প্ৰধানমন্ত্ৰী নৰেন্দ্ৰ মোডীয়ে তেওঁৰ ত্ৰিপুৰা ভ্ৰমণৰ সময়ছোৱাত বৃহস্পতিবাৰে ত্ৰিপুৰাৰ মুখ্যমন্ত্ৰী মানিক সৰকাৰক তীব্ৰ সমালোচনা কৰি ৰাজ্যখনৰ জনসাধাৰণক পৰিৱৰ্তনৰ বাবে ভোট দিবলৈ আহ্বান জনায়।
কইলাচহৰত এখন জনসভাত ভাষণ দি ‘চলো পাল্টাই’ৰ আহ্বানেৰে ত্ৰিপুৰাৰ মুখ্যমন্ত্ৰী মানিক সৰকাৰক আক্ৰমণৰ লক্ষ্য কৰি লয় মোডীয়ে।
মোডীয়ে কয়, ‘’ ৰাজ্যখনৰ নেতৃত্বৰ দুৰ্নীতি আৰু কেলেংকাৰী ‘বগা কূৰ্তা’ৰ আঁৰত ঢাকি ৰাখিছে আৰু ‘বেংক একাউন্ট’ ৰাজহুৱা হ’বই লাগিব। ত্ৰিপুৰাৰ বৰ্তমান চৰকাৰখনে তেওঁলোকৰ বিৰুদ্ধে মাত মতা জনসাধাৰণৰ বাবে ভীতিৰ পৰিৱেশ সৃষ্টি কৰিছে।‘’
বিগত ২০ বছৰ ধৰি ৰাজ্যখনত শাসন চলাই অহা মানিক সৰকাৰ নেতৃত্বাধীন বাওঁ মৰ্চাৰ চৰকাৰখনক আক্ৰমণ কৰি মোডীয়ে কয়,’’ ত্ৰিপুৰা জনসাধাৰণৰ বাবে আমাৰ চৰকাৰৰ নতুন পৰিকল্পনা আছে।‘’
তেওঁ কয়,’’ যদি এটা দৰিদ্ৰ পৰিয়ালে কোনো ৰোগৰ চিকিৎসাৰ বাবে ৫ লাখ টকা খৰচ কৰিবলগীয়া হয়, আমাৰ চৰকাৰে সেই ধনৰাশি বহন কৰিব। আমি শিশুসকলক ভাল শিক্ষা আগবঢ়োৱাৰ, যুৱসকলক সংস্থাপন দিয়াৰ আৰু বয়স্কসকলক ভাল গুণসম্পন্ন ঔষধ আগবঢ়োৱাৰ সপোন দেখিছো।‘’
মোডীয়ে কয়, কেন্দ্ৰই ৰাজ্যখনৰ উন্নয়নৰ বাবে ত্ৰিপুৰাৰ বাজেটৰ বাবে ৮০ শতাংশ পুঁজি আগবঢ়াইছে। অৱশ্যে, বেছিভাগ সময়তে ত্ৰিপুৰা চৰকাৰে এই ধন খৰচ কৰিবলৈ সক্ষম হোৱা নাই। মুখ্যমন্ত্ৰী সৰকাৰক আক্ৰমণৰ লক্ষ্য কৰি প্ৰধানমন্ত্ৰীগৰাকীয়ে এইদৰে কয়।
‘’কেন্দ্ৰীয় পুঁজি জনসাধাৰণৰ কল্যাণৰ বাবে খৰচ কৰা উচিত, ৰঙা পতাকা উৰুৱাবলৈ নহয়,’’-মোডীয়ে কয়।
প্ৰধানমন্ত্ৰীগৰাকীয়ে লগতে যোগ দিয়ে, বিজেপিয়ে যদি ত্ৰিপুৰাত চৰকাৰ গঠন কৰে তেতিয়াহ’লে তাত দুটা ইঞ্জিন থাকিব। এটা হ’ব দিল্লীত আমাৰ চৰকাৰ আৰু আনটো ৰাজ্যত থকা বিজেপি চৰকাৰ যাৰ দ্বাৰা ৰাজ্যখনৰ দ্ৰুত উন্নয়ন ঘটিব।‘’
বিজেপি নেতৃত্বাধীন চৰকাৰখনে ত্ৰিপুৰাত প্ৰকৃত উন্নয়ন হোৱাটো বিচাৰে বুলি কৈ ৰাজ্যখনত পথৰ উন্নয়ন আৰু বিমান সংযোগৰ উন্নয়নো বিচাৰে বুলি দোহাৰে মোডীয়ে।
নিৰ্বাচনী সমাৱেশত মোডীৰ সৈতে উপস্থিত থাকে ইণ্ডিজেনিয়াছ পীপলছ ফ্ৰন্ট অফ ত্ৰিপুৰা (আইপিএফটি)ৰ সভাপতি নৰেন্দ্ৰ চন্দ্ৰ দেৱবাৰ্মা।
আইপিএফটি আৰু বিজেপিয়ে আগন্তুক ত্ৰিপুৰা বিধানসভা নিৰ্বাচনৰ বাবে মিত্ৰতাত আৱদ্ধ হৈছে।
অসমৰ বিত্তমন্ত্ৰী আৰু নেডাৰ আহ্বায়ক হিমন্ত বিশ্ব শৰ্মাও মোডীৰ ত্ৰিপুৰা ভ্ৰমণৰ সময়ত লগত আছিল।
মোডীয়ে ছোনামূৰাতো আন এখন নিৰ্বাচনী সভাত ভাষণ দিয়ে।
