ভূটানৰ সৌম্য পৰিৱেশটো বৰ্ধিত প্ৰদূষণৰ বাবে ভাবুকিৰ সন্মুখীন হৈছে। হিমালয়ান দেশখনত দ্ৰুত নগৰীকৰণ তথা অৰ্থনৈতিক উন্নতিৰ লগে লগে গাড়ীৰ সংখ্যা দ্ৰুতভাৱে বৃদ্ধি পাইছে।
ভূটানৰ সংবিধানত চৰকাৰক দেশখনৰ প্ৰাকৃতিক সম্পদসমূহৰ সংৰক্ষণ আৰু প্ৰাকৃতিক ব্যৱস্থাটোৰ অৱনমন প্ৰতিৰোধ কৰিবলৈ সকলো সময়তে ৬০ শতাংশ বনাঞ্চল অক্ষুণ্ণ ৰখাৰ প্ৰয়োজনীয়তাৰ কথা কোৱা হৈছে।
দেশখনে ৬০ শতাংশ বনাঞ্চল ধৰি ৰাখিছে আৰু বছৰি দেশখনৰ চাৰিওপিনে গছপুলি ৰোপণৰ বিভিন্ন কাৰ্যসূচী গ্ৰহণ কৰি আহিছে।
হিমালয়ান দেশখনৰ জনসংখ্যা ৭০০,০০০ অনুপাতে মুঠ গাড়ীৰ সংখ্যা ৯২,০০৮ খনতকৈয়ো অধিক বুলি পথ সুৰক্ষা আৰু পৰিবহণ কৰ্তৃপক্ষৰ শেহতীয়া প্ৰতিবেদনত প্ৰকাশ।
২০০৮ চনত থকা ৪০,৫৩২ খন গাড়ীৰ পৰা শেহতীয়াভাৱে ৯২,০০৮ খনলৈ বৃদ্ধি পোৱাটো অতি উদ্বেগজনক।
পথ সুৰক্ষা আৰু পৰিবহন কৰ্তৃপক্ষই প্ৰকাশ কৰিছে যে থিম্ফুত আটাইতকৈ অধিক সংখ্যক ৪৭,৭৫৩ খন গাড়ী আছে আৰু ইয়াৰ পিছতে ফুৱেণ্টছলিঙত ৩২,১৩৪ খন গাড়ী আছে। বাকী ১৮ খন জিলাত ৬,০০০ খন গাড়ী আছে।
ঠেক পথো থিম্ফু আৰু ফুৱেণ্টছলিং চহৰত এক জটিল সমস্যা হৈ ধৰা দিছে।
গছৰ সংখ্যা হ্ৰাস পোৱা আৰু নতুন পথ নিৰ্মাণৰ লগতে পুৰণি পথসমূহৰ সম্প্ৰসাৰণে পৰিৱেশত প্ৰভাৱ পেলাইছে।
ভূটানৰ ৰাষ্ট্ৰীয় পাৰিপাৰ্শ্বিক আয়োগে প্ৰকাশ কৰিছে যে বৰ্দ্ধিত গাড়ীৰ সংখ্যায়ো বায়ু প্ৰদূষণত ইন্ধন যোগাইছে। ২০০৪ চনৰ পৰাই ক্ৰমবৰ্ধমানভাৱে বায়ু প্ৰদূষণ বৃদ্ধি পাইছে।
প্ৰদূষণৰ মাত্ৰা বৃদ্ধি পোৱা আৰু বৰ্ধিত হাৰত চহৰলৈ মানুহৰ প্ৰব্ৰজনে ৰাজহুৱা পৰিবহণক অতিক্ৰম কৰি ব্যক্তিগত বাহনৰ সংখ্যা ব্যাপক হাৰত বৃদ্ধি কৰিছে।
