নিৰ্বাচনী প্ৰতিশ্ৰুতি ৰক্ষা কৰি ত্ৰিপুৰাত নতুনকৈ গঠিত বিজেপি চৰকাৰে নিৰ্বাচনৰ কিছু দিন পূৰ্বে ৰাজ্যখনত সংঘটিত সাংবাদিক হত্যাৰ ঘটনাটোৰ চি বি আই তদন্ত দিয়াৰ সিদ্ধান্ত লৈছে। নতুন চৰকাৰখনে ১০ ফেব্ৰুৱাৰিত বহা ইয়াৰ প্ৰথমখন কেবিনেট বৈঠকতে এই গুৰুত্বপূৰ্ণ সিদ্ধান্তটো লৈছে।
উল্লেখযোগ্য যে ত্ৰিপুৰাত যোৱা বছৰৰ শেষৰ ফালে শান্তনু ভৌমিক আৰু সুদীপ দত্ত ভৌমিক নামৰ সাংবাদিক দুজনৰ ৰহস্যজনক পৰিস্থিতিত মৃত্যু হৈছিল। সাংবাদিক সমাজে তেতিয়াৰ পৰাই দুয়োটা ঘটনাৰ তদন্ত চি বি আইক দিয়াৰ বাবে দাবী জনাই আহিছিল। আনহাতে বিজেপিয়েও নিৰ্বাচনী প্ৰচাৰৰ সময়ত চৰকাৰ গঠন কৰিব পাৰিলে ঘটনাকেইটাৰ চি বি আই তদন্ত কৰাব বুলি প্ৰতিশ্ৰুতি দিছিল।
সংবাদ মাধ্যমৰ আগত নিজৰ মত ব্যক্ত কৰি নৱ নিৰ্বাচিত মুখ্য মন্ত্ৰী বিপ্লৱ কুমাৰ দেবে কয়, ‘মন্ত্ৰী পৰিষদে ইয়াৰ প্ৰথমখন বৈঠকতে দুয়োটা ঘটনাৰে সবিশেষ আলোচনা কৰে আৰু দুয়োটা গোচৰ চি বি আইক দিবলৈ সিদ্ধান্ত গ্ৰহণ কৰে। আইন বিভাগক ৰাজ্য চৰকাৰৰ অনুমোদনটো প্ৰেৰণ কৰাৰ বাবে যাৱতীয় ব্যৱস্থা কৰিবলৈ নিৰ্দেশ দিয়া হৈছে। আমাৰ চি বি আইৰ ওপৰত সম্পূৰ্ণ ভৰসা আছে। তেওঁলোকে যথা সম্ভৱ সোনকালে এই ঘটনাৰ তদন্ত কৰিব পাৰিব।’
আনহাতে নতুন চৰকাৰৰ এই পদক্ষেপক আদৰণি জনাইছে বিভিন্ন পক্ষই। চি বি আইৰ তদন্তই ঘটনা দুটাৰ আঁৰৰ কাৰণবোৰ পোহৰলৈ আনিব বুলি সকলোৱে আশা প্ৰকাশ কৰিছে।
