগ কৰি কিছুদিন পূৰ্বে এন ডি পি পিত যোগদান কৰিছিল। স্মৰ্তব্য যে বিজেপিয়ে এতিয়ালৈ কোনো এখন ৰাজ্যৰে মুখ্য মন্ত্ৰী পদৰ প্ৰাৰ্থী ঘোষণা কৰা নাই।
সাক্ষাতকাৰৰ সময়ত ৰাম মাধৱে তাৎপৰ্যমূলক মন্তব্য কৰি কয় যে তিনিখন ৰাজ্যৰ ভিতৰত ত্ৰিপুৰা নিৰ্বাচন বিজেপিৰ বাবে আটাইতকৈ ডাঙৰ প্ৰত্যাহ্বান। তদুপৰি তেওঁ মন্তব্য কৰে যে চি পি আই(এম) নেতৃত্বাধীন মানিক সৰকাৰৰ শাসন কালত ত্ৰিপুৰাৰ উন্নয়ন ৰেখা বেয়াকৈ তললৈ ধাৱমান হৈছে।
ত্ৰিপুৰাৰ নিৰ্বাচনত প্ৰথমবাৰৰ বাবে দেশবাসীয়ে সাক্ষী হৈ ৰ’ব বিজেপি আৰু বাম মৰ্চাৰ মাজৰ পোনপটিয়া যুঁজৰ।
আনহাতে মানিক সৰকাৰ নেতৃত্বাধীন ত্ৰিপুৰাত এতিয়াও চতুৰ্থ দৰমহা আয়োগ প্ৰৱৰ্তন হৈ থকা কাৰ্যক গৰিহনা দিছে ৰাম মাধৱে। ‘ত্ৰিপুৰাত আমাৰ চৰকাৰ গঠন হোৱাৰ ২৪ ঘণ্টা পিছতে ৰাজ্যৰ চৰকাৰী কৰ্মচাৰীলৈ উপহাৰ হিচাপে সপ্তম দৰমহা আয়োগ প্ৰৱৰ্তন কৰিম,’ এই কথা ব্যক্ত কৰে ৰাষ্ট্ৰীয় সম্পাদকজনে।
তদুপৰি ত্ৰিপুৰা খিলঞ্জীয়া মঞ্চ(Indigenous People’s Front of Tripura)ৰ সৈতে মিত্ৰতা কৰা বিজেপিয়ে খিলঞ্জীয়া লোক সকলৰ সামাজিক-অৰ্থনৈতিক উন্নয়নৰ পক্ষত সদায় থিয় দিব বুলিও ৰাম মাধৱে সাক্ষাতকাৰৰ জৰিয়তে প্ৰকাশ কৰে।
উক্ত সাক্ষাতকাৰৰ সময়তে তেওঁ আশা প্ৰকাশ কৰি কয় যে অইন বছৰৰ নিৰ্বাচনৰ তুলনাত এইবাৰৰ মেঘালয়ৰ নিৰ্বাচনত বিজেপিয়ে অধিক সংখ্যক আসন লাভ কৰিব।
