যোৱা ৮ জুনত কাৰ্বি আংলং জিলাৰ ডকমকা আৰক্ষী থানাৰ অধীনস্থ এলেকাত দুই উদীয়মান তথা প্ৰতিভাৱান যুৱক নীলোৎপল দাস আৰু অভিজিত নাথক বৰ্বৰোচিত আক্ৰমণ কৰি হত্যা কৰা ঘটনাক কটন বিশ্ববিদ্যালয় শিক্ষক সংস্থাই তীব্ৰ গৰিহনা দিছে।
সংস্থাই মানৱতাক আঘাত কৰা এই মৰ্মান্তিক ঘটনাত জড়িত দুষ্কৃতিকাৰীক শীঘ্ৰে তদন্তৰ জৰিয়তে যথোচিত শাস্তি প্ৰদান কৰিবলৈ সংশ্লিষ্ট কৰ্তৃপক্ষলৈ আহ্বান জনাইছে।
এই প্ৰসংগতে সংস্থাই কটন বিশ্ববিদ্যালয়ৰ অধ্যাপক নিবাসত যোৱা ১৭ এপ্ৰিলত সংঘটিত হোৱা অধ্যাপক ড° বিভা দেৱীৰ নিৰ্মম হত্যাকাণ্ডৰ আজিলৈকে বিচাৰ প্ৰক্ৰিয়া ত্বৰান্বিত নকৰা কাৰ্যত আশ্বৰ্য প্ৰকাশ কৰে। সংস্থাই প্ৰয়াত বিভা দেৱী সমন্বিতে শেহতীয়াভাৱে সংঘটিত আটাইবোৰ বৰ্বৰোচিত হত্যাকাণ্ডৰ ফাষ্টট্ৰেক আদালতৰ জৰিয়তে বিচাৰ প্ৰক্ৰিয়া সমাপ্ত কৰি দোষীক উপযুক্ত শাস্তি প্ৰদান কৰিবলৈ দাবী জনায়।
উল্লেখযোগ্য যে সংবাদ মাধ্যমলৈ প্ৰেৰণ কৰা এক বিবৃতিযোগে এই কথা জানিবলৈ দিছে কটন বিশ্ববিদ্যালয় শিক্ষক সংস্থাৰ সভাপতি ড° প্ৰহাস চন্দ্ৰ শৰ্মা আৰু সম্পাদক ড° ৰুমা তালুকদাৰে।
