জীয়াই থকাৰ বাবে জীৱন সংগ্ৰামৰ কাহিনীতকৈয়ো কিছু গভীৰ এই মানৱ অস্তিত্বৰ কৰুণ গাথা। ত্ৰিপুৰাত বিগত বহু বছৰ ধৰি এটি আঠজনীয়া পৰিয়ালে বন্যাভৰণৰ মাজত এক দু:সহ জীৱন যাপন কৰি আহিছে।
বসবাসৰ বাবে এটুকুৰা উপযুক্ত স্থানৰ অভাৱত পাৰ হৈ যোৱা বছৰবোৰ চৰম দুৰ্দশাৰ মাজেৰে পাৰ কৰিছে মাৰ্জিন দেববাৰ্মা নামৰ লোকজনৰ আঠজনীয়া পৰিয়ালটোৱে।
তেওঁলোকৰ ঘৰটোৰ চাৰিবেৰ কলপাতেৰে নিৰ্মিত। গৰমেই হওক বা শীতেই হওঁক, বৰষুণেই হওঁক কিম্বা তাপেই হওঁক এই কলপাতৰ বেৰ চাৰিখনেই পৰিয়ালটোক সকলো সময়তে সুৰক্ষা দি আহিছে।
আধুনিক ভাৰতৰ আন এক ছবি য’ত আনকি স্বাধীনতাৰ ৭০ বছৰ পিছতো উত্তৰ-পূৰ্বাঞ্চলৰ ৰাজ্যৰ লোকে থাকিবলৈ এটুকুৰা বাসোপযোগী স্থান বিচাৰি পোৱা নাই।
মাৰ্জিন দেববাৰ্মা, তেওঁৰ মাতৃ প্ৰভা দেৱী জামাতিয়া, পত্নী গোলাপ জামাতিয়াৰ সৈতে তিনিজন পুত্ৰ আৰু দুজনী কন্যা এই কলপাতেৰে সজা ঘৰটোত বাস কৰে য’ত সাধাৰণভাৱে বসবাস কৰাৰ বাবে প্ৰয়োজনীয় বিদ্যুৎ,পানীকে ধৰি বুনিয়াদী সা-সুবিধাসমূহৰ অভাৱ।
বিগত ২৫ বছৰ ধৰি ৰাজ্যখনত বাওঁমৰ্চাৰ চৰকাৰে শাসন কৰিছিল আৰু এই ২৫ বছৰত মাৰ্জিন দেববাৰ্মাৰ পৰিয়ালটোৰ কোনো পৰিৱৰ্তন সাধন নহ’ল।
ত্ৰিপুৰাৰ এক দুৰ্গম জনজাতীয় অধ্যুষিত অঞ্চল গোমাটি জিলাৰ অন্তৰ্গত অমৰপুৰ খণ্ডৰ এই বঞ্চিত পৰিয়ালটোলৈ বাৰে বাৰে জনোৱা আবেদনৰ পিছতো কোনো চৰকাৰী সাহায্য গৈ ঢুকি নাপালে।
উল্লেখযোগ্য যে এই আঠজনীয়া পৰিয়ালটোৰ ভিতৰত কেৱল মাৰ্জিন আৰু তেওঁৰ মাকৰ নামহে ৰেচন কাৰ্ডত উল্লেখ আছে। যদিও তেওঁলোকে এখন বিপিএল কাৰ্ড লাভ কৰিছে, তেওঁলোকে কিন্তু গৃহ আৱন্টনৰ কোনো সুবিধা লাভ কৰা নাই।
পূৰ্ৰ চৰকাৰৰ অপশাসনৰ বাবে এই ৰাজ্যৰ জনজাতীয় লোকসকলে জীৱনৰ বুনিয়াদী সা-সুবিধাসমূহৰ পৰা বঞ্চিত হৈছে।
এতিয়া নতুন ভাৰতীয় জনতা দলৰ চৰকাৰখনে ত্ৰিপুৰাৰ এই জনজাতীয় লোকসকলক কিমানদূৰ এটা ভাল জীৱন-যাপনৰ সুযোগ আগবঢ়ায় সেয়া লক্ষ্যণীয় হ’ব।
