‘বি টি এ ডিত পূৰ্বৰ ভূমি নীতিয়েই বাহাল থাকিব আৰু ইয়াত ভৱিষ্যতেও পৃথক ভূমি নীতি গ্ৰহণ কৰা নহয়। জনজাতীয়-অজনজাতীয় লোকৰ মাজত মাটি কিনা-বেচা অব্যাহত থাকিব।’ এই গুৰুত্বপূৰ্ণ মন্তব্য কৰিছে বি টি চিৰ মুৰব্বী হাগ্ৰামা মহিলাৰীয়ে। আজি গুৱাহাটীৰ বড়োলেণ্ড অতিথিশালাত আছুৰ প্ৰতিনিধিয়ে বি টি চিৰ মুখ্য কাৰ্যবাহী বিষয়া হাগ্ৰামা মহিলাৰীক সাক্ষাৎ কৰি সৌহাৰ্দ্যমূলক আলোচনাত বহে আৰু শেষত কেইবাটাও দাবী সম্বলিত স্মাৰক পত্ৰ প্ৰদান কৰাৰ সময়ত মুখ্য কাৰ্য্যবাহীজনে এই নিশ্চয়তা দিছে।
উল্লেখযোগ্য যে যোৱা কিছুদিন ধৰি বি টি চি কৰ্তৃপক্ষৰ প্ৰস্তাৱিত নতুন ভূমিনীতিক কেন্দ্ৰ কৰি সমগ্ৰ বি টি এ ডিৰ পৰিস্থিতি উত্তাল হৈ আছিল। এই প্ৰস্তাৱিত ভূমি নীতি মতে অঞ্চলটোত অবড়ো লোকসকলে মাটিৰ কিনা-বেচাৰ অধিকাৰ হেৰুওৱাৰ লগতে ইমানদিনে অঞ্চলটোত সংৰক্ষিত শ্ৰেণীৰ সুবিধা লাভ কৰি অহা চাওঁতাল, কোচ, আদিবাসী, নেপালী আৰু নাথ-যোগীসকলে সেই বিশেষাধিকাৰৰ পৰা বঞ্চিত হ’ব লগীয়া হ’ল হেঁতেন। কিন্তু প্ৰবল প্ৰতিবাদ আৰু চাৰিওফালৰ পৰা অহা সমালোচনাৰ ফলত হাগ্ৰামাই অৱশেষত এই ধৰণৰ ভূমি নীতিৰ বাবে আগ বঢ়াটো তেওঁৰ ভুল হৈছিল বুলি স্বীকাৰ কৰে।
আজি আছুৰ প্ৰতিনিধিসকলে তেওঁলোকৰ স্মাৰক পত্ৰত উল্লেখ কৰে যে বি টি এ ডিত সকলো জাতি আৰু জনগোষ্ঠীৰ ভূমিৰ অধিকাৰ থকা উচিত। লগতে সকলো জাতি-জনগোষ্ঠীৰ লোকে চাকৰি আৰু ব্যৱসাৰ ক্ষেত্ৰত সমান অধিকাৰ লাভ কৰাটো নিশ্চিত কৰিব লাগে।
আছুৰ প্ৰতিনিধিসকলে লগতে কয় যে অঞ্চলটোত শিক্ষাৰ্থীসকলে উপযুক্ত সমৰ্থন পাব লাগিব। তেওঁলোকে বড়ো মাধ্যমৰ শিক্ষানুষ্ঠানত বড়ো ভাষাৰ শিক্ষক আৰু অসমীয়া মাধ্যমৰ শিক্ষানুষ্ঠানবোৰত অসমীয়া ভাষাৰ শিক্ষক নিযুক্তিৰ ব্যৱস্থা কৰিবলৈ আহ্বান জনায়। বাস্তৱত দুয়োটা ক্ষেত্ৰতে কিছু খেলিমেলি পৰিলক্ষিত হোৱা বুলি আছুৰ প্ৰতিনিধিসকলে জনায়।
প্ৰত্যুত্তৰত হাগ্ৰামাই কয় যে এই বিষয়টোত বড়ো সাহিত্য সভাই প্ৰয়োজনীয় পদক্ষেপ লৈ আছে। বি টি চি কৰ্তৃপক্ষয়ো সেইমতে যথোচিত ব্যৱস্থা ল’ব। আনহাতে বি টি এ ডিত থকা সকলো জাতি-জনগোষ্ঠীৰ লোকৰে ৰাজনৈতিক সম অধিকাৰ নিশ্চিত কৰিবৰ বাবেও আছুৰ প্ৰতিনিধিসকলে হাগ্ৰামাক অনুৰোধ জনায়। ইয়াৰ লগতে অঞ্চলটোৰ সকলো লোকৰে জীৱন আৰু সম্পত্তিৰ নিৰাপত্তা নিশ্চিত কৰা, চিকিৎসাসেৱা উন্নত কৰা আদি বিষয়তো আলোচনা কৰা হয়। আলোচনাৰ শেষত আছুৰ প্ৰতিনিধিসকলে মহিলাৰীক কেইবাটাও দাবী সম্বলিত এখন স্মাৰকপত্ৰ দিয়ে।
