কোকৰাঝাৰত ১৫ জুলাইৰ পুৱতি নিশা সেনা বাহিনীৰ ১২ শিখ লী বেটেলিয়ন, কোকৰাঝাৰ আৰক্ষী আৰু চিআৰপিএফৰ কোব্ৰা গোটে যুটীয়া অভিযান চলাই কমতাপুৰ লিবাৰেশ্যন অৰ্গেনাইজেশ্যন সংগঠনৰ দুজন সদস্যক আটক কৰিবলৈ সক্ষম হয়।
এক বিশেষ সূত্ৰৰ পম খেদি সেনা, অৰ্ধ-সামৰিক বাহিনী আৰু আৰক্ষীৰ এই যুটীয়া গোটটোৱে শিলকাটাটি পাৰ্ট-২ গাঁৱত সংগঠনটোৰ সদস্য দুজনক আটক কৰিবলৈ সক্ষম হয়। এই সদস্য দুজনে বাংলাদেশত প্ৰশিক্ষণ লৈছিল বুলি জানিব পৰা হৈছে।
সূত্ৰৰ পৰা জানিব পৰা মতে ১৫ জুলাইৰ পুৱতি নিশা প্ৰায় ৪.২০ বজাত সেনা, অৰ্ধ-সামৰিক আৰু আৰক্ষীৰ যুটীয়া তালাচী দলটোৱে দুজন যুৱকক সন্দেহজনকভাৱে ঘূৰা-ফিৰা কৰি থকা দেখা পায়। তালাচী দলটোৱে সন্দেহজনক যুৱক দুজনক প্ৰত্যাহ্বান জনায়। কিন্তু সেই যুৱক দুজনে তালাচী দলটোৰ পৰা পলাই যাবলৈ উদ্যত হয়। কিন্তু উগ্ৰপন্থীৰ সন্ধানত অভিযান চলোৱা নিৰাপত্তাৰক্ষীৰ দলটোৱে তেওঁলোকক খেদি খেদি কৰায়ত্ব কৰিবলৈ সক্ষম হয়।
উল্লেখ্য যে কৰায়ত্ব কৰাৰ পাছত তালাচী দলটোৱে ধৃত যুৱক দুজনক সেই ঠাইতেই জেৰা কৰিবলৈ আৰম্ভ কৰে। আৰু জেৰাত তেওঁলোকে নিজকে ‘কমতাপুৰ লিবাৰেশ্যন অৰ্গেনাইজেশ্যন’ৰ সৈতে সক্ৰিয়ভাৱে জড়িত বুলি স্বীকাৰোক্তি দিয়ে।
উগ্ৰপন্থী দুজনক যথাক্ৰমে কোকৰাঝাৰ জিলাৰ বদৰপুৰৰ অন্তৰ্গত ২নং চৌতাকি গাঁৱৰ প্ৰয়াত সুধীশ বৰ্মণৰ পুত্ৰ কৃষ্ণ বৰ্মণ ওৰফে মনোজ কোচ (১৯) আৰু আনজনক একে গাঁৱৰে প্ৰয়াত ভোলা বৰ্মণৰ পুত্ৰ সম্বাৰু বৰ্মণ ওৰফে খুণ্ডু বুলি চিনাক্ত কৰা হৈছে।
সূত্ৰটোৱে আৰু জনাইছে যে কমতাপুৰ লিবৰেশ্যন অৰ্গেনাইজেশ্যনৰ এই উগ্ৰপন্থী সদস্য দুজন হৈছে বাংলাদেশত প্ৰশিক্ষণ লাভ কৰা ২০১৬ চামৰ সদস্য আৰু সংগঠনটোৰ ছেৰফাংগুৰি শাখাৰ এটা অংশ।
এই সদস্য দুজনে ধন দাবী কৰা আৰু উঠি অহা চামক উগ্ৰপন্থী গোটটোত যোগ দিয়াৰ বাবে প্ৰৰোচিত কৰা আদিত জড়িত আছিল।
উগ্ৰপন্থী সদস্যকেইজনৰ জিম্মাৰ পৰা দুটা দেশীয়ভাৱে নিৰ্মিত পিষ্টল আৰু চাৰি ৰাউণ্ড গুলী উদ্ধাৰ কৰিবলৈ সক্ষম হয়। অধিক তথ্যৰ বাবে বৰ্তমান উগ্ৰপন্থী সদস্য দুজনক জেৰা কৰি থকা হৈছে।
