“চৰকাৰী বিদ্যালয় সমূহত ভালকৈ পাঠদান নকৰে বুলি থকা ৰাইজৰ অভিযোগ বোৰৰ সমান্তৰালকৈ ৰাজ্যত পৰ্য্যাপ্ত পৰিমানে গঢ়লৈ উঠিছে ব্যক্তিগত খণ্ডৰ একাধিক শিক্ষানুষ্ঠান ৷ গুণগত মানদণ্ডৰ শিক্ষা প্ৰদান কৰিব নোৱাৰিলে এখন বিদ্যালয় কেতিয়াও উন্নত মানৰ শিক্ষানুষ্ঠান হ‘ব নোৱাৰে,”-এই মন্তব্য বিশিষ্ট শিক্ষাবিদ তথা বঢ়মপুৰ উচ্চতৰ মাধ্যমিক বিদ্যালয়ৰ অৱসৰ প্ৰাপ্ত শিক্ষক প্ৰদীপ গোস্বামীৰ৷
বৃহস্পতিবাৰে নগাঁও জিলাৰ চামগুৰিত নতুনকৈ আত্ম প্ৰকাশ কৰা “সৰস্বতী কনিষ্ঠ মহাবিদ্যালয়”ৰ শুভাৰম্ভ অনুষ্ঠানত উপস্থিত থাকি বিশিষ্ট শিক্ষাবিদ গৰাকীয়ে আৰু কয় যে, ” নৈতিক শিক্ষাৰ অবিহনে ছাত্ৰ- ছাত্ৰী সকলে কেৱল মাত্ৰ পুথিগত বিদ্যাৰে শিক্ষাৰ পোহৰ পাব পাৰে ,কিন্তু জ্ঞানী হ‘ব নোৱাৰে ৷ শিক্ষক,অভিভাৱক আৰু ছাত্ৰ-ছাত্ৰীৰ পাৰস্পৰিক সহযোগিতাতহে এখন উচ্চমানৰ শিক্ষানুষ্ঠান গঢ়লৈ উঠাটো সম্ভৱ ৷”
সৰস্বতী একাডেমীৰ প্ৰধান শিক্ষক ৰূপজ্যোতি মহন্তই আঁতধৰা সৰস্বতী কনিষ্ঠ মহাবিদ্যালয়ৰ শুভাৰম্ভ অনুষ্ঠানটোৰ আৰম্ভণিতে চামগুৰিৰ সু সন্তান প্ৰমোদ কলিতাই নিৰ্মাণ কৰি দিয়া কনিষ্ঠ মহাবিদ্যালয়খনিৰ নতুন ভৱনটো উদ্বোধন কৰে শিক্ষাবিদ তথা বৈষ্ণৱ পণ্ডিত বনমালি কলিতাই ৷
চামগুৰি উচ্চতৰ মাধ্যমিক বিদ্যালয়ৰ অধ্যক্ষ দুৰ্লভ কুমাৰ মহন্তই বিভিন্ন শিক্ষানুষ্ঠানৰ লগত যোগসূত্ৰ ৰাখি নতুন উদ্যমেৰে কাম কৰি যাবলৈ উদ্যোক্তা সকলক আহ্বান জনোৱাৰ লগতে ছাত্ৰ-ছাত্ৰী সকলৰ মাজত বৰ্তমান সৃষ্টি হোৱা উশৃংখল পৰিবেশৰ প্ৰতি অভিভাৱক সকলক চোকা দৃষ্টি ৰাখিবলৈ আহ্বান জনায়।
সভাত কলিয়াবৰ জিলা বিজেপিৰ সভাপতি অনিল শইকীয়া উপস্থিত থাকি ছাত্ৰ -ছাত্ৰী সকলক সংস্কাৰিতভাৱে শিক্ষামূলক প্ৰতিযোগিতাত অৱতীৰ্ণ হ‘বলৈ আহ্বান জনোৱাৰ লগতে পিতৃ,মাতৃ আৰু জ্যেষ্ঠজনক সন্মান তথা মাতৃভাষাৰ প্ৰতি শ্ৰদ্ধাশীল আৰু সমাজৰ প্ৰতি দায়বদ্ধ হ‘বলৈ নৱ প্ৰজন্মক আহ্বান জনায় ৷
ভাষণ প্ৰসংগত শইকীয়াই লগতে কয় যে, পিতৃ,মাতৃৰ আশীৰ্বাদ অবিহনে কোনো সন্তানে জীৱনত কেতিয়াও প্ৰকৃত উন্নতিৰ পথত আগুৱাব নোৱাৰে ৷ উক্ত শুভাৰম্ভ অনুষ্ঠানত বিশিষ্ট শিক্ষাবিদ লীলাকান্ত মহন্ত, ভদ্ৰ কলিতা, প্ৰদীপ কুমাৰ কলিতা, স্বপন দাসকে প্ৰমুখ্য কৰি কেইবাগৰাকীও গণ্য মান্য লোক উপস্থিত থাকি শৈক্ষিক ক্ষেত্ৰৰ বিভিন্ন দিশৰ ওপৰত তত্বগধুৰ ভাষণ প্ৰদান কৰে ৷
