মিজোৰাম চৰকাৰ আৰু আলোচনাপন্থী বিদ্ৰোহী গোট হামৰ পীপলছ কনভেনশ্যন (ডেম’ক্ৰেট)ৰ মাজত বহু বিলম্বিত শান্তি আলোচনাৰ প্ৰক্ৰিয়া বুধবাৰে আইজলত পুনৰ আৰম্ভ কৰা হ’ব।
মিজোৰাম চৰকাৰৰ গৃহ বিভাগৰ অতিৰিক্ত সচিব লালবাইকজামাই কয় যে আলোচনাৰ দিন ৫ মাৰ্চত নিৰ্দ্ধাৰিত কৰা হৈছিল যদিও এইচপিচি (ডি) বিদ্ৰোহীৰ সুবিধা অনুসৰি সেয়া স্থগিত ৰখা হৈছিল।
বৰ্তমানৰ এই শান্তি আলোচনাৰ প্ৰক্ৰিয়াটো ২০১৬ চনৰ ১০ আগষ্টত বিষয়া পৰ্যায়ত আৰম্ভ হৈছিল আৰু এইবাৰৰ পৰা ৰাজনৈতিক পৰ্যায়ত আৰম্ভ কৰা হ’ব।
এইচপিচি(ডি)ৰ নেতাসকলে শনিবাৰে আশা প্ৰকাশ কৰিছিল যে মিজোৰাম চৰকাৰৰ সৈতে ৰাজনৈতিক পৰ্যায়ত অনুষ্ঠিত হ’বলগীয়া আলোচনাই হামৰ সমস্যাটোৰ এটা সমাধানৰ পথ উলিয়াব।
চুবুৰীয়া মণিপুৰত থকা নাম প্ৰকাশত অনিচ্ছুক এইচপিচ(ডি)ৰ নেতাসকলে কয় যে বিদ্ৰোহী সংগঠনটোৱে প্ৰতিনিধি দলটোৰ সদস্য সম্পৰ্কত এতিয়াও সিদ্ধান্ত গ্ৰহণ কৰা নাই। অৱশ্যে তেওঁলোকে নিশ্চিত কৰিছে যে গোটটোৰ কাৰ্যবাহী সভাপতি লালথানলিয়েন হামৰ প্ৰতিনিধি দলটোত থাকিবই আৰু মুখপাত্ৰ হিচাপে কাৰ্যভাৰ চলাই যাব।
এইচপিচি(ডি) নেতাসকলে কয় যে শান্তি আলোচনাই দীৰ্ঘদিনীয়া হামৰ সমস্যাটোৰ এটা গ্ৰহণযোগ্য সমাধান বিচাৰি উলিয়াব।
চৰকাৰী সূত্ৰই কয় যে অলপতে মুখ্যমন্ত্ৰীৰ ৰাজনৈতিক উপদেষ্টা হিচাপে নিযুক্তি দিয়া প্ৰাক্তন শ্ৰম মন্ত্ৰী লালৰিনমাৱাইয়া ৰালটে ৰাজ্য চৰকাৰৰ প্ৰতিনিধি দলটোক নেতৃত্ব দিব।
এইচপিচিয়ে চুক্তি স্বাক্ষৰ হোৱাৰ আগেয়ে মণিপুৰৰ সৈতে লাগি থকা উত্তৰ পূব অংশত বসবাস কৰি থকা হামৰ সম্প্ৰদায়ৰ বাবে সংবিধানৰ ষষ্ঠ অনুসূচীৰ অধীনত সুকীয়া স্বায়ত্ত্ব শাসিত জিলাৰ দাবী কৰিছিল।
এইচপিচি (ডি)য়ে অলপতে হামৰ সমস্যাৰ সমাধানৰ পথ প্ৰশস্ত কৰি তুলিবলৈ ষষ্ঠ অনুসূচীৰ অধীনত স্বায়ত্ত্ব শাসনৰ দাবীটো পৰিহাৰ কৰিবলৈ মান্তি হৈছিল।
