ৰে’ল অৱৰোধৰ পিছত এইবাৰ প্ৰস্তাৱিত নাগালিমক লৈ জাঙুৰ খাই উঠিছে হাফলঙৰ বিভিন্ন দল সংগঠন। নাগালিমত ডিমা হাচাও জিলাৰ ভূমি অন্তৰ্ভুক্তিৰ বিৰোধিতা কৰি হাতত জাতীয় পতাকা লৈ আজি ৰাতিপুৱা ৯ বজাত হাফলঙৰ সম্ভুধন পয়েণ্টত চৰকাৰৰ বিৰুদ্ধে প্ৰতিবাদত নামিল দল-সংগঠনৰ সদস্য তথা সমৰ্থকসকল।
চৰকাৰে যদি নাগালিমক ডিমা হাচাওৰ ভূমি হস্তান্তৰ কৰে বা ছেটেলাইট কাউন্সিল দিয়ে তেতিয়া হ’লে পাহাৰত জুই জ্বলিব বুলি সকীয়নি দিয়ে প্ৰতিবাদকাৰীসকলে। লগতে নাগালিমত জোৰকৈ ডিমা হাচাওক অন্তৰ্ভুক্ত কৰাৰ ফল বিষম হ’ব বুলিও প্ৰতিবাদকাৰীসকলে সকীয়াই দিয়ে।
আনহাতে, নাগালিমক মাটি এৰি দিলে জাতীয় পতাকাৰ প্ৰতি থকা শ্ৰদ্ধা বা সন্মান কৰাৰ পৰা বিৰত থাকিব বুলি চৰকাৰক সকীয়াই দিয়ে জেএনএইচৰ সভাপতি কল্যাণ দাওলাগুপুয়ে। ‘কিয়নো ভাৰতৰ নাগৰিক হোৱাৰ পাছতো যদি ভাৰত চৰকাৰে আমাৰ মাটি আনক দিয়াৰ কাৰণে অপচেষ্টা অব্যাহত ৰাখে ইয়াতকৈ দুখৰ কথা আৰু কি হ’ব পাৰে’, -তেওঁ কয়।
তেওঁ লগতে কয় যে ২৫ ডিচেম্বৰত বৃহত্তৰ নাগালিম ঘোষণা হ’লে ২৬ ডিচেম্বৰৰ পৰা পাহাৰৰ পৰিস্থিতি অগ্নিগৰ্ভ হৈ পৰিব আৰু ইয়াৰ বাবে দায়ী হ’ব চৰকাৰ।
একেই ভাষ্য আগবঢ়ায় ছেডিমাচা মাদাৰ্চ এছ’চিয়েশ্যনৰ সভানেত্ৰী ৰিংমিলা হোজায়ে। তেওঁ কয়, ‘চৰকাৰে নগা সমস্যা সমাধানৰ কাৰণে ডিমা হাচাওৰ ভূমি হস্তান্তৰ কৰিব সেই কথা কেতিয়াও মানি ল’ব নোৱাৰো।’
ডিমাচা এপেক্স ব’ডি জাদিখে নাইছ’ হছমকে ধৰি ছাত্ৰ সংগঠন আডছু, ডিএছইউ, ডিএমএছ, ডিএমএ আদি সংগঠনে ‘ভাৰত মাতা কি জয়’ৰ লগতে ৰাষ্ট্ৰীয় সংগীতেৰে প্ৰতিবাদ কাৰ্যসূচীৰ সামৰণি মাৰে।
https://youtu.be/3DXVEqgIAEs
https://youtu.be/5RnCfL2d6I4
