অসমৰ উদ্যোগ আৰু বাণিজ্য মন্ত্ৰী চন্দ্ৰ মোহন পাটোৱাৰীয়ে বৃহস্পতিবাৰে এই অভিযোগ কৰে যে পশ্চিমবংগৰ মুখ্যমন্ত্ৰী মমতা বেনাৰ্জীয়ে তেওঁৰ ৰাজ্যখনক উত্তৰ-পূব তথা দক্ষিণ-পূব এছিয়াৰ দুৱাৰমুখ বুলি কৈ বিনিয়োগকাৰীক হাইজেক কৰাৰ চেষ্টা কৰিছে।
বিশ্ব বিনিয়োগ সন্মিলনত অসম চৰকাৰে ১ লাখ কোটি টকাৰ বিনিয়োগৰ প্ৰস্তাৱ লাভ কৰা বুলি দাবী কৰিছে।
পশ্চিমবংগই বেংগল বিশ্ব বাণিজ্য সন্মিলনৰ চতুৰ্থ সংস্কৰণ অনুষ্ঠিত কৰিছে আৰু ইয়াৰ পূৰ্বত্তোৰৰ চুবুৰীয়া ৰাজ্যখনতকৈ দুগুণতকৈয়ো অধিক বিনিয়োগৰ প্ৰস্তাৱ লাভ কৰিছে।
‘’ ভাৰত- আছিয়ান সম্পৰ্কৰ কেন্দ্ৰ হিচাপে ৰাজ্যখনে প্ৰতিষ্ঠা লাভ কৰিবলৈ ওলোৱাৰ সময়তে পশ্চিমবংগই বিনিয়োগকাৰীসকলক হাইজেক কৰাৰ প্ৰচেষ্টা চলাইছে। পশ্চিমবংগৰ মুখ্যমন্ত্ৰী মমতা বেনাৰ্জীয়ে ৰাজ্যখনক উত্তৰ-পূবৰ দুৱাৰমুখ হিচাপে ধৰি লৈ সামগ্ৰী আৰু সেৱাসমূহ প্ৰথমতে পশ্চিমবংগত কেন্দ্ৰীভূত কৰি তাৰ পৰা উত্তৰ-পূবলৈ আৰু তাৰপিছত দক্ষিণ-পূব এছিয়ালৈ প্ৰেৰণ কৰাটো বিচাৰে,’’-পাটোৱাৰীয়ে কয়।
পাটোৱাৰীয়ে কয় যে প্ৰধানমন্ত্ৰী নৰেন্দ্ৰ মোডীয়ে ইয়াত অনুষ্ঠিত হৈ যোৱা বিশ্ব বিনিয়োগ সন্মিলন উদ্বোধন কৰি উত্তৰ-পূবক ভাৰতৰ এক্ট ইষ্ট নীতিৰ কেন্দ্ৰ হিচাপে ইতিমধ্যে ঘোষণা কৰিছে।
‘’ প্ৰধানমন্ত্ৰী মোডীয়ে গোটেই নীতিটো আছিয়ানৰ সৈতে সংযুক্ত কৰি নতুন ধাৰণাৰে এক্ট ইষ্টৰ লক্ষ্য বাস্তৱত পৰিণত কৰাৰ পথ মুকলি কৰিছে। অসম চৰকাৰে যোৱা ফেব্ৰুৱাৰীত প্ৰথমবাৰৰ বাবে বিশ্ব বিনিয়োগ সন্মিলন ‘এডভান্টেজ আছাম’ আয়োজন কৰাৰ উদ্দেশ্যও আছিল এইটো।‘’
‘’দেশৰ লগতে বিদেশৰো বাণিজ্য আৰু ৰাজনৈতিক ক্ষেত্ৰৰে নেতাসকলৰ বিশেষকৈ আছিয়ান আৰু বিবিএন দেশসমূহৰ দৃষ্টি আকৰ্ষণ কৰা ক্ষেত্ৰত সন্মিলনখন আছিল এক বিৰাট সফলতা। উদ্যোগসমূহে কেন্দ্ৰীয় খণ্ডত বিনিয়োগৰ বাবে দেখুওৱা আগ্ৰহ অৱশ্যেই উৎসাহজনক। আমি প্ৰায় ১ লাখ কোটি টকাৰ বিনিয়োগৰ প্ৰস্তাৱ লাভ কৰিছো,’’-পাটোৱাৰীয়ে কয়।
তেওঁ লগতে কয় যে বুধবাৰে কেন্দ্ৰীয় কেবিনেটে অঞ্চলটোৰ আটাইকৈ বৃহৎ পৰিসৰৰ ক্ষুদ্ৰ আৰু মজলীয়া উদ্যোগ খণ্ডক উৎসাহিত কৰাৰ বাবে ৩০০০ কোটি টকাৰ বিশেষ পেকেজ মুকলি কৰি দিয়াৰ জৰিয়তে মোডীয়ে এক্ট ইষ্ট নীতিৰ কেন্দ্ৰ হিচাপে উত্তৰ-পূবক এক নতুন মাত্ৰা দিলে।
