মণিপুৰৰ মুখ্য মন্ত্ৰী এন বিৰেন সিঙে ৰাজ্যখনলৈ ম্যানমাৰৰ পৰা ৰহিঙীয়া মুছলমানে অনুপ্ৰৱেশ কৰিবলৈ আৰম্ভ কৰিছে বুলি শুক্ৰবাৰে ৰাজ্যখনৰ বিধানসভাক জানিবলৈ দিয়ে। ম’ৰে আৰক্ষীয়ে ম্যানমাৰৰ সৈতে সীমান্তৱৰ্তী চহৰখনৰ পৰা এজন ৰহিঙিয়া মুছলমানক আটক কৰিছে বুলি জানিবলৈ দি মুখ্য মন্ত্ৰীজনে কয় যে ৭ জন ৰহিঙিয়া অনুপ্ৰৱেশকাৰীয়ে মণিপুৰত প্ৰৱেশ কৰা বুলি জানিব পৰা গৈছে আৰু তেওঁলোকক বিচাৰি এক ব্যাপক তালাচী অভিযান আৰম্ভ কৰা হৈছে। মুখ্য মন্ত্ৰীজনে জানিবলৈ দিয়া অনুসৰি সীমান্তৱৰ্তী জিলা সমূহত নিৰাপত্তা ব্যৱস্থা কটকটীয়া কৰি তোলা হৈছে আৰু আৰক্ষীয়ে ইতিমধ্যে ৫৬০ জন সন্দেহযুক্ত নাগৰিকক ধৰা পেলাইছে। ইয়াৰে ১০৫ জনৰ যাৱতীয় নথি-পত্ৰ নথকাত উভটাই পঠিওৱা হৈছে। অনুপ্ৰৱেশকাৰী সকলে ব্যৱহাৰ কৰা বাঁহৰ দলং সমূহকো ভাঙি পেলোৱা হৈছে বুলি জানিবলৈ দি মুখ্য মন্ত্ৰীজনে সকলোকে বিষয়টোৰ ক্ষেত্ৰত সতৰ্ক হৈ থাকিবলৈ আহ্বান জনায়। আনহাতে কংগ্ৰেছী বিধায়ক কে মেঘচন্দ্ৰই মণিপুৰত ইনাৰ লাইন পাৰ্মিট ব্যৱস্থাক বলবৎ কৰাৰ ওপৰত জোৰ দিয়ে। মন কৰিব লগীয়া যে অৰুণাচল প্ৰদেশ, মিজোৰাম আৰু নাগালেণ্ডত ইনাৰ লাইন পাৰ্মিট ব্যৱস্থা ইতিমধ্যে লাগু হৈ আছে। মেঘচন্দ্ৰই কয় যে ১৯৪৮ চনত মণিপুৰত বহিৰাগতৰ জনসংখ্যা আছিল ২৭১৯ জন কিন্তু ইয়াৰ বিপৰীতে ২০০১ চনৰ লোকপিয়ল অনুসৰি তেওঁলোকৰ জনসংখ্যা ৭,৪০,৪৮৮ জনলৈ বৃদ্ধি পায় যিটো আনকি ৰাজ্যখনৰ সংখ্যাগৰিষ্ঠ সম্প্ৰদায়তকৈ অধিক।
