নলবাৰী জিলাৰ টিহুক মহকুমা ঘোষণা কৰাৰ দুবছৰ অতিক্ৰম কৰাৰ পিছতো আজি পৰ্যন্ত পূৰ্ণাংগ কাম-কাজ আৰম্ভ নোহোৱা বাবে আন্দোলন কাৰ্যসূচী ঘোষণা কৰিছে টিহু আঞ্চলিক ছাত্ৰ সন্থাই।
শুকুৰবাৰে টিহু আঞ্চলিক ছাত্ৰ সন্থাৰ কাৰ্যালয়ত অনুষ্ঠিত এক সংবাদমেলত আছুৰ নেতৃবৃন্দই পূৰ্ণাংগ ৰূপত কাম-কাজ আৰম্ভ নকৰাৰ বাবে ক্ষোভ প্ৰকাশ কৰি স্থানীয় বিধায়ক পবিন্দ্ৰ ডেকাৰ লগতে মিত্ৰজোঁটৰ চৰকাৰক অহা ১৬ মাৰ্চৰ ভিতৰত স্থিতি স্পষ্ট কৰিবলৈ আহ্বান জনায়।
এই সম্পৰ্কত আছুৰ নেতৃত্বই স্পষ্ট ৰূপত কয় যে বিগত ৪০ বছৰে মহকুমা ঘোষণাৰ দাবীৰে টিহুবাসীয়ে বিভিন্ন গণতান্ত্ৰিক আন্দোলনৰ কাৰ্যসূচী ৰূপায়ণ কৰি আহিছে। আৰু এই আন্দোলনতে ২০১৫ চনৰ ১৭ জুলাইত নিৰাপত্তাৰক্ষীৰ গুলীত আছু কৰ্মী তথা ছাত্ৰ হিমাংশু তামুলী নিহত হ’বলগীয়া হৈছিল।
পৰৱৰ্তী সময়ত টিহুক মহকুমা হিচাপে ঘোষণা কৰে যদিও আজি পৰ্যন্ত মহকুমাটোৱে পূৰ্ণাংগ ৰূপ নাপালে। আছুৰ সাংগঠনিক ছহীদ হিমাংশু তামুলীৰ ত্যাগক সন্মান জনাই অহা ১৬ মাৰ্চৰ ভিতৰত টিহু মহকুমা পূৰ্ণাংগ কাম-কাজ ৰূপায়ণ সন্দৰ্ভত চৰকাৰ তথা স্থানীয় বিধায়কগৰাকীয়ে স্থিতি স্পষ্ট কৰিবলৈ আহ্বান জনায়। অন্যথা ১৯ মাৰ্চত গণ প্ৰতিবাদী কাৰ্যসূচী হিচাপে দ্বিতীয় পৰ্যায়ৰ আন্দোলন আৰম্ভ কৰিব বুলি ঘোষণা কৰে।
আনহাতে, উক্ত সংবাদমেলৰ জৰিয়তে ৰাজ্য চৰকাৰে গুৱাহাটীৰ পৰা টিহুলৈ ঔদ্যোগিক ক্ষেত্ৰ ঘোষণা কৰা কাৰ্যক আদৰণি জনাই। ইয়াৰ উপৰি অহা ১৩ মাৰ্চত উত্তৰ-পূব মেগা ফুড পাৰ্কত পৰ্যাপ্ত কোম্পানীক সংস্থাপনৰ দাবীত পাৰ্কৰ সন্মুখত অৱস্থান ধৰ্মঘট কাৰ্যসূচী ৰূপায়ণৰ কথাও ঘোষণা কৰে।
সংবাদমেলত নলবাৰী জিলা ছাত্ৰ-সন্থাৰ সভাপতি গুণজ্যোতি পাঠক, জিলা কাৰ্যনিৰ্বাহক প্ৰাঞ্জল ডেকা, টিহু আঞ্চলিক আছুৰ সভাপতি হিতেশ বৰ্মন, সম্পাদক ভাস্কৰদ্বীপ বৰ্মন, সহ-সম্পাদক হৃষীকেশ শৰ্মা আদি উপস্থিত থাকে।
শুকুৰবাৰে আয়োজিত সংবাদমেলত জিলা আছুৰ সভাপতি গুণজ্যোতি পাঠকে টিহুৰ লগতে মুকালমুৱা মহকুমাৰ কাম-কাজ পূৰ্ণাংগ ৰূপত আৰম্ভ কৰাৰ বাবে চৰকাৰৰ ওচৰত দাবী উহ্থাপন কৰে।
