আজি যোৰহাট চৰকাৰী বালক উচ্চতৰ মাধ্যমিক বিদ্যালয়ত ‘এনাজৰী- ৭৬’ৰ পুনৰ মিলন অনুষ্ঠানত লেখক তপন কুমাৰ শৰ্মাৰ শেহতীয়া গ্ৰন্থ ‘মিচিমি বিহৰ সন্ধানত- শদিয়া আৰু মিচিমি পাহাৰৰ ঐতিহ্য-সংস্কৃতি’ মুকলি কৰা হয়৷ তাহানিৰ আৰু আজিৰ শদিয়া অঞ্চলৰ লগতে মিচিমি পাহাৰৰ ঐতিহ্য আৰু সংস্কৃতিৰ জিলিঙনি এই কিতাপখনৰ পাতে পাতে পৰি আছে। লেখকে নিজৰ অৰঙে-দৰঙে ঘূৰি ফুৰা চখৰ মাজেৰে আৱিষ্কাৰ কৰা তথা আজিও লোকচক্ষুৰ অলক্ষিতে ৰৈ যোৱা বহু কথা, সৰু কাহিনী নিজৰ মনোৰম উপস্থাপন শৈলীত আগ বঢ়াইছে। গতিকে পাঠকৰ ৰসাস্বাদনৰ সমানে উপকৃত হোৱাৰ থল আছে। শদিয়াৰ ৰণুৱা গোহাঁই, চিংফৌসকলৰ মুখিয়াল বিচা-গামৰ ইংৰাজৰ লগত সংঘাত আৰু যোৰহাট কাৰাগাৰত মৃত্যুবৰণ ইত্যাদি সৰু সৰু কাহিনীবোৰৰ বুকুত সাৰ পাই উঠিছে ইংৰাজৰ অসম আগমনৰ আগৰ আৰু পাছৰ অসমৰ ইতিহাস। বুৰঞ্জীৰ ছাত্ৰ-শিক্ষকৰ বাবেও নতুন কথা যেন লগা বহুতো কথা ইয়াত সন্নিৱিষ্ট হৈ আছে। লগতে অসমৰ লোকসমাজত বিশেষ স্থান পোৱা মিচিমি তথা মিচিমি বিহৰ লগত জড়িত মনোৰম কাহিনীও আছে।
উদাহৰণস্বৰূপে এটা কাহিনী হ’ল- ১৫২৩ চনৰ পাছত আহোম আৰু মিচিমিৰ মাজত এখন বাণিজ্যিক-ৰাজনৈতিক চুক্তি হৈছিল, য’ত ৰাজনৈতিক সুৰক্ষাৰ বিনিময়ত মিচিমি সকলে আহোম ৰাজক চাৰি পাচিকৈ বৰবিহ দিবলৈ অংগীকাৰবদ্ধ আছিল৷ সেইদৰে- অসমৰ প্ৰথম ছপাশাল শিৱসাগৰ নহয়, শদিয়াতহে স্থাপন হৈছিল৷ ইংৰাজে প্ৰথম চাহখেতি চাবুৱাত নহয়, শদিয়াতহে আৰম্ভ কৰিছিল৷ চিংফৌসকলৰ মুখিয়াল বিচা-গামৰ ইংৰাজৰ লগত সংঘাত আৰু যোৰহাট কাৰাগাৰত মৃত্যুবৰণ৷ খাৰ-বাৰুদ চীনদেশে নহয়, শদিয়াবাসীয়ে বিশ্ববাসীক দিছিল৷ কিতাপখনত বৰ্ণিত আৰু এটা কথাই মন টানি নিব৷ শৰাইঘাট আহোম আৰু মোগলৰ মাজত শেষ ৰণ নহয়; শৰাইঘাটৰ পাছত, লাচিতৰ মৃত্যুৰ পাছতে লালুকসোলা, দেবেৰা হাজৰিকা আদি বিষয়াই গুৱাহাটী মোগলৰ হাতত সঁপিছিল৷ এনে বহুবোৰ আমোদজনক, শিহৰণকাৰী তথ্যৰে ভৰা কিতাপখন৷ সন্দেহ নাই সকলো পাঠকে কিতাপখন পঢ়ি শিহৰিত, বিস্মিত আৰু আনন্দিত হ’ব৷ ফেচবুকত খণ্ড খণ্ডকৈ প্ৰকাশ হওঁতে পাঠকৰ পৰা এনে অলেখ সঁহাৰি পাইছিল৷
আজি এই গুৰুত্বপূৰ্ণ কিতাপখন যোৰহাটৰ উক্ত অনুষ্ঠানটোত উন্মোচন কৰা হয়। ২৪০ (+ ১৬ ৰঙীন) পৃষ্ঠাৰ কিতাপখনৰ মূল্য ২৪০ টকা৷ কিতাপখন গুৱাহাটীৰ গ্ৰন্থমেলাত কিনিব পাৰিব ক্ৰমে ষ্টল নং ৪০ আৰু ৯০ ৰ পৰা।
উল্লেখযোগ্য যে লেখক তপন কুমাৰ শৰ্মা যোৰহাটৰ সন্তান আৰু উক্ত বিদ্যালয়ৰ প্ৰাক্তন ছাত্ৰ আৰু বৰ্তমান উত্তৰ গুৱাহাটী মহাবিদ্যালয়ৰ পদাৰ্থ বিজ্ঞানৰ সহযোগী অধ্যাপক৷ তেওঁ ইয়াৰ পূৰ্বেও অসমীয়া মানুহৰ অ’ত-ত’ত থকা শিপাৰ সন্ধানত হোৱা অভিজ্ঞতাৰে ‘মানৰ দেশত’ আৰু ‘কৰ্ণফুলিৰ পাৰত’ নামৰ দুখন কিতাপ লিখিছিল, যিকেইখনে পাঠক সমাজত বিশেষ সমাদৰ লাভ কৰিছিল।
