অসমৰ এটি অগ্ৰণী ফুটবল প্ৰশিক্ষণ প্ৰতিষ্ঠান কাজিৰঙা ফুটবল একাডেমীয়ে ইউনাইটেড ব্ৰাদাৰ্চ ক্লাবৰ সহযোগত বিগত বৰ্ষবোৰৰ দৰেই এইবছৰো দিনজোৰা কাৰ্যসূচীৰে উলহ-মালহেৰে দেশৰ ষ্বাধীনতা দিৱস উদযাপন কৰিব।
সেই উপলক্ষে ১৫ আগষ্টত কাজিৰঙা ফুটবল একাডেমীৰ খেলপথাৰত, অসম আৰু মেঘালয়ৰ শ্ৰেষ্ঠ ছটা দলৰ জেষ্ঠ খেলুৱৈ সকলৰ মাজত চতুৰ্থবাৰৰ বাবে ‘কে এফ্ এ- ইউবিচি স্বাধীনতা দিবস ফুটবল প্ৰতিযোগিতা’ অনুষ্ঠিত হ’ব। তাৰোপৰি, কাজিৰঙা ফুটবল একাডেমীৰ প্ৰশিক্ষাৰ্থী সকলৰ মাজতো এখন ফুটবল প্ৰতিযোগিতা অনুষ্ঠিত হ’ব।
ইয়াৰ উপৰিও, পৰম্পৰা অনুসৰি আন বছৰবোৰৰ দৰে এই বছৰো অসমৰ প্ৰাক্তন কিম্বদন্তী খেলুৱৈ সকলক এই অনুষ্ঠানত সম্বৰ্ধনা জনোৱা হ’ব।
এই বছৰৰ ‘কে এফ্ এ- ইউ বিচি স্বাধীনতা দিৱস ফুটবল প্ৰতিযোগিতা’ত যোৱা তিনিবছৰৰ বিজয়ী এ এচ ই বি, নাৰেংগীৰ জ্যেষ্ঠ দলৰ উপৰিও, ইউনাইটেড ব্ৰাদাৰ্চ ক্লাব আৰু শ্বিলং, নলবাৰী, সৰুপথাৰ, খানাপাৰাৰ মুঠ ছটা দলে অংশগ্ৰহণ কৰিব।
এই প্ৰতিযোগিতাৰ বিজয়ী দলে বৰ্গীয় ৰমজান আলি সোঁৱৰণী বঁটা আৰু নগদ ২৫ হাজাৰ টকা লাভ কৰিব। সেইদৰে, ৰানাৰ্চ-আপ দলে ইৰোম ইবোয়াইমা সিঙৰ সন্মানত আগবঢ়োৱা বঁটা আৰু নগদ ১৫ হাজাৰ টকা লাভ কৰিব।
উল্লেখযোগ্য যে, আন্তঃৰাষ্ট্ৰীয় খ্যাতিসম্পন্ন সাতোঁৰবিদ এলভিচ আলি হাজৰিকাই এই অনুষ্ঠানত ৰাষ্ট্ৰীয় পতাকা উত্তোলন কৰিব আৰু সাংবাদিক প্ৰণয় বৰদলৈদেৱে ফুটবল প্ৰতিযোগিতাখন উদ্বোধন কৰিব।
কাজিৰঙা ফুটবল একাডেমী তথা আয়োজক মণ্ডলীয়ে এই সমগ্ৰ কাৰ্যসূচীত ৰাইজৰ উপস্থিতি আৰু সহায় সহযোগিতা কামনা কৰিছে ।
