‘চলো পালটাই’ ‘চলো পালটাই’ এই শ্লোগানেৰে আসন্ন ত্ৰিপুৰা নিৰ্বাচনৰ বাবে ৰণডংকা বজালে বিজেপিৰ ৰাষ্ট্ৰীয় অধ্যক্ষ অমিত শ্বাহে। ৰবিবাৰে আম্বাছা আৰু কুলাইত দুখন জনসভাত অংশগ্ৰহণ কৰি ত্ৰিপুৰা জনতাক উদ্দেশ্যি অধ্যক্ষগৰাকীয়ে এই শ্লোগান আওৰায়। এই শ্লোগানৰ অৰ্থ হ’ল পৰিৱৰ্তন কৰা বা চি পি এম নেতৃত্বাধীন মানিক সৰকাৰৰ চৰকাৰখন ওফৰায় বিজেপি নেতৃত্বাধীন চৰকাৰ প্ৰতিষ্ঠা কৰা।
ৰাষ্ট্ৰীয় অধ্যক্ষগৰাকীয়ে জনসভা দুখনত ৰাইজক উদ্দেশ্যি কয় যে দীৰ্ঘ দিনে শাসন চলোৱা মানিক সৰকাৰৰ দিনত চাৰিওফালে দুৰ্নীতি শিপোৱাৰ উপৰি উন্নয়ন একেবাৰে স্থৱিৰ হৈ পৰিছে। য’ত কংগ্ৰেছ আৰু বাওঁপন্থী দলে ৰাজ্যৰ শাসনভাৰ লৈছে তাতেই দুৰ্নীতি হৈছে। কিন্তু ইয়াৰ বিপৰীতে বিজেপি শাসনাধিষ্ঠ ৰাজ্যকেইখনত দুৰ্নীতি নিৰ্মূল হোৱাৰ উপৰি উন্নয়নো অধিক ক্ষীপ্ৰতাৰে গতি কৰিছে।
আনহাতে অধ্যক্ষ শ্বাহে মানিক সৰকাৰ নেতৃত্বাধীন চৰকাৰখনৰ বিৰুদ্ধে অপশাসনৰ অভিযোগ তুলি ত্ৰিপুৰাবাসীক নিজৰ ভৱিষৎ উজ্জল কৰাৰ স্বাৰ্থত বিজেপিক ভোট দিবলৈ আহ্বান জনায়।
‘অভূতপূৰ্ব জনসমাগম দেখি মই সম্পূৰ্ণ আত্মবিশ্বাসী যে এইবাৰ ত্ৰিপুৰাবাসীয়ে ৰাজ্যখনৰ পৰিৱৰ্তনৰ স্বাৰ্থত ওলাই আহিছে। মহিলাৰ ওপৰত অপৰাধজনিত সমস্যা অভাৱনীয়ভাবে বৃদ্ধিৰ লগতে ৰাজ্যখনৰ আইন কানুন ব্যৱস্থা থান বান হৈছে’। এই মন্তব্য অমিত শ্বাহৰ।
ইয়াৰ উপৰি কয়, ‘বিজেপি চৰকাৰে যোগাত্মক প্ৰশাসনিক পৰিৱৰ্তনেৰে কেৱল মানুহৰ জীৱন পদ্ধতি সলনি কৰাৰহে স্বাৰ্থত কাম কৰে’।
মনকৰিবলগীয়া যে বিজেপি অধ্যক্ষগৰাকীয়ে ত্ৰিপুৰা বিধানসভা নিৰ্বাচন উপলক্ষে ৰাজ্যখনত বিজেপিৰ আয়োজিত জনসভাত অংশগ্ৰহণ কৰাৰ উদ্দেশ্যৰে দুদিনীয়া ভ্ৰমণ কাৰ্যসূচীৰে ৰাজ্যখনত উপস্থিত হৈছে।
তাৎপৰ্যমূলক কথা যে যদিহে ত্ৰিপুৰাবাসীয়ে পৰিৱৰ্তনৰ স্বাৰ্থত বিজেপিক ভোটদান কৰে তেন্তে চৰকাৰী কৰ্মচাৰী সকলক সপ্তম দৰমহা আয়োগত সন্নিবিষ্ট কৰা আৰু শ্ৰমিকসকলৰ দৈনিক বেতন দুগুন বৃদ্ধি কৰাৰ আশ্বাস প্ৰদান কৰে ৰাষ্ট্ৰীয় অধ্যক্ষ অমিত শ্বাহে।
অহা মাৰ্চ মাহত ত্ৰিপুৰাৰ লগতে নাগালেণ্ড আৰু মেঘালয়ত বিধানসভা নিৰ্বাচন অনুষ্ঠিত হ’ব। লক্ষ্যণীয় যে ১৯৯৩চনৰ পৰা আজি পৰ্যন্ত ত্ৰিপুৰাত চি পি আই(এম)দলে শাসন ভাৰ দখল কৰি থকাৰ বিপৰীতে নাগালেণ্ডত যোৱা পোন্ধৰ বছৰে বিজেপি নাগা পিপলছ ফ্ৰণ্টৰ লগত মিত্ৰতাত আছে। আনহাতে মেঘালয় চৰকাৰ আছে কংগ্ৰেছৰ দখলত।
