আজি অসমৰ ঐতিহাসিক চহৰ তেজপুৰলৈ অহা বিজেপিৰ বিতৰ্কিত নেতা সুব্ৰমনিয়ন স্বামীয়ে ৰটাৰি ক্লাবৰ এটা কাৰ্য্যসূচীত ভাগ লৈ কেইবাটাও বিতৰ্কিত মন্তব্য কৰে। নিজৰ ভাষণত ৰাজ্যসভাৰ সাংসদৰ দৰে সাংবিধানিক পদত থকা নেতাজনে উগ্ৰপন্থীসকলক গুলীয়াই মাৰিব লাগে বুলি এক বিতৰ্কিত মন্তব্য কৰে। পাকিস্তান সন্দৰ্ভতো অতি বিতৰ্কিত মন্তব্য দি কয় যে পাকিস্তানক চাৰিভাগত টুকুৰা-টুকুৰ কৰি দিলেই তাত থকা সন্ত্ৰাসবাদীৰ সমস্যা নোহোৱা হ’ব। একেদৰে তেওঁ প্ৰতিৱেশী চীনৰ বিষয়েও তাৎপৰ্য্যপূৰ্ণ মন্তব্য দি কয় যে চীনৰ সৈতে ভাৰতে বন্ধুত্ব স্থাপন কৰিব লাগে, কিন্তু চীনক কোনোপধ্যে আগ বাঢ়িবলৈ দিব নালাগে। আনহাতে পশ্চিম বংগৰ মুখ্য মন্ত্ৰী মমতা বেনাৰ্জী সন্দৰ্ভতো মন্তব্য দি কয় যে মমতা বেনাৰ্জীক কোনেও গুৰুত্ব দিব নালাগে। মমতাৰ মন্তব্যৰ কোনো গুৰুত্ব নাই। কাৰণ মমতাই যিহকে পাই তাকে কয়। মমতাৰ বিৰুদ্ধে প্ৰকৃততে বহুতো গোচৰেই দিব পৰা যায়। কিন্তু কিমান গোচৰ দিব। গতিকে মমতাৰ কথাৰ কোনো গুৰুত্ব নাই বুলি তেওঁ দাবী কৰে। অসমত বিদেশী এজনো থাকিব নালাগে। সকলোকে চিনাক্ত কৰি বহিষ্কাৰ কৰিব লাগে। -অসমৰ বিদেশী সমস্যা সন্দৰ্ভত এইদৰে মন্তব্য কৰে সাংসদজনে।
আনহাতে আজি পুৱা স্বামীয়ে সপত্নীক তেজপুৰৰ ঐতিহাসিক মহাভৈৰৱ মন্দিৰ দৰ্শন কৰিছিল। অসমত পৰ্য্যটনৰ যথেষ্ট সম্ভাৱনা থকাৰ কথা স্বীকাৰ কৰি তেওঁ ইয়াৰ যাতায়াত ব্যৱস্থাৰ পুতৌজনক অৱস্থাৰ বাবে খেদ প্ৰকাশ কৰে। তেওঁ তেজপুৰ চহৰক দেশৰ অন্য প্ৰান্তৰ লগত বিমান সেৱাৰ যোগাযোগ স্থাপন কৰাৰ বাবে কেন্দ্ৰীয় চৰকাৰৰ ওপৰত হেঁচা দিব বুলি কয়। বিমান সেৱাৰ লগতে ৰেইল সেৱাৰেও চহৰখনক সংযোগ কৰাত গুৰুত্ব দিয়াৰ প্ৰতিশ্ৰুতি দিয়ে।
উল্লেখযোগ্য যে বিজেপিৰ নেতাজন নিজৰ মন্তব্যৰে সততে বিতৰ্কৰ মাজত থকাৰ প্ৰৱণতা সকলোৰে বিদিত। অলপতে তেওঁ নতুনকৈ ৰাজনৈতিক দল গঠন কৰিবলৈ ওলোৱা দক্ষিণৰ নেতা ৰজনীকান্ত সন্দৰ্ভতো বিতৰ্কিত মন্তব্য দিছিল।
আনহাতে আজি আবেলি নেতাজনে তেজপুৰ ভ্ৰমণ অভিজ্ঞতা সন্দৰ্ভত নিজৰ সন্তুষ্টি প্ৰকাশ কৰি এটা টুইট কৰে।
