আগন্তুক বাৰিষাত ল’ব লগীয়া ভূমিকা সন্দৰ্ভত আলোচনা কৰিবলৈ সোমবাৰে হাফলং আৱৰ্ত ভৱনত উপায়ুক্ত অমিতাভ ৰাজখোৱাৰ উপস্থিতিত দুৰ্যোগ ব্যৱস্থাপনা বিভাগৰ এখন সভা অনুষ্ঠিত হৈ যায়।
উপস্থিত সদস্যসকলৰ ভিতৰত আছিল ৪৩ আছাম ৰাইফলছৰ কৰ্নেল গগন পাণ্ডে, ডিমা হাচাওৰ আৰক্ষী অধীক্ষক প্ৰশান্ত শইকীয়া।
এই সম্পৰ্কত ডিমা হাচাওৰ জিলা দুৰ্যোগ ব্যৱস্থাপনা কৰ্তৃপক্ষৰ জিলা প্ৰকল্প বিষয়া ৰিকি ফুকনে এক সংক্ষিপ্ত উপস্থাপন আগবঢ়ায়।
আগন্তুক বাৰিষা কালত কেনেধৰণে মোকাবিলা কৰিব তথা দুৰ্যোগ প্ৰতিৰোধ সম্পৰ্কে আলোচনা কৰা হয়।
উল্লেখযোগ্য যে বাৰিষা কালত ডিমা হাচাওৰ বিভিন্ন অঞ্চল ভূমিস্খলনৰ ফলত ভালেমান লোক ক্ষতিগ্ৰস্ত হোৱাৰ লগতে অসুবিধাৰ সন্মুখীন হয়। এই বিষয়ে আলোচনা কৰাৰ লগতে কেনেদৰে এই অসুবিধা সমূহৰ পৰা পৰিত্ৰাণ পাব পাৰি সেই সম্পৰ্কেও আলোচনা কৰে।
আলোচনাৰ পিছত এইটো সিদ্ধান্ত কৰা হয় যে নিৰ্বাচিত স্থান কিছুমানত এই বিভাগে তাৎক্ষণিকভাৱে মাটি আঁতৰোৱা, গছ কটা আদি কামৰ লগতে সকলো ধৰণৰ উদ্ধাৰ অভিযানৰ বাবে সাজু হৈ থাকিব আৰু লগতে সঁজুলি আৰু যন্ত্ৰ-পাতি যোগাৰ ৰাখিব।
আলোচনা কালত প্ৰতিটো সংশ্লিষ্ট বিভাগক কেনেকৈ সাজু হৈ থাকিব লাগে তাৰ কিছুমান দিহা-পৰামৰ্শ দাঙি ধৰা হয়। সভাত উদ্ধাৰ কাৰ্য্যত ভাগ ল’ব পৰাকৈ কিছুমান গাওঁ দুৰ্য্যোগ ব্যৱস্থাপনা সমিতি গঠন কৰাৰো সিদ্ধান্ত লোৱা হয়।
আনহাতে গাওঁ অঞ্চলবোৰত দুৰ্যোগৰ বলি হোৱাসকলৰ পৰিয়ালৰ বাবে চৰকাৰে দিয়া ক্ষতিপূৰণৰ বাবে আৱেদন পাবলৈ এতিয়াও বাকী বুলি জিলাৰ উপায়ুক্তই জানিবলৈ দিয়ে। উপায়ুক্তগৰাকীয়ে সংশ্লিষ্ট বিভাগৰ বিষয়াসকলক এই বিষয়টো তদাৰক কৰিবলৈ নিৰ্দেশ দিয়ে।
