যোৱা ১২ ডিচেম্বৰত ম্যানমাৰত দেশখনৰ আৰক্ষীয়ে আটক কৰা আন্তঃৰাষ্ট্ৰীয় সংবাদ সংস্থা ৰয়টাৰৰ দুই সাংবাদিক ওৱা ল’ন আৰু ক্যাও ছুৱে অ’ক মুক্তিৰ দাবী তুলি বক্তৱ্য আগবঢ়াইছে সংযুক্ত ৰাষ্ট্ৰ, ইউৰোপায়ান ইউনিয়ন আৰু কানাডা, সংযুক্ত ৰাষ্ট্ৰৰ শীৰ্ষ বিষয়াকে ধৰি আন বহুতো আন্তৰ্জাতিক সংস্থা তথা অনুষ্ঠান প্ৰতিষ্ঠানে।
উক্ত সংবাদ সংস্থাটোৰ ৰিপ’ৰ্টাৰ দুগৰাকীক ১২ ডিচেম্বৰত য়াংগনৰ কাষৰীয়া অঞ্চলত আৰক্ষীয়ে মতাই আনি গ্ৰেপ্তাৰ কৰিছিল। তেওঁলোকে ৰাখাইন প্ৰদেশত সামৰিক বাহিনীৰ অভিযানৰ ফলত আগষ্ট মাহৰে পৰা প্ৰায় ৬৫০,০০০ ৰোহিংগিয়া মুছলমান বাংলাদেশলৈ ঢাপলি মেলা দৃশ্য প্ৰত্যক্ষ কৰি সেই বিষয়ে প্ৰতিবেদন প্ৰস্তুত কৰি আছিল।
ম্যানমাৰৰ তথ্য মন্ত্ৰালয়ে কৈছে যে ৰিপ’ৰ্টাৰ দুজনে ‘’ বিদেশী সংবাদ মাধ্যমত প্ৰচাৰ কৰাৰ বাবে অবৈধভাৱে তথ্য সংগ্ৰহ কৰিছিল।‘’ মন্ত্ৰালয়ে ৰিপ’ৰ্টাৰ দুজনৰ হেণ্ডকাফ লগোৱা ফটোও প্ৰকাশ কৰিছিল। জানিব পৰা মতে ৰিপ’ৰ্টাৰ দুজন আৰু আৰক্ষীৰ দুজন লোকৰ বিৰুদ্ধে ব্ৰিটিছৰ সামাজ্ৰ্যবাদী যুগৰ অফিচিয়েল চিক্ৰেট এক্টৰ অধীনত গোচৰ তৰা হৈছে। এই আইন অনুসৰি সৰ্বোচ্চ ১৪ বছৰ কাৰাবাস হ’ব পাৰে। অৱশ্যে চৰকাৰীভাৱে তেওঁলোকৰ বিৰুদ্ধে গোচৰ ৰুজু কৰা নাই বুলি প্ৰকাশ কৰিছে। তেওঁলোক এতিয়া ক’ত আছে সেই সম্পৰ্কে কোনো তথ্য প্ৰকাশ কৰা হোৱা নাই।
ম্যানমাৰত গ্ৰেপ্তাৰ হোৱা সাংবাদিক দুগৰাকীক শীঘ্ৰে মুক্তি দিয়াৰ বাবে বিশ্বজুৰি দাবী উত্থাপিত হৈছে। শনিবাৰে নিউয়ৰ্ক টাইমছৰ এক সম্পাদকীয়ত কোৱা হৈছে যে সাংবাদিক দুগৰাকীৰ মুক্তিয়ে আং ছান ছ্যু কীৰ চৰকাৰৰ ‘’হেৰোৱা বিশ্বাস কিছু হ’লেও ঘুৰি আহিব।‘’
নিউজিলেণ্ডৰ প্ৰাক্তন প্ৰধানমন্ত্ৰী হেলেন ক্লাৰ্কে দুগৰাকী সাংবাদিকক আটক কৰি ৰখা কথাটো শুনি ‘স্তম্ভিত’ হৈ পৰিছিল। ‘’সংবাদ মাধ্যমৰ স্বাধীনতা অতি গুৰুত্বপূৰ্ণ,’’-খ্ৰীষ্টমাছৰ দিনা এটা টুইটত তেওঁ এইদৰে কয়।
বিগত সপ্তাহত সংযুক্ত ৰাষ্ট্ৰৰ দুগৰাকী মানৱ অধিকাৰ বিশেষজ্ঞই সাংবাদিক দুগৰাকীক মুকলি কৰি দিবলৈ আহ্বান জনাই কৈছিল যে সাংবাদিকতাৰ অপৰাধকৰণ কৰিবলৈ অফিচিয়েল চিক্ৰেট আইনক ব্যৱহাৰ কৰি ম্যানমাৰে বিপজ্জনক পথত খোজ দিছে।
আমেৰিকা যুক্তৰাষ্ট্ৰৰ গৃহ সচিব ৰেক্স টিলাৰছনে কৈছে যে আমেৰিকা যুক্তৰাষ্ট্ৰই ‘’তেওঁলোকক শীঘ্ৰে মুকলি কৰি দিব লাগে অথবা তেওঁলোকৰ অন্তৰ্ধানৰ পৰিস্থিতিৰ তথ্য প্ৰকাশ কৰিব লাগে’’ বুলি স্থিতি স্পষ্ট কৰিছে।
জাপানৰ বৈদেশিক পৰিক্ৰমা বিভাগৰ মন্ত্ৰী তাৰা কানোই যোৱা সপ্তাহত কৈছে যে, ‘’ মৌলিক মানৱ অধিকাৰ সুৰক্ষা দিবলৈ সংবাদ মাধ্যমৰ স্বাধীনতা অত্যন্ত গুৰুত্বপূৰ্ণ। জাপানী চৰকাৰে বিষয়টো সুক্ষ্মভাৱে পৰ্যবেক্ষণ কৰি থাকিব।‘’
ইউৰোপীয়ান ইউনিয়নে ম্যানমাৰক ৰিপ’ৰ্টাৰ দুগৰাকীক ‘’যিমান পাৰি সোনকালে’’ মুকলি কৰি দিয়াৰ আহ্বান জনাইছে।
ৰাষ্টসংঘৰ সচিব প্ৰধান জেনেৰেল এন্ট’নিঅ’ গুটেৰছে কয় যে ম্যানমাৰত সংবাদ মাধ্যমৰ স্বাধীনতা ৰক্ষা কৰা আৰু সাংবাদিক দুগৰাকীৰ মুক্তি নিশ্চিত কৰিবলৈ দেশমূহে সম্ভাৱ্য সকলোখিনি কৰা উচিত।
ব্ৰিটেইন, হ’লেণ্ড, কানাডা, নৰৱে আৰু চুইডেনেও ৰয়টাৰৰ সাংবাদিক দুগৰাকীৰ মুক্তিৰ দাবী তুলিছে।
