যোৱা ৮ জুনত কাৰ্বি আংলঙৰ ডকমকাত এদল উন্মত্ত লোকে গুৱাহাটীৰ দুজন যুৱকক মৰিয়াই হত্যা কৰা ঘটনাৰ গোচৰটো যিমান সম্ভৱ শীঘ্ৰে সমাপ্ত কৰা আৰু নিৰ্দ্ধাৰিত ৯০ দিনৰ ভিতৰত অভিযোগনামা দাখিল কৰাটো নিশ্চিত কৰিবলৈ গুৱাহাটী উচ্চ ন্যায়ালয়ে ৰাজ্য চৰকাৰক নিৰ্দেশ দিছে।
সমগ্ৰ ৰাজ্য কঁপাই যোৱা ডকমকাৰ উক্ত ঘটনাটোৰ নিজাববীয়াকৈ গ্ৰহণ কৰা দুখনৰ লগতে এগৰাকী অধিবক্তা সীমা ভূঞাই দাখিল কৰা এখন জনস্বাৰ্থ জড়িত আবেদনৰ শুনানি গ্ৰহণ কৰি বৃহস্পতিবাৰে গুৱাহাটী উচ্চ ন্যায়ালয়ৰ মুখ্য ন্যায়াধীশ অজিত সিং আৰু ন্যায়াধীশ অচিন্ত্য মল্ল বুজৰবৰুৱাৰ খণ্ড বিচাৰপীঠে এই নিৰ্দেশ প্ৰদান কৰে।
ডকমকাৰ পানজুৰিত সোপাধৰা সন্দেহত গুৱাহাটীৰ দুজন যুৱক অভিজিৎ নাথ আৰু নীলোৎপল দাসক হত্যা কৰাৰ অপৰাধত মূল অভিযুক্ত আলফাজ’জকো ধৰি ৩৬ জন লোকক গ্ৰেপ্তাৰ কৰা হৈছে। এই সকলোবোৰ অভিযুক্ত বৰ্তমান কাৰবন্দী হৈ থকাৰ কথা চৰকাৰে আদালতক অৱগত কৰিছে।
আদালতে দিয়া বৃহস্পতিবাৰৰ নিৰ্দেশটোৰ লগতে অহা ১৬ আগষ্টত আবেদন কেইখনৰ পৰৱৰ্তী শুনানিৰ দিন ধাৰ্য কৰিছে। ইপিনে, ৰাজ্যত উৰা বাতৰি বিয়পোৱা আৰু সোপাধৰাকে ধৰি বিভিন্ন সন্দেহত মানুহক মৰিয়াই হত্যা কৰা ঘটনা ৰোধ কৰাৰ বাবে গ্ৰহণ কৰা কাৰ্যকৰী ব্যৱস্থা সন্দৰ্ভত ২৬ জুলাইত শপতনামা দাখিল কৰিবলৈ ৰাজ্য চৰকাৰক পূৰ্বৰ শুনানিত আদালতে নিৰ্দেশ দিছিল।
এই ক্ষেত্ৰত ৰাজ্য চৰকাৰে শপতনামা দাখিলৰ বাবে অতিৰিক্ত সময় বিচাৰি কৰা আবেদন মঞ্জুৰ কৰে।
