আচৰিত হ’লেও সত্য যে ভাৰত-পাকিস্তানৰ ৭১ৰ যুদ্ধত মৃত্যু হোৱা বুলি ভাবি পৰিয়ালৰ লোক সকাম-নিকাম কৰি পেলোৱা এজন সৈনিকে ৪৭ বছৰৰ পিছত আজি সম্বৰ্ধনা গ্ৰহণ কৰিলে আছাম ৰেজিমেণ্টৰ পৰা।
উল্লেখযোগ্য যে ভাৰতৰ হৈ পাকিস্তানৰ লগত যুদ্ধ কৰাৰ পাছতো সেনাবাহিনীৰ পৰা অৱসৰ লৈ আকৌ আছাম ৰেজিমেণ্টত যোগ দিয়া হাফলঙৰ মৌলহৈ গাৱঁৰ এল আৰ মাৰ’ নামৰ অৱসৰপ্ৰাপ্ত সেনা জোৱানজনক আজি আছাম ৰেজিমেণ্টৰ ফালৰ পৰা সংবৰ্ধনা জনোৱা হয়। মৌলহৈ গাৱঁৰ চি এইচ্ছ খটলাং মেম’ৰিয়াল প্ৰেক্ষাগৃহত আছাম ৰাইফলছৰ ২২ ছেক্টৰৰ ব্ৰিগেডিয়াৰ পৰিমল পন্থ, ৪৩ আছাম ৰাইফলছৰ কমাণ্ডিং অফিচাৰ গগন পাণ্ডে আৰু আচাম ৰেজিমেণ্টৰ ফালৰ পৰা লেফটেনেণ্ট কাৰ্নেল উপস্থিত থাকে। লগতে মৌলহৈ গাৱঁৰ সাধাৰণ ৰাইজেও অনুষ্ঠানটোত অংশ গ্ৰহণ কৰে। আছাম ৰেজিমেণ্টৰ ২২ ছেক্টৰৰ তৰফৰ পৰা কৃতী জোৱান মাৰ’ক এককালীনভাৱে পঞ্চাশ হেজাৰ টকাৰ চে’ক তুলি দিয়ে ব্ৰিগেডিয়াৰ পন্থে।
উল্লেখযোগ্য যে ১৯৭০ চনৰ ছেপ্টেম্বৰত ওঠৰ বছৰ বয়সতে মাৰে ভাৰতীয় সেনাবাহিনীত যোগদান কৰি প্ৰশিক্ষণ লৈ পাঞ্জাবত কামত যোগ দিয়ে। এবছৰ পাছতে, অৰ্থাৎ ১৯৭১ৰ ৯ ডিচেম্বৰত তেওঁ ভাৰত-পাকিস্তানৰ যুদ্ধত যাব লগা হয়। যুদ্ধত পাকিস্তান ভাৰতীয় সেনাবাহিনীৰ হাতত পৰাজয় বৰণ কৰিব লগা হয়।
কিন্তু যুদ্ধ কৰি থকা অৱস্থাত ভাৰতীয় সেনাৰ দল লাইন অব কণ্ট্ৰ’ল অতিক্ৰম কৰি পাকিস্তানত সোমাই পৰে। তাৰ মাজত এল আৰ মাৰ’ও আছিল। যদিও পাকিস্তানী সেনাই একো কৰিবলৈ সক্ষম হোৱা নাছিল, ভাৰতীয় সেনাৰ দল পাকিস্তানত আবদ্ধ হৈ পৰিব লগা হয় আৰু এক বছৰৰ অধিক সময় পাকিস্তানত থাকিব লগা হয়। কিন্তু ইয়াৰ পাছত দুইখন দেশৰ মাজত আলোচনাৰ ফলত এক বছৰ ওঠৰ দিন পাকিস্তানত আবদ্ধ হৈ থকাৰ পাছত তেওঁলোক ঘৰলৈ ওভতি অহাত সক্ষম হয়।
মাৰে সেই কথা সুঁৱৰি কয়, ‘পাকিস্তানৰ পৰা যে জীৱিত অৱস্থাত উভতি আহিব পাৰিম, কেতিয়াও ভবা নাছিলোঁ, কিন্তু ভাৰত চৰকাৰৰ প্ৰচেষ্টাত এয়া সম্ভৱ হয়।’
অতি বিস্ময়ৰ কথা যে এবছৰ ধৰি উভতি নহাৰ বাবে মাৰ’ৰ যুদ্ধত মৃত্যু হোৱা বুলি আত্মীয়সকলে সামাজিক ৰীতি-নীতি অনুসৰি মাৰ’ৰ সৎকাৰ আৰু সকাম-নিকাম কৰি পেলায়। কিন্তু এইবোৰ নীতি-নিয়মৰ কাম কৰি উঠাৰ পাছতে তেওঁ জীৱিত অৱস্থাত ঘৰলৈ ঘূৰি আহি সকলোকে আনন্দিত আৰু বিস্মিত কৰে।
ভাৰতীয় সেনাৰ পৰা অৱসৰ লোৱাৰ পিছত মাৰ’ই আছাম ৰেজিমেণ্টতো সাত বছৰ কাম কৰে। এতিয়াও সুস্বাস্থ্যৰ অধিকাৰী মাৰে চৰকাৰৰ ওচৰত আজিও কৃতজ্ঞতা প্ৰকাশ কৰে। তেওঁ লগতে শিক্ষাগত যোগ্যতা থকা তেওঁৰ দুইপুত্ৰৰ কৰ্মসংস্থাপনৰ কাৰণে চৰকাৰৰ ওচৰত দাবী জনায়।
