সমস্যাৰে ভাৰাক্ৰান্ত মধ্য মাজুলী আৰু উজনি মাজুলীবাসীয়ে দীৰ্ঘদিনৰ পৰা পুৰণিবাৰীৰ পৰা জেংৰাইমূখলৈ বিস্তৃত হৈ থকা মথাউৰিৰ গড়কাপ্তানি পথ সংযোগ অংশত এটা শ্লুইচ গেট নিৰ্মাণ কৰাৰ দাবী কৰি আহিছিল। আৰু অৱশেষত তেওঁলোকৰ দাবী সম্পূৰ্ণ হোৱা দিশত আগবঢ়া পৰিলক্ষিত হৈছে।
মন কৰিবলগীয়া যে ৰাজহুৱা স্বাৰ্থ জড়িত হৈ থকা এই শ্লুইচ গেটটো নিৰ্মাণ নকৰাৰ বাবেই প্ৰায় পঞ্চাছখনতকৈ অধিক গাঁও তথা বিচ্চিন্ন উজনি মাজুলীৰ বৃহত্তৰ অঞ্চলৰ লোকসকলে বছৰ বছৰ ধৰি যমৰ যাতনা ভূগি আহিব লগা হৈছিল।
উল্লেখ্য যে পুৰণিবাৰীৰ সমীপৰ মথাউৰিৰ চিগা অংশই দি সোমাই অহা বাৰিষাৰ বানে প্ৰতি বছৰে বৃহত্তৰ অঞ্চলটোৰ খেতি পথাৰ, ঘৰ-দুৱাৰ তথা জীৱন জিৱিকাক বিপন্ন কৰি আহিছে।
কিন্তু লক্ষ্যণীয়ভাৱে বৰ্তমান এই অংশত ব্ৰহ্মপুত্ৰ বৰ্ডে চাৰি কোটি টকা ব্যয় সাপেক্ষ নিৰ্মাণ কৰা এই শ্লুইচ গেট তথা সংযোগ পথে সহস্ৰাধিক গাঁওবাসিলৈ আশাৰ বতৰা কঢ়িয়াই আনিবলৈ সক্ষম হ’ব বুলি উক্ত অঞ্চলৰ লোকসকলে সংবাদ মাধ্যমৰ আগত প্ৰকাশ কৰে।
